ഇന്ത്യ-പാക്​​ മത്സരത്തിന്‍റെ സമ്മർദം താങ്ങാനാകുന്ന രണ്ട്​ പേർ മാത്രമാണ്​ ഇന്ത്യൻ ടീമിലുള്ളതെന്ന്​ മുൻ പാക്​ താരം; ഇവരാണ്​ ആ രണ്ടു പേർ

ഇന്ത്യ-പാക്​​ ടി20 മത്സരത്തിന്‍റെ സമ്മർദം താങ്ങാനാകുന്ന രണ്ട്​ താരങ്ങൾ മാത്രമാണ്​ ഇന്ത്യൻ ക്രിക്കറ്റ്​ ടീമുലുള്ളതെന്ന്​ മുൻ പാക്​ ക്രിക്കറ്റ്​ താരവും നിലവിൽ ലെജൻഡ്‌സ് ലീഗ് ക്രിക്കറ്റിൽ (എൽ.എൽ.സി) ഏഷ്യൻ ലയൺസിലെ കളിക്കാരനുമായ മുഹമ്മദ് ഹഫീസ്. വിരാട് കോഹ്ലി​യും രോഹിത് ശർമ്മയുമാണ്​ അതിന്​ കഴിയുന്ന രണ്ട്​ താരങ്ങളെന്നും അദ്ദേഹം പറഞ്ഞു.

''വിരാടും രോഹിത്തുമാണ് ഇന്ത്യൻ ടീമിലെ ഏറ്റവും മികച്ച താരങ്ങൾ. മറ്റുള്ളവർ നല്ല കളിക്കാരല്ല എന്ന് ഞാൻ പറയുന്നില്ല, പക്ഷെ ഇന്ത്യ-പാക് പോലൊരു മത്സരത്തിൽ ഇവർ രണ്ടു പേർ ഇല്ലാതെ ടീമിലെ മറ്റംഗങ്ങൾക്ക് കൈകാര്യം ചെയ്യുക അത്ര എളുപ്പമായിരിക്കില്ല. ഇന്ത്യക്കെതിരെ ഞാനൊരുപാട് മത്സരങ്ങളിൽ കളിച്ചിട്ടുണ്ട്. ഇരു ടീമംഗങ്ങൾക്കും കടുത്ത സമ്മർദമാണ്​ അനുഭവിക്കേണ്ടി വരുന്നത്​ '' -ഹഫീസ് പറഞ്ഞു.

കഴിഞ്ഞ വർഷം യു.എ.ഇയിൽ നടന്ന ടി20 ലോകകപ്പിൽ പാക്കിസ്താൻ ഇന്ത്യയെ പരാജയപ്പെടുത്തിയിരുന്നു. ആസ്ത്രേലിയയിൽ നടക്കാനിരിക്കുന്ന അടുത്ത ടി20 ലോകകപ്പ്​ മത്സരങ്ങളുടെ ഷെഡ്യൂൾ കഴിഞ്ഞയാഴ്ച ഇന്റർനാഷണൽ ക്രിക്കറ്റ് കൗൺസിൽ (ഐ.സി.സി) പ്രഖ്യാപിച്ചിരുന്നു. ഒക്ടോബർ 23 ന് മെൽബൺ ക്രിക്കറ്റ് ഗ്രൗണ്ടിൽ നടക്കുന്ന മത്സരത്തിൽ ഇന്ത്യ പാകിസ്താനെ നേരിടും. കഴിഞ്ഞ പരാജയത്തിന്‍റെ മധുരപ്രതികാരത്തിന്​ കാത്തിരിക്കുന്ന ഇന്ത്യക്ക്​ നിർണായകമാണ്​ ആ മത്സരം.