പുതിയൊരിന്ത്യ: ആസ്ട്രേലിയക്കെതിരായ വനിത ഏകദിന പരമ്പരക്ക് ഇന്ന് തുടക്കം
text_fieldsഇന്ത്യൻ താരങ്ങൾ മുംബൈയിൽ പരിശീലനത്തിൽ
മുംബൈ: ടെസ്റ്റിലെ രണ്ട് ചരിത്ര വിജയങ്ങൾക്ക് ശേഷം ഇന്ത്യ ആസ്ട്രേലിയക്കെതിരെ വനിത ഏകദിന പരമ്പരക്ക്. വാംഖഡെ സ്റ്റേഡിയത്തിൽ മൂന്ന് മത്സര പരമ്പരയിലെ ആദ്യ കളി ഇന്ന് നടക്കും. ടെസ്റ്റിൽ ഇംഗ്ലണ്ടിനെയും ഓസീസിനെയും തകർത്ത ശേഷമാണ് ഹർമൻപ്രീത് കൗറിന്റെ ഏകദിന സംഘം വൈറ്റ്ബാൾ ക്രിക്കറ്റിന് ഇറങ്ങുന്നത്. ഇംഗ്ലണ്ടിനെതിരായ ട്വന്റി20 പരമ്പര നഷ്ടമായതിന് പിന്നാലെയായിരുന്നു വിജയങ്ങൾ. ആസ്ട്രേലിയക്കെതിരെ ഏകദിനത്തിലും മോശം റെക്കോഡാണ് ടീമിനുള്ളത്.
ടെസ്റ്റിൽ ഇതാദ്യമായി ഓസീസിനെ തോൽപിക്കാനായ ആതിഥേയർ ആത്മവിശ്വാസത്തിലാണ്. അമോൽ മജുംദാറെന്ന പുതിയ പരിശീലകന് കീഴിൽ ടീം അത്ഭുതങ്ങൾ കാട്ടുന്നുണ്ട്. ആസ്ട്രേലിയക്കെതിരെ ഇന്ത്യ ആകെ 50 ഏകദിനങ്ങൾ കളിച്ചപ്പോൾ 40ലും തോൽവിയായിരുന്നു ഫലം.
സ്വന്തം മണ്ണിൽ 21 മത്സരങ്ങളിൽ ജയിച്ചത് നാലെണ്ണത്തിൽമാത്രം. ടെസ്റ്റ് മത്സരങ്ങളിൽ ഓൾ റൗണ്ട് പ്രകടനം കാഴ്ചവെച്ച ദീപ്തി ശർമ, ബൗളിങ്ങിൽ മിന്നിയ പൂജ വസ്ത്രകാർ, സ്നേഹ് റാണ, ബാറ്റിങ്ങിൽ തിളങ്ങിയ സ്മൃതി മന്ദാന, ജെമീമ റോഡ്രിഗസ്, ഷഫാലി വർമ തുടങ്ങിയവരെല്ലാം ഇന്ത്യൻ സംഘത്തിലുണ്ട്. തഹ് ലിയ മക്ഗ്രാത്ത്, ബെത്ത് മൂണി തുടങ്ങിയവർ ബാറ്റിങ്ങിലും ആഷ്ലി ഗാർഡ്നറും കിം ഗാർട്ടുമടക്കം ബൗളിങ്ങിലും അലീസ ഹീലി നയിക്കുന്ന ഓസീസ് ടീമിലെ അപകടകാരികളാണ്.
ടീം ഇവരിൽ നിന്ന്
ഇന്ത്യ: ഹർമൻപ്രീത് കൗർ (ക്യാപ്റ്റൻ), സ്മൃതി മന്ദാന, ജെമീമ റോഡ്രിഗസ്, ഷഫാലി വർമ, ദീപ്തി ശർമ, യാസ്തിക ഭാട്യ, റിച്ച ഘോഷ്, അമൻജോത് കൗർ, ശ്രേയങ്ക പാട്ടീൽ, മന്നത്ത് കശ്യപ്, സെയ്ക ഇസ്ഹാഖ്, രേണുക സിങ് താക്കൂർ, ടിറ്റാസ് സാധു, പൂജ വസ്ത്രകാർ, സ്നേഹ് റാണ, ഹർലീൻ ഡിയോൾ.
ആസ്ട്രേലിയ: അലീസ ഹീലി (ക്യാപ്റ്റൻ), ഡാർസി ബ്രൗൺ, ഹീതർ ഗ്രഹാം, ആഷ്ലി ഗാർഡ്നർ, കിം ഗാർട്ട്, ജെസ് ജോനാസെൻ, അലാന കിംഗ്, ഫോബ് ലിച്ച്ഫീൽഡ്, തഹ് ലിയ മക്ഗ്രാത്ത്, ബെത്ത് മൂണി, എല്ലിസ് പെറി, മേഗൻ ഷട്ട്, അന്നാബെൽ സതർലാൻഡ്, ജോർജിയ വെയർഹാം.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.