ധോണി ഇതിഹാസം; അതുപോലെ കളിക്കാൻ ആർക്കുമാവില്ല –സഞ്​ജു

ദുബൈ: ​എം.എസ്.​ധോണിയുമായുള്ള താരതമ്യങ്ങൾ തള്ളി സഞ്​ജു സാംസൺ. 'ധോണിയെ പോലെ കളിക്കുക എളുപ്പമല്ല. ഞാൻ ഒരിക്കലും അങ്ങനെ ചിന്തിക്കാറില്ല. അദ്ദേഹം ഇന്ത്യൻ ക്രിക്കറ്റിലെ ഇതിഹാസമാണ്​. ആർക്കും അത്​ അനുകരിക്കാനാവില്ല. എ​െൻറ ശൈലിയിലാണ്​ ഞാൻ കളിക്കുന്നത്​' -സഞ്​ജു പറഞ്ഞു.

കഴിഞ്ഞ മത്സരത്തിനു പിന്നാലെ ശശി തരൂർ എം.പിയും മുൻ ഇന്ത്യൻ താരം ഗൗതം ഗംഭീറും ധോണി താരതമ്യത്തിൽ കൊമ്പുകോർത്തിരുന്നു.സഞ്​ജുവിൻെറ ഉജ്ജ്വല പ്രകടനത്തിന്​ പിന്നാലെ ക്രിക്കറ്റ്​ പ്രേമിയായ ശശി തരൂർ എം.പി ട്വീറ്റ്​ ചെയ്​തത്​ ഇങ്ങന: ''എനിക്ക്​ സഞ്​ജുവിനെ പത്തുവർഷത്തിലേറെയായി അറിയാം. അവന്​ 14 വയസ്സുള്ളപ്പോൾ തന്നെ അവൻ അടുത്ത ധോണിയാണെന്ന്​ ഞാൻ പറഞ്ഞിരുന്നു. ആ പ്രവചനം സത്യമാകുന്ന ദിനം വന്നണഞ്ഞിരിക്കുകയാണ്​. ഐ.പി.എല്ലിലെ രണ്ട്​ വിസ്​മയകരമായ ഇന്നിങ്​സുകളിലൂടെ ഒരു ലോകോത്തര താരം വന്നിരിക്കുന്നു''.

തൊട്ടുപിന്നാലെ മറുപടിയുമായി മുൻ ഇന്ത്യൻ ഓപ്പണറും പാർലമെൻറ്​ അംഗവുമായ ഗൗതം ഗംഭീറെത്തി. സഞ്​ജു അടുത്ത ധോണിയാകുമെന്ന തരൂരിൻെറ ട്വീറ്റ്​ ഗംഭീർ റീട്വീറ്റ്​ ചെയ്​തതിങ്ങനെ: ''സഞ്​ജു സാംസൺ അടുത്ത മറ്റാരുമാകേണ്ടതില്ല. അവൻ ഇന്ത്യൻ ക്രിക്കറ്റിൻെറ സഞ്​ജു സാംസൺ തന്നെ ആയാൽ മതി''.

സഞ്​ജുവിനെ മറ്റാരുമായും താരതമ്യപ്പെടുത്തരുതെന്നും അവ​ൻെറ ഏറ്റുവും മികച്ച പ്രകടനം വരാനിരിക്കുന്നതേയുള്ളൂവെന്നും ചൂണ്ടിക്കാട്ടി മുൻ ഇന്ത്യൻ ക്രിക്കറ്റ്​ താരവും മലയാളിയുമായ ശ്രീശാന്തും രംഗത്തെത്തി.