പാക്​ ഓപണറെ കെട്ടിപ്പുണർന്ന്​ കോഹ്​ലി; കൈയ്യടിച്ച്​ ക്രിക്കറ്റ്​ ലോകം

ദുബൈ: ക്രിക്കറ്റ് ലോകം​ കാത്തിരുന്ന പോരാട്ടത്തിൽ ഇന്ത്യയെ സമസ്​ത മേഖലയിലും നിഷ്​പ്രഭമാക്കിയാണ്​ പാകിസ്​താൻ ചരിത്രം തിരുത്തി എഴുതിയത്​. ക്രിക്കറ്റ്​ എന്നാൽ മാന്യൻമാരുടെ ഗെയിം എന്നാണ്​ പൊതുവേ പറയപ്പെടാറുള്ളത്​. മത്സര ഫലം എന്തായാലും പരസ്​പരം ഹസ്​തദാനം ചെയ്യുകയും തങ്ങളേക്കാൾ മികച്ച പ്രകടനം കാഴ്​ചവെച്ചവരെ അഭിനന്ദിക്കുകയും ചെയ്യാറുണ്ട്​ ക്രിക്കറ്റ്​ താരങ്ങൾ.

ആ വാക്കിനെ അന്വർഥമാക്കുന്ന പെരുമാറ്റവുമായി ഇന്ത്യൻ ക്യാപ്​റ്റൻ കോഹ്​ലി ഏവരുടെയും ഇഷ്​ടം ഒരിക്കൽ കൂടി നേടി. പാകിസ്​താനി ഓപണർമാരെ പുഞ്ചിരിച്ച്​ അഭിനന്ദിക്കുന്ന കോഹ്​ലിയുടെ ചിത്രമായിരുന്നു ഇന്ത്യ-പാക്​ മത്സരത്തിന്‍റെ ഏറ്റവും മനോഹരമായ ബാക്കിപത്രം. ഇന്ത്യൻ ബൗളർമാരെ തച്ചുതകർത്ത റിസ്​വാനെ കോഹ്​ലി ആലിംഗനം ചെയ്യുകയും തോളിൽ തട്ടി അഭിനന്ദിക്കുകയും ചെയ്​തു.

തോൽവിയുടെ നിരാശക്കിടെയിലും ക്രിക്കറ്റിന്‍റെ ആ സൗന്ദര്യമു​ള്ള കാഴ്ച ഓരോ ഇന്ത്യൻ ആരാധകനിലും പുഞ്ചിരി വിടർത്തി. ഞായറാഴ്ച രാത്രി ക്രിക്കറ്റ്​ ആരാധകരുടെ ഇൻസ്റ്റഗ്രാം സ്​റ്റോറികളിലും വാട്​സ്​ആപ്പ്​ സ്​റ്റാറ്റസുകളിലും വൈറൽ ചിത്രം സ്​ഥാനം നേടി. 'സ്​പിരിറ്റ്​ ഓഫ്​ ക്രിക്കറ്റ്​' എന്ന അടിക്കുറിപ്പോടെ ചിത്രം പാകിസ്​താൻ ക്രിക്കറ്റ്​ ബോർഡ്​ അവരുടെ സാമൂഹിക മാധ്യമ പേജുകളിൽ പങ്കുവെച്ചിട്ടുണ്ട്​.

ഇതോടൊപ്പം തന്നെ ഇന്ത്യയുടെ മെന്‍ററും മുൻനായകനുമായ എം.എസ്​. ധോണിയുമായി പാക്​ കളിക്കാർ മത്സര ശേഷം സംവദിക്കുന്ന ചിത്രങ്ങളും സാമൂഹിക മാധ്യമങ്ങളിൽ വൈറലായി.

ഇന്ത്യ ഉയർത്തിയ152 റൺസ്​ വിജയലക്ഷ്യം ഓപണർമാരായ മുഹമ്മദ്​ റിസ്​വാനും (79*) ക്യാപ്​റ്റൻ ബാബർ അസമും (69*) ചേർന്ന്​ അനായാസം വെട്ടിപ്പിടിച്ചതോടെ പാകിസ്​താൻ 10 വിക്കറ്റിന്‍റെ ഉജ്വല വിജയം സ്വന്തമാക്കി. ലോകകപ്പിൽ ഇതാദ്യമായാണ്​ പാകിസ്​താൻ ഇന്ത്യയെ തോൽപിക്കുന്നത്​.

