തോൽവി ഉറപ്പായിടത്ത്​ അപ്രതീക്ഷിത ജയം; ബാംഗ്ലൂർ- ഹൈദരാബാദ്​ ഐ.പി.എൽ മത്സരത്തിൽ ഒത്തുകളിയോ?

ബംഗളൂരു: കഴിഞ്ഞ ദിവസം ഹൈദരാബാദിനെതിരെ ദയനീയ തോൽവി മണത്ത ബാംഗ്ലൂർ ടീം പെ​ട്ടെന്നുണ്ടായ ട്വിസ്​റ്റിൽ ജയം പിടിച്ചതിനു പിന്നിൽ ഒത്തുകളിയു​ണ്ടോ? ആരാധകർ സമൂഹ മാധ്യമങ്ങളിൽ കടുത്ത വിമർശനവുമായി എത്തിയതോടെയാണ്​ ആരോപണം ശക്​തിയാർജിച്ചത്​.

കളിയിലുടനീളം പിന്നിലായിപോയ ബാംഗ്ലൂരിനു വേണ്ടി ഷഹ്​ബാസ്​ അഹ്​മദ്​ എറിഞ്ഞ ഓവറാണ്​ ശരിക്കും ഫലം തിരിച്ചത്​. ആദ്യം ബാറ്റു ചെയ്​ത ബാംഗ്ലൂർ ഉയ​ർത്തിയ 149 റൺസ്​ എന്ന ചെറിയ ടോട്ടൽ പിന്തുടർന്ന ഹൈദരാബാദ്​ ഒരു ഘട്ടത്തിലും പ്രതിസന്ധിയിലായിരുന്നില്ല. ഡേവിഡ്​ വാർണറും മനീഷ്​ പാ​ണ്ഡെയും തുടക്കമിട്ട ഇന്നിങ്​സിൽ 24 പന്തിൽ 35 റൺസാണ്​ 17ാം ഓവറിനുമുമ്പ്​ ഹൈദരാബാദിന്​ വേണ്ടിയിരുന്നത്​. ഇതോടെ, പന്തെറിയാൻ എത്തിയ

ഇടങ്കയ്യൻ സ്​പിന്നർ ഷഹ്​ബാസ്​ എറിഞ്ഞ 17ാം ഓവറിൽ തുടരെ മൂന്നു വിക്കറ്റ്​ വീണതോടെ ടീം കളി കൈവിടുകയായിരുന്നു. ജോണി ബെയർസ്​റ്റോ, മനീഷ്​ പാണ്ഡെ, അബ്​ദുൽ സമദ്​ എന്നിവർ വിക്കറ്റ്​ കളഞ്ഞുകുളിച്ചതോടെ തിരിച്ചടിക്കാനാവാതെ ഹൈദരാബാദ്​ ആറു റൺസിന്​ കളി തോറ്റു.

ഇതിനു പിന്നാലെയാണ്​ ആരാധകർ​ ആരോപണവുമായി സമൂഹ മാധ്യമങ്ങളിൽ നിറഞ്ഞത്​. വിജയ്​ മല്യ ഒത്തുകളിക്കാൻ കോഹ്​ലിക്കും സംഘത്തിനും പണം നൽകിയെന്നുവരെ ട്വിറ്റററിൽ പ്രതികരണമെത്തി.

ആദ്യ മത്സരത്തിൽ മുംബൈയെയും വീഴ്​ത്തിയ ബാംഗ്ലൂരിന്​​ രണ്ടു കളികളിൽ രണ്ടു ജയമായി. 18ന്​ കൊൽക്കത്തക്കെതിരെയാണ്​ അടുത്ത കളി.