നമീബിയ ഒരുചെറിയ മീനല്ല; അയർലൻഡിനെ തകർത്ത്​ സൂപ്പർ 12ൽ

ഷാർജ: ട്വന്‍റി20 ലോകകപ്പിൽ ചരിത്രം രചിച്ച്​ നമീബിയ. ടെസ്റ്റ്​ പദവിയുള്ള രാജ്യമായ അയർലൻഡിനെ എട്ടുവിക്കറ്റിന്​ തകർത്ത്​ നമീബിയ ട്വന്‍റി20 ലോകകപ്പിന്‍റെ സൂപ്പർ 12ലേക്ക്​ മുന്നേറി. ആദ്യമായാണ്​ നമീബിയ ഒരുമേജർ ടൂർണമെന്‍റിന്‍റെ രണ്ടാം റൗണ്ടിലെത്തുന്നത്​​.

ഷാർജയിൽ നടന്ന മത്സരത്തിൽ ആദ്യം ബാറ്റുചെയ്​ത അയർലൻഡിനെ നമീബിയ 20 ഓവറിൽ എട്ടിന്​ 125 റൺസെന്ന സ്​കോറിൽ ഒതുക്കി. മറുപടി ബാറ്റിങ്ങിനിറങ്ങിയ നമീബിയ 18.3 ഓവറിൽ രണ്ടു വിക്കറ്റ്​ മാത്രം നഷ്​ടപ്പെടുത്തി ലക്ഷ്യം നേടി.

രണ്ട്​ വിക്കറ്റ്​ വീഴ്​ത്തുകയും 14 പന്തിൽ 28 റൺസെടുത്ത്​ പുറത്താകാതെ നിൽക്കുകയും ചെയ്​ത നമീബിയയുടെ ഡേവിഡ്​ വീസാണ്​ കളിയിലെ താരം.

ആദ്യം ബാറ്റുചെയ്​ത അയർലൻഡിനായി പോൾ സ്റ്റിർലിങ്​ (38), കെവിൻ ഒബ്രീൻ (25), ആൻഡി ബാൽബിർനി (21) എന്നീ മുൻനിര ബാറ്റ്​സ്​മാൻമാർക്ക്​ മാത്രമാണ്​ രണ്ടക്കം കടക്കാനായത്​. നമീബിയക്കായി ജാൻ ഫ്രിലിങ്ക്​ മൂന്ന്​ വിക്കറ്റ്​ വീഴ്​ത്തി. ജെ.ജെ. സ്​മിത്തും ബെർണാഡ്​ ഷോട്ട്​സും ഓരോ വിക്കറ്റെടുത്തു.

നമീബിയക്കായി വീസിനെ കൂടാതെ നായകൻ ജെർഹാർഡ്​ എറസ്​മസ്​ (53 നോട്ടൗട്ട്​), സേൻ ഗ്രീൻ (24), ക്രൈഗ്​ വില്യംസ്​ (15) എന്നിവരും ബാറ്റുകൊണ്ട്​ തിളങ്ങി.

ഗ്രൂപ്പ്​ എയിൽ രണ്ട്​ മത്സരങ്ങളിൽ നിന്ന്​ നാലുപോയിന്‍റുമായി ശ്രീലങ്കയാണ്​ ഒന്നാമത്​. മൂന്ന്​ മത്സരങ്ങളിൽ നിന്ന്​ നാലുപോയിന്‍റുമായി നമീബിയയാണ്​ രണ്ടാമത്​. ഗ്രൂപ്പ്​ ബിയിൽ നിന്ന്​ സ്​കോട്ട്​ലൻഡും ബംഗ്ലാദേശുമാണ്​ സൂപ്പർ 12ലേക്ക്​ മുന്നേറിയത്​.