റാഞ്ചി ട്വന്‍റി20യിൽ രോഹിത് ശർമ സ്വന്തമാക്കിയ മൂന്ന്​ റെക്കോഡുകൾ

ന്യൂഡൽഹി: ടീമിന്‍റെ നായകനെന്ന ഉത്തരവാദിത്വം പലപ്പോ​ഴും ക്രിക്കറ്റ്​ താരങ്ങളുടെ പ്രകടനത്തെ ബാധിക്കാറുണ്ട്​. എന്നാൽ ഇന്ത്യൻ ടീമിന്‍റെ മുഴുവൻ സമയ നായകനായി അവരോധിക്കപ്പെട്ട രോഹിത്​ ശർമയുടെ കാര്യം നേരെ തിരിച്ചാണ്​. ​െവള്ളിയാഴ്ച റാഞ്ചിയിൽ ന്യൂസിലൻഡിനെതിരെ നടന്ന രണ്ടാം മത്സരത്തിൽ 25ാം അന്താരാഷ്​ട്ര ട്വന്‍റി20 ഫിഫ്​റ്റി നേടിയാണ്​ താരം കളംനിറഞ്ഞത്​.

ഓപണിങ്ങിൽ കെ.എൽ. രാഹുലിനൊപ്പം ഒരിക്കൽ കൂടി സെഞ്ച്വറി കൂട്ടുകെട്ടുണ്ടാക്കി രോഹിത്​ ഒരിക്കൽ കൂടി മത്സരം ഇന്ത്യയുടെ വരുതിയിലാക്കി. ട്വന്‍റി20 ലോകകപ്പിൽ അഫ്​ഗാനിസ്​താനെതിരായ മത്സര ശേഷം തുടർച്ചയായി അഞ്ചാം മത്സരത്തിലാണ്​ ഓപണിങ്​ ജോഡി ഇന്ത്യക്ക്​ മികച്ച തുടക്കം നൽകിയത്​. രാഹുലിന്‍റെയും (49 പന്തിൽ 65) രോഹിത്തിന്‍റെയും മികവിൽ (36 പന്തിൽ 55) ഇന്ത്യ ടിം സൗത്തിയെയും സംഘത്തെയും ഏഴുവിക്കറ്റിന്​ തുരത്തി പരമ്പരയിൽ 2-0ത്തിന്​ മുന്നിലെത്തി. മത്സരത്തിലൂടെ​ ഒരുപിടി റെക്കോഡുകളും രോഹിത്​ സ്വന്തമാക്കി​.

ഫിഫ്​റ്റിയിൽ കോഹ്​ലിക്കൊപ്പം

അന്താരാഷ്​ട്ര ട്വന്‍റി20യിൽ ഏറ്റവും കൂടുതൽ തവണ 50 റൺസിന്​ മുകളിൽ സ്​കോർ ചെയ്​ത താരങ്ങളുടെ പട്ടികയിൽ വിരാട്​ കോഹ്​ലിക്കൊപ്പം രോഹിത്ത്​ ഒന്നാമതെത്തി. രണ്ട്​ ഇന്ത്യൻ സൂപ്പർ താരങ്ങളും 29 തവണയാണ്​ 50ന്​ മുകളിൽ സ്​കോർ ചെയ്​തത്​.

അതേസമയം രോഹിത്ത്​ നാലുതവണ സ്​കോർ മൂന്നക്കമാക്കി മാറ്റി. അതേസമയം കോഹ്​ലിക്ക്​ അന്താരാഷ്​ട്ര ട്വന്‍റി20യിൽ സെഞ്ച്വറിയില്ല. പാകിസ്​താൻ നായകൻ ബാബർ അസമും (25- ഒരുസെഞ്ച്വറി) ആസ്​ട്രേലിയൻ താരം ഡേവിഡ് വാർണറുമാണ്​ (22-ഒരുസെഞ്ച്വറി)​ ഇരുവർക്കും പിന്നിൽ.

ബാബറിനെയും ഗപ്​റ്റിലിനെയും മറികടന്നു

റാഞ്ചിയിലും രാഹുലും രോഹിത്തും 100 റൺസ്​ കൂട്ടുകെട്ടുണ്ടാക്കിയിരുന്നു. ട്വന്‍റി20യിൽ 13ാം തവണയാണ്​ രോഹിത്​ 100 റൺസ്​ കൂട്ടുകെട്ടിൽ പങ്കാളിയാകുന്നത്​. ശിഖർ ധവാനും രാഹുലുമായിരുന്നു പ്രധാന പങ്കാളികൾ. 12 സെഞ്ച്വറി കൂട്ടുകെട്ടുകളുമായി ബാബർ അസമും ഗപ്​റ്റിലുമാണ് രണ്ടാമത്​. ഡേവിഡ്​ വാർണർ (11) മൂന്നാമതുണ്ട്​.

ബാബർ-റിസ്​വാൻ കൂട്ടുകെട്ടിനൊപ്പം

ട്വന്‍റി20യിൽ ഏറ്റവും കൂടുതൽ സെഞ്ച്വറി കൂട്ടുകെട്ടുയർത്തിയ ജോഡിയായി രാഹുലും രോഹിത്തും മാറി. അഞ്ച്​ സെഞ്ച്വറി കൂട്ടുകെട്ടുകളുമായി ബാബർ മുഹമ്മദ്​ റിസ്​വാൻ കൂട്ടുകെട്ടിനൊപ്പമാണ്​ രാഹുൽ-ഹിറ്റ്​മാൻ സഖ്യമെത്തിയത്​. 27 ഇന്നിങ്​സുകളിൽ നിന്നാണ്​ ഇന്ത്യൻ സഖ്യം നേട്ടം സ്വന്തമാക്കിയതെങ്കിൽ ബാബറിനും റിസ്​വാനും 22 ഇന്നിങ്​സുകൾ മാത്രമാണ്​ വേണ്ടിവന്നത്​. ധവാനൊപ്പം നാലു​സെഞ്ച്വറികൾ നേടിയ രോഹിത്ത്​ പട്ടികയിൽ നാലാം സ്​ഥാനത്തുമുണ്ട്​.