ഉംബ്രി; വിലയറിയാതെ പോയ പ്രതിഭ

കോഴിക്കോട്​: ഭാഷക്കും ദേശത്തിനുംമീതെ ഇന്ത്യയെ ക്രിക്കറ്റ്​ ഒന്നിപ്പിക്കുവെന്നതിന്​ ഉദാഹരിക്കാൻ രാഹുൽ ദ്രാവിഡ്​ ചൂണ്ടിക്കാട്ടിയ താരമായിരുന്നു ​വെള്ളിയാഴ്​ച ആലപ്പുഴയിൽ സ്വയം ജീവിതമവസാനിപ്പിച്ച എം.സുരേഷ്​ കുമാർ എന്ന ഉംബ്രി. 2011ലെ ഡോൺ ബ്രാഡ്​മാൻ പ്രഭാഷണ വേദിയിലായിരുന്നു ദ്രാവിഡ്​ 1990ൽ ന്യൂസിലൻഡി​നെതിരായ അണ്ടർ 19 ടീമിലെ സഹതാരമായ ഉംബ്രിയെ പേരെ​ടുത്തുപറഞ്ഞത്​. ദ്രാവിഡ്​ നായകനായ കൗമാര ടീമിലെ ഒാൾറൗണ്ടറായിരുന്നു ലെഫ്​റ്റ്​ ആം ഒാഫ്​ സ്​പിന്നറായ ഇൗ ആലപ്പുഴക്കാരൻ.

'അന്നൊരു മത്സര ദിവസം ക്രീസിൽ ഉംബ്രിയും ഉത്തർപ്രദേശുകാരൻ ധർമേന്ദ്ര മിശ്രയും. ഉംബ്രിക്ക്​ മലയാളം മാത്രമേ അറിയൂ. ധർമേന്ദ്രക്ക്​ ഹിന്ദി മാത്രവും. ഇരുവരും ക്രീസിൽ എങ്ങനെ ആശയവിനിമയം നടത്തുമെന്ന്​ ഞങ്ങൾ ഡ്രസിങ്​ റൂമിലിരുന്നു ആശങ്കപ്പെട്ടപ്പോൾ, അതെല്ലാം അസ്​ഥാനത്താക്കി ഇരുവരും സെഞ്ച്വറി കൂട്ടുകെട്ട്​ പടുത്തുയർത്തി' -​ലോകം കേട്ടുകൊണ്ടിരുന്ന പ്രഭാഷണത്തിൽ ദ്രാവിഡ്​ മലയാളി താരത്തെ സ്​മരിച്ചത്​ ഇങ്ങനെ.

ഇന്ത്യൻ ക്രിക്കറ്റ്​ സെലക്​ഷനിലെ സ്വജന പക്ഷപാതവും േക്വാട്ട സംവിധാനംവെച്ച്​ വീതിച്ചെടുക്കുന്ന പതിവുമായിരുന്നു ഉംബ്രിക്ക്​ ദേശീയ സീനിയർ ടീമിലേക്കുള്ള ഇടം നിഷേധിച്ചത്​. കേരളത്തിൽ നിന്നും ഇന്ത്യൻ ടീമിലെത്തുന്ന ആദ്യതാരമായാണ്​ ഉംബ്രി 1990 ന്യൂസിലൻഡ്​ പര്യടനത്തിനുള്ള അണ്ടർ 19 ടീമിൽ ഇടംപിടിച്ചത്​. സ്​റ്റീഫൻ ​​െഫ്ലമിങ്, ഡിയോൺ നാഷ്​ എന്നിവരടങ്ങിയ കിവീസിനെതിരെ മികച്ച പ്രകടനം കാഴ്​ചവെച്ചു. ബാറ്റ്​സ്​മാനും ഫീൽഡറും ഉന്നംപിഴക്കാത്ത ത്രോയുമായി വിസ്​മയിപ്പിച്ച ഉംബ്രി ഇന്ത്യ പാഴാക്കിക്കളഞ്ഞ ടാലൻറ്​ ആയാണ്​ സമകാലികരും ക്രിക്കറ്റ്​ വിദഗ്​ധരും വിശേഷിപ്പിക്കുന്നത്​.

അനന്തപത്​മനാഭൻ, രാംപ്രകാശ്, ഉംബ്രി എന്നീ സ്​പിന്നർമാർ 1991-99കളിൽ സമ്മാനിച്ച രഞ്​ജി വിജയങ്ങൾക്ക്​ കണക്കില്ല. 72 ഫസ്​റ്റ് ​ക്ലാസ്​ മത്സരങ്ങളിൽ നിന്ന്​ ഒരു സെഞ്ച്വറിയടക്കം 1657 റൺസും 196 വിക്കറ്റും നേടി. 12 തവണ അഞ്ചു വിക്കറ്റ്​ നേട്ടം കൊയ്​തു. 51 ലിസ്​റ്റ്​ 'എ' മത്സരങ്ങളിൽ 433 റൺസും 52 വിക്കറ്റും വീഴ്​ത്തി. വിരമിച്ച ശേഷവും വെറ്ററൻ ക്രിക്കറ്റും മറ്റുമായി സജീവമായിരിക്കേയാണ്​ ജീവിതം ക്ലീൻബൗൾഡ്​ ചെയ്​ത്​ ഉംബ്രി തിരിച്ചുനടക്കുന്നത്​.