രഞ്ജി ട്രോഫി: സച്ചിനും രോഹനും അർധസെഞ്ച്വറി; കേരളത്തിന് 162 റൺസ് ഒന്നാം ഇന്നിങ്സ് ലീഡ്

തിരുവനന്തപുരം: ഛത്തിസ്​ഗഢിനെതിരായ രഞ്ജിട്രോഫി മത്സരത്തിൽ ആതിഥേയരായ കേരളം വിജയപ്രതീക്ഷയിൽ. തുമ്പ സെന്‍റ്​ സേവ്യേഴ്​സ്​ ഗ്രൗണ്ടിൽ നടന്ന പോരാട്ടത്തിൽ ആദ്യ ഇന്നിങ്​സിൽ 162 റൺസിന്‍റെ ഒന്നാം ഇന്നിങ്​സ്​ ലീഡ്​ നേടിയ കേരളം രണ്ടാം ഇന്നിങ്​സ്​ ആരംഭിച്ച സന്ദർശകരുടെ രണ്ട്​ വിക്കറ്റുകൾ പത്ത്​ റൺസ്​ എടുക്കും മുമ്പെ വീഴ്ത്തി​. ആദ്യ ഇന്നിങ്​സിൽ 149 റൺസിന്​ ഛത്തിസ്​ഗഢിനെ എറിഞ്ഞിട്ട കേരളം, രോഹൻ പ്രേമിന്‍റെയും സച്ചിൻ ബേബിയുടെയും അർധസെഞ്ച്വറിയു​ടെ മികവിൽ ഒന്നാം ഇന്നിങ്​സിൽ 311 റൺസ് അടിച്ചെടുത്തു.

77 റൺസ്​ വീതം നേടിയ സച്ചിനും രോഹനും ചേർന്ന്​ മൂന്നാം വിക്കറ്റിൽ പടുത്തുയർത്തിയ 123 റൺസിന്‍റെ കൂട്ടുകെട്ടാണ്​ മത്സരത്തിൽ ​കേരളത്തിന്​ മേൽക്കൈ നൽകിയത്​. സ്​കോർ 192ൽ എത്തിയപ്പോൾ രോഹൻ പുറത്തായി. തുടർന്ന്​ 12 റൺസ്​ നേടിയ അക്ഷയ്​ ചന്ദ്രനുമായി ചേർന്ന്​ സച്ചിൻ സ്​കോർ 229ൽ എത്തിച്ചെങ്കിലും ആ സ്​കോറിൽ നിൽക്കെ ഇരുവരും പുറത്തായി. പിന്നീട്​ 46 റൺസ്​ നേടിയ ക്യാപ്​റ്റൻ സഞ്ജു സാംസണിന്‍റെ ഇന്നിങ്​സാണ്​ കേരളത്തെ 311 എന്ന മികച്ച സ്​കോറിലെത്തിച്ചത്​. ഏകദിന ശൈലിയിൽ കളിച്ച സഞ്ജു 54 പന്തുകൾ നേരിട്ട്​ മൂന്ന്​ വീതം ഫോറും സിക്​സറും പായിച്ചു. കേരളത്തിന്‍റെ വാലറ്റക്കാർക്ക്​ കാര്യമായി ഒന്നും ചെയ്യാൻ കഴിഞ്ഞില്ല. ജലജ്​ സക്​സേന (11), സിജോമോൻ ജോസഫ്​ (6), എഫ്​. ഫനൂസ്​ (9), എൻ.പി. ബേസിൽ (പൂജ്യം) എന്നിവർ വേഗം പുറത്തായി. എട്ട്​ റൺസുമായി വൈശാഖ്​ ചന്ദ്രൻ പുറത്താകാതെ നിന്നു. ഛത്തിസ്​ഗഢിനുവേണ്ടി സുമിത്​ റ്യൂയികർ മൂന്നും അജയ്​ മണ്ഡൽ രണ്ടും വിക്കറ്റുകൾ വീഴ്ത്തി.

സന്ദർശകരുടെ രണ്ടാം ഇന്നിങ്​സ്​ തകർച്ചയോടെയായിരുന്നു. സ്​കോർബോർഡിൽ റൺസ് ചേർക്കും മുമ്പുതന്നെ ഓപണർമാരെ നഷ്ടപ്പെട്ടു. നാല്​ പന്തുകൾ നേരിട്ട ഋഷഭ്​ തിവാരിയെ ക്യാപ്​റ്റൻ സഞ്ജുവിന്‍റെ കൈകളിലെത്തിച്ച്​ ആദ്യ ഇന്നിങ്​സിലെ അഞ്ച്​ വിക്കറ്റ്​ നേട്ടക്കാരൻ ജലജ്​ സക്​സേനയാണ്​ ഞെട്ടിച്ചത്​. അടുത്ത ഓവറിൽ സനിധ്യ ഹുർകട്ടിനെ വിക്കറ്റിന്​ മുന്നിൽ എ.ബി.ഡബ്ല്യുവിൽ കുടുക്കി വൈശാഖ്​ ചന്ദ്രൻ രണ്ടാം വിക്കറ്റ്​ നേടി. മൂന്ന്​ റൺസ്​ നേടി ക്യാപ്​റ്റൻ ഹർപ്രീത്​ സിങ്​ ഭാട്ടിയയും ഏഴ്​ റൺസോടെ അമൻദീപ്​ ഖരെയുമാണ്​ രണ്ടാം ദിവസത്തെ കളി അവസാനിക്കുമ്പോൾ ക്രീസിൽ.