'ഞങ്ങൾ നിരപരാധികൾ; കെട്ടുകഥ നിർത്തണം'; ബാൻക്രോഫ്​റ്റി​െൻറ വെളിപ്പെടുത്തൽ തള്ളി ഓസീസ്​ ബൗളർമാർ

സിഡ്​നി: ബൗളർമാരുടെ അറിവോടെയാണ്​ വിവാദ പന്ത്​ചുരണ്ടൽ അരങ്ങേറിയതെന്ന കാമറൂൺ ബാൻക്രോഫ്​റ്റി​െൻറ വെളിപ്പെടുത്തൽ തള്ളി ആസ്​ട്രേലിയൻ ടീമിലെ സഹതാരങ്ങൾ. ആസ്​ട്രേലിയൻ ക്രിക്കറ്റിന്​ തീരാകളങ്കമായി മാറിയ 2018 മാർച്ചിൽ നടന്ന കേപ്​ടൗൺ ടെസ്​റ്റിലെ 'സാൻഡ്​പേപ്പർ ഗേറ്റ്​' വിവാദത്തിൽ മുഖ്യകഥാപാത്രമായ ബാൻക്രോഫ്​റ്റാണ്​ ടീമിൽ ബൗളർമാരെ കുരുക്കും വിധം വെടിപൊട്ടിച്ചത്​.

എന്നാൽ, കഴിഞ്ഞ ദിവസം സംയുക്​ത പ്രസ്​താവനയിലൂടെ ടെസ്​റ്റ്​ ടീമിലെ ബൗളർമാരായ പാറ്റ്​ കമ്മിൻസ്​, മിച്ചൽ സ്​റ്റാർക്​, ജോഷ്​ ഹേസൽവുഡ്​, നഥാൻ ലിയോൺ എന്നിവർ ബാൻക്രോഫ്​റ്റി​െൻറ പരാമർശത്തെ തള്ളി. കിംവദന്തികളും നിഗൂഢതകളും അവസാനിപ്പിക്ക​ണമെന്നാ വശ്യപ്പെട്ടാണ്​ നാലുപേരും തങ്ങളുടെ നിരപരാധിത്വം ബോധ്യപ്പെടുത്തിയത്​.

'ഞങ്ങളുടെ സത്യസന്ധതയിൽ ഞങ്ങൾ അഭിമാനിക്കുന്നു. മുൻതാരങ്ങളും ചില മാധ്യമപ്രവർത്തകരും ഞങ്ങളുടെ സത്യസന്ധതയെ ചോദ്യം ചെയ്യുന്നത്​ നിരാശപ്പെടുത്തുന്നു. ഇൗ വിഷയത്തിൽ പലതവണ ചോദ്യങ്ങൾക്ക്​ ഉത്തരം നൽകി. ന്യൂലാൻഡ്​സിലെ ടി.വി സ്​ക്രീനിൽ ആ ദൃശ്യം തെളിയും വരെ, പന്ത്​ ചുരണ്ടാൻ ഒരു വസ്​തു പുറത്തു നിന്നും കൊണ്ടുവന്ന കാര്യം ഞങ്ങളാർക്കും അറിയില്ലായിരുന്നു. ' -തങ