'ചെയ്യാൻ കഴിയില്ലെന്ന് പറയുന്നത് ചെയ്യുന്നതാണ്​ ഏറ്റവും വലിയ സന്തോഷം'; രോഹിത്തിന്‍റെ 2016ലെ ട്വീറ്റ് വൈറൽ ​

ലണ്ടൻ: ഇംഗ്ലണ്ടിനെതിരായ നാലാം ടെസ്റ്റിന്‍റെ മൂന്നാം ദിനം വിദേശ മണ്ണിലെ​ ആദ്യ ടെസ്റ്റ്​ സെഞ്ച്വറി പൂർത്തിയാക്കിയ രോഹിത്​ ശർമയെ എഴുന്നേറ്റ്​ നിന്ന്​ കൈയ്യടിച്ചാണ്​ ഇംഗ്ലീഷ്​ കാണികൾ പവലിയനിലേക്കയച്ചത്​. 2013ൽ അരങ്ങേറിയ ശേഷം നേട്ടം സ്വന്തമാക്കാനായി എട്ടുവർഷമാണ്​ രോഹിത്തിന്​ കാത്തിരിക്കേണ്ടി വന്നത്​.

94 റൺസിൽ എത്തിനിൽക്കേ മുഈൻ അലിലെ ലോങ്​ഓണിലൂടെ സിക്​സർ പറത്തിയാണ്​ രോഹിത്ത്​ സെഞ്ച്വറി ആഘോഷിച്ചത്​. എന്നാൽ സെഞ്ച്വറി നേട്ടത്തിന്​ പിന്നാലെ 2016ലെ രോഹിത്തിന്‍റെ ഒരു ട്വീറ്റാണ്​ സോഷ്യൽ മീഡിയയിൽ ചർച്ചയായത്​.

'നിങ്ങൾക്ക് ചെയ്യാൻ കഴിയില്ലെന്ന് ആളുകൾ പറയുന്നത് ചെയ്യുന്നതാണ് ജീവിതത്തിലെ ഏറ്റവും വലിയ സന്തോഷം'- ഇതായിരുന്നു ട്വീറ്റിലെ ഉള്ളടക്കം. ഏതായാലും പറഞ്ഞത്​ ചെയ്​ത്​ കാണിച്ച ഹിറ്റ്​മാനെ വാഴ്​ത്തുകയാണ്​ ട്വിറ്ററാറ്റി.

മധ്യനിര ബാറ്റ്​സ്​മാനയി ടെസ്റ്റ്​ ടീമിൽ കയറിയും ഇറങ്ങിയും കളിച്ചിരുന്ന രോഹിത്ത്​ ശർമക്ക്​ ഓപണറുടെ റോളിൽ പ്രമോഷൻ ലഭിച്ചതോടെയാണ്​ തലവര മാറിയത്​. സ്വന്തം മണ്ണിൽ ദക്ഷിണാഫ്രിക്കക്കെതിരായ പരമ്പരയിൽ തിളങ്ങിയതോടെ ലോകേഷ്​ രാഹുലിനൊത്ത കൂട്ടാളിയെ ഇന്ത്യക്ക്​ കണ്ടെത്താനായി.