ആറു റൺസിന്​ രണ്ട്​ ഓപ്പണർമാരെയും നഷ്​ടമായ ഇന്ത്യ ഏഴുവിക്കറ്റിന്​ 151 റൺസെന്ന നിലയിലാണ്​ ഇന്നിങ്​സ്​ അവസാനിപ്പിച്ചത്​. ചങ്കുതുളക്കുന്ന സമ്മർദ്ദത്തിലും ഒരറ്റത്ത്​ വിക്കറ്റ്​ കാത്ത നായകൻ വിരാട് കോഹ്​ലിയാണ്​ ഇന്ത്യൻ ഇന്നിങ്​സിന്​ നിറം പകർന്നത്​​. 30 പന്തിൽ 39 റൺസുമായി റിഷഭ്​ പന്തും കനപ്പെട്ട സംഭാവന നൽകി. നാലോവറിൽ 31റൺസിന്​ മൂന്നുവിക്കറ്റ്​ വീഴ്​ത്തിയ അ​ഫ്രീദിയാണ്​ പാക്​ നിരയിൽ മികച്ചുനിന്നത്​.

'അമ്പയർ ഉറങ്ങുകയായിരുന്നോ?'; രാഹുൽ പുറത്തായത്​​ നോബോളിലെന്ന്​ തെളിയിവുനിരത്തി ആരാധകർ

ദുബൈ: ലോകകപ്പിൽ പാകിസ്​താനോട്​ ഇന്ത്യ ആദ്യമായി തോറ്റതിന്​ പിന്നാലെ സോഷ്യൽ മീഡിയയെ പിടിച്ചുകുലുക്കി നോബോൾ വിവാദം. ഇന്ത്യൻ ഓപണർ കെ.എൽ. രാഹുൽ ഔട്ടായ പന്ത്​ നോബോൾ ആണെന്നാണ്​ ആരാധകർ തെളിവുകൾ നിരത്തി ചൂണ്ടിക്കാണിക്കുന്നത്​​. മത്സരം അവസാനിക്കുന്നതിന്​ മുമ്പ്​ തന്നെ അമ്പയർമാരുടെ പിഴവ്​ ചൂണ്ടിക്കാട്ടി ട്വിറ്ററാറ്റി രംഗ​ത്തെത്തിയിരുന്നു.

ഷഹീന്‍ അഫ്രീദി എറിഞ്ഞ മൂന്നാം ഓവറിലെ ആദ്യ പന്തില്‍ രാഹുല്‍ ബൗള്‍ഡായി മടങ്ങുകയായിരുന്നു. ഈ പന്ത് നോബോളാണെന്ന് തെളിയിക്കുന്ന ദൃശ്യങ്ങള്‍ ട്വിറ്ററിൽ പങ്കുവെച്ച ആരാധകര്‍ അമ്പയർ ഉറങ്ങുകയായിരുന്നോ എന്നാണ്​ ചോദിക്കുന്നത്​​.

പന്ത് റിലീസ് ചെയ്യുമ്പോള്‍ അഫ്രീദിയുടെ കാല്‍ വരക്ക്​ പുറത്താണെന്ന് തെളിയിക്കുന്ന ചിത്രങ്ങളാണ് ആരാധകർ സോഷ്യൽ മീഡിയയിൽ പ​ങ്കുവെക്കുന്നത്​. മത്സരത്തില്‍ എട്ടു പന്തില്‍ നിന്ന് മൂന്ന്​ റൺസുമായാണ്​ ഉജ്വല ഫോമിൽ കളിക്കുന്ന രാഹുൽ പുറത്തായത്​. ഓപണർമാർ പെ​ട്ടെന്ന്​ മടങ്ങിയത്​ ഇന്ത്യയുടെ സ്​കോറിങ്​ വേഗത്തെ നന്നായി ബാധിച്ചിരുന്നു.

അതേസമയം ലോകവേദിയിൽ ഇന്ത്യക്ക് ​മുന്നിൽ എന്നും അപമാനിതരായി മടങ്ങിയ പാകിസ്​താന്​ ഞായറാഴ്​ച വിജയദിനമാക്കി. ദുബൈ അന്താരാഷ്​ട്ര സ്​റ്റേഡിയത്തിൽ എല്ലാം ശരിയായ ദിനത്തിൽ ഇന്ത്യയെ പത്തു വിക്കറ്റിന്​ തോൽപ്പിച്ചാണ്​​ പാകിസ്​താൻ ചരിത്രം തിരുത്തിയെഴുതിയത്​. ട്വന്‍റി 20, ഏകദിന ലോകകപ്പ്​ ചരിത്രത്തിൽ ഇതുവരെയും ഇന്ത്യയെ തോൽപ്പിച്ചിട്ടില്ലെന്ന ചീത്തപ്പേര്​ ബാബർ അസമിലൂടെ പാകിസ്​താൻ മാറ്റി. തുടക്കത്തിലെ പതർച്ചക്ക്​ ശേഷം ഇന്ത്യ പടുത്തുയർത്തിയ 151 റൺസ്​ പാകിസ്​താൻ ഒരുവിക്കറ്റ്​ പോലും നഷ്​ടമാക്കാതെ മറികടന്നു. ഓപ്പണർമാരായെത്തിയ മുഹമ്മദ്​ റിസ്​വാൻ 55 പന്തിൽ 79 റൺസോടെയും ബാബർ അസം 52 പന്തിൽ 68 റൺസോടെയും വിജയശ്രീലാളിതരായി മടങ്ങി.

ആറു റൺസിന്​ രണ്ട്​ ഓപ്പണർമാരെയും നഷ്​ടമായ ഇന്ത്യ ഏഴുവിക്കറ്റിന്​ 151 റൺസെന്ന നിലയിലാണ്​ ഇന്നിങ്​സ്​ അവസാനിപ്പിച്ചത്​. ചങ്കുതുളക്കുന്ന സമ്മർദ്ദത്തിലും ഒരറ്റത്ത്​ വിക്കറ്റ്​ കാത്ത നായകൻ വിരാട് കോഹ്​ലിയാണ്​ ഇന്ത്യൻ ഇന്നിങ്​സിന്​ നിറം പകർന്നത്​​. 30 പന്തിൽ 39 റൺസുമായി റിഷഭ്​ പന്തും കനപ്പെട്ട സംഭാവന നൽകി.

ടോസ്​ നഷ്​ടപ്പെട്ട്​ ബാറ്റിങ്ങിനിറങ്ങിയ ഇന്ത്യക്ക്​ ആദ്യ ഓവറുകൾ ദുസ്വപ്​നം പോലെയായിരുന്നു. ആദ്യ ഓവറിൽ നേരിട്ട ആദ്യ പന്തിൽ തന്നെ തന്നെ ഓപണർ രോഹിത്​ ശർമയെ വിക്കറ്റിന്​ മുന്നിൽ കുരക്കി ഷഹീൻ ഷാ അഫ്രീദി കൊടുങ്കാറ്റായി ആഞ്ഞടിക്കുകയായിരുന്നു. പിന്നാലെ ലോകേഷ്​ രാഹുലിനെ (3) ക്ലീൻ ബൗൾഡാക്കി അഫ്രീദി വീണ്ടും ഇന്ത്യ​ക്ക്​ പ്രഹരമേൽപിച്ചു. ടീം സ്​കോർ 31ൽ നിൽക്കേ നന്നായി തുടങ്ങിയ സൂര്യകുമാർ യാദവും (11) പുറത്തായതോടെ സമ്മർദത്തിലായ ഇന്ത്യക്കായി വിരാട്​ കോഹ്​ലിയും (27 പന്തിൽ 28) റിഷഭ്​ പന്തും (28 പന്തിൽ 37 ) ഒത്തുചേരുകയായിരുന്നു.

ഒരറ്റത്ത്​ വിരാട്​ കോഹ്​ലി പക്വതയോടെ ബ​ാറ്റേന്തിയപ്പോൾ റൺനിരക്കുയർത്തി റിഷഭ്​ പന്ത്​ പിന്തുണനൽകി. ഹസൻ അലിയെ തുടർച്ചയായി രണ്ട്​ സിക്​സറുകൾക്ക്​ പറത്തിയ ആക്രമണ മൂഡിലേക്ക്​ മാറിയ റിഷഭ്​ പന്തിനെ ഷദാബ്​ ഖാൻ പുറത്താക്കുയായിരുന്നു. തുടർന്നെത്തിയ രവീന്ദ്ര ജദേജക്ക്​ (13 പന്തിൽ 13) ആഞ്ഞുവീശാനായില്ല. ഇതിനിടയിൽ അർധ സെഞ്ച്വറി പൂർത്തിയാക്കിയ കോഹ്​ലി നായകനൊത്ത ഇന്നിങ്​സ്​ കാഴ്ചവെച്ചു മടങ്ങി.

നാലോവറിൽ 31റൺസിന്​ മൂന്നുവിക്കറ്റ്​ വീഴ്​ത്തിയ അ​ഫ്രീദിയാണ്​ പാക്​ നിരയിൽ മികച്ചുനിന്നത്​. രണ്ട്​ വിക്കറ്റ്​ വീഴ്​ത്തിയെങ്കിലും നാലോവറിൽ 44റൺസ്​ വഴങ്ങിയ ഹസൻ അലി പാക്​ നിരയിൽ നന്നായി തല്ലുവാങ്ങി.