ക്രിക്കറ്റ്​ താരം അശ്വിന്‍റെ കുടുംബത്തിലെ നാല്​ കുട്ടികളടക്കം 10 പേർക്ക്​ കോവിഡ്​

ചെന്നൈ: നാല്​ കുട്ടികളും ആറ്​ മുതിർന്നവരുമടക്കം തങ്ങളുടെ കുടുംബത്തിലെ 10 പേർക്ക്​ കോവിഡ്​ സ്​ഥിരീകരിച്ചതായി ഇന്ത്യൻ സ്​പിന്നർ ആർ. അശ്വിന്‍റെ ഭാര്യ പ്രീതി വെള്ളിയാഴ്ച വെളിപ്പെടുത്തി. അശ്വിന്‍റെയും പ്രീതിയുടെയും കുട്ടികൾക്കും രോഗബാധ സ്​ഥിരീകരിച്ചിട്ടുണ്ട്​. കോവിഡി​നെതിരെ പൊരുതാനായി എല്ലാവരും വാക്​സിൻ സ്വീകരിക്കണമെന്ന്​ അവർ ട്വിറ്ററിലൂടെ അഭ്യർഥിച്ചു.

കുടുംബത്തിന്​ രോഗബാധ സ്​ഥിരീകരിച്ചതിനാൽ ഐ.പി.എല്ലിൽ നിന്ന്​ താൽക്കാലികമായി വിട്ടു നിൽക്കുകയാണെന്ന്​ അശ്വിൻ കഴിഞ്ഞ ദിവസം വ്യക്തമാക്കിയിരുന്നു.

ഏപ്രിൽ 25ന്​ സൺറൈസേഴ്​സ്​ ഹൈദരാബാദിനെതിരായ മത്സര ശേഷമാണ്​ കുടുംബത്തിന്​ പിന്തുണയേകാനായി മടങ്ങുന്നതെന്ന്​ താരം ട്വിറ്ററിലൂടെ അറിയിച്ചിരുന്നു. കാര്യങ്ങൾ സാധാരണ ഗതിയിലായാൽ വീണ്ടും ഡൽഹി കാപിറ്റൽസ്​ ജഴ്​സിയിൽ​ തിരികെയെത്തുമെന്നാണ്​ താരം വ്യക്തമാക്കിയത്​.