''സൂക്ഷിച്ച്​ കളിച്ചിരുന്നെങ്കിൽ മികച്ച സ്​കോർ നേടാമായിരുന്നു, പക്ഷേ ടീം ആവശ്യപ്പെട്ടത്​ അതല്ല''

ആസ്​ട്രേലിയൻ പര്യടനത്തിന്​ ശേഷം തിരുവനന്തപുരത്തെ വീട്ടിലെത്തിയ സഞ്​ജു സാംസൺ ഐ.പി.എല്ലിലെയും ഇന്ത്യൻ ടീമിലെയും പ്രകടനത്തെക്കുറിച്ച്​ മനസ്സുതുറന്നു. മലയാള മനോരമക്ക്​ നൽകിയ അഭിമുഖത്തിലൂടെയാണ്​​ സഞ്​ജു പ്രതികരണം അറിയിച്ചത്​.

''ഐ.പി.എല്ലിൽ തന്‍റെ ഏറ്റവും മികച്ച സീസണായിരുന്നു ഇത്​. റൺസിന്‍റെ കണക്കിലല്ല, ടീമിനുവേണ്ടി മികച്ച ഇന്നിങ്​സുകൾ കളിക്കാൻ കഴിഞ്ഞുവെന്നതിലാണ്​ കാര്യം. സെഞ്ചുറികളുടെയും അർധസെഞ്ചുറികളുടെയും എണ്ണത്തേക്കാൾ കളിക്കാരനെന്ന നിലയിൽ അഭിമാനം തോന്നുന്നത്​ ഈ കാര്യങ്ങളിലാണ്​.''

''ആസ്​ട്രേലിയക്കെതിരായ 3 കളികളിലും വലിയ സ്​കോർ കണ്ടെത്താനായില്ല. പക്ഷേ നിരാശയില്ല. മധ്യ ഓവറുകളിൽ റൺനിരക്ക്​ ഉയർത്തുകയെന്ന് ടീം​ ഗെയിം പ്ലാനായിരുന്നു. പുറത്താകുമെന്ന്​​ ഭയപ്പെടാതെ കളിക്കാനായിരുന്നു നിർദേശം. വിക്കറ്റ്​ സൂക്ഷിച്ചുകളിച്ചിരുന്നെങ്കിൽ മികച്ച സ്​കോർ കണ്ടെത്താൻ കഴിയുമായിരുന്നു. പക്ഷേ ടീം ആവ​ശ്യപ്പെട്ടത്​ അല്ല. ഇന്ത്യൻ ടീമിലേക്ക്​ അടുത്ത അവസരം എപ്പോ​ഴാണെന്ന്​ അറിയില്ല. എപ്പോൾ വേണമെങ്കിലും വിളി വരാം''

''ഇത്തവണ ആഭ്യന്തര സീസണിൽ ഒരു കിരീടമെങ്കിലും നേടണം. ക്രിക്കറ്റിലേക്ക്​ മടങ്ങിയെത്തുന്ന ​ശ്രീശാന്ത്​ ചേട്ടന്​ നൽകാവുന്ന ഏറ്റവും മികച്ച ഉപഹാരം അതായിരിക്കും'' -സഞ്​ജു പ്രതികരിച്ചു.