സെഞ്ചൂറിയനിൽ സെഞ്ച്വറിയുമായി രാഹുൽ; ഇന്ത്യക്ക്​ മികച്ച തുടക്കം

സെഞ്ചൂറിയൻ: ദക്ഷിണാഫ്രിക്കൻ മണ്ണിൽ ആദ്യ പരമ്പര വിജയം ലക്ഷ്യമിടുന്ന വിരാട്​ കോഹ്​ലിക്കും സംഘത്തിനും ആദ്യ ടെസ്റ്റിൽ മികച്ച തുടക്കം. മൂന്നു മത്സര പരമ്പരയിലെ ആദ്യ അങ്കത്തിന്​ സെഞ്ചൂറിയനിലെ സൂപ്പർ സ്​പോർട്​ പാർക്കിൽ തുടക്കമായപ്പോൾ ആദ്യ ദിനം ഇന്ത്യ മൂന്നിന്​ 272 എന്ന നിലയിലാണ്​.

തകർപ്പൻ സെഞ്ച്വറിയുമായി പുറത്താവാതെ നിൽക്കുന്ന ഓപണർ ലോകേഷ്​ രാഹുലി‍െൻറ (122) ഇന്നിങ്​സാണ്​ ഇന്ത്യക്ക്​ കരുത്തായത്​. അർധ സെഞ്ച്വറി നേടിയ മായങ്ക്​ അഗർവാളിനൊപ്പം (60) ചേർന്ന്​ രാഹുൽ ഓപണിങ്​ വിക്കറ്റിൽ കൂട്ടിച്ചേർത്ത 117 റൺസ്​​ ഇന്ത്യൻ സ്​കോറിന്​ അടിത്തറപാകി​.

ചേതേശ്വർ പുജാര നേരിട്ട ആദ്യ പന്തിൽ പൂജ്യത്തിന്​ കൂടാരംകയറിയെങ്കിലും ക്യാപ്​റ്റൻ വിരാട്​ കോഹ്​ലിയുടെയും (35) അജിൻക്യ രഹാനെയുടെയും (40 നോട്ടൗട്ട്​) ഇന്നിങ്​സുകൾ ഇന്ത്യക്ക്​ മുതൽക്കൂട്ടായി. കോഹ്​ലിക്ക്​ ഏറെനാളായി അകന്നുനിൽക്കുന്ന സെഞ്ച്വറിയിലേക്ക്​ ബാറ്റുവീശാനായി​ല്ലെങ്കിലും മൂന്നാം വിക്കറ്റിൽ രാഹുലിനൊപ്പം 82 റൺസി‍െൻറ കൂട്ടുകെട്ടാണ്​​ ഉയർത്തിയത്​. ഒട്ടും ഫോമിലല്ലാതെ അതിസമ്മർദത്തിൽ ഇറങ്ങിയ രഹാനെ മികച്ച രീതിയിൽ ബാറ്റുചെയ്ത്​ രാഹുലിനൊപ്പം അഭേദ്യമായ നാലാം വിക്കറ്റിൽ 73 റൺസ്​ പടുത്തുയർത്തി.

ആക്രമണവും പ്രതിരോധവും സംയോജിപ്പിച്ച ഇന്നിങ്​സിലൂടെയാണ്​ രാഹുൽ സെഞ്ച്വറി സ്വന്തമാക്കിയത്​. തുടക്കത്തിൽ പങ്കാളി മായങ്കിന്​ കൂടുതൽ സ്​കോറിങ് ചുമതല നൽകിയ രാഹുൽ പ്രതിരോധത്തിലായിരുന്നു.

എന്നാൽ, പതിയെ ആക്രമിച്ചുതുടങ്ങിയ രാഹുൽ 248 പന്തിൽ ഒരു സിക്സും 17 ബൗണ്ടറിയും പായിച്ചു. കോഹ്​ലി 94 പന്തിൽ നാലും രഹാനെ 81 പന്തിൽ എട്ടും ബൗണ്ടറി നേടി. ലുൻഗി എൻഗിഡിയാണ്​ മൂന്നു വിക്കറ്റും വീഴ്ത്തിയത്​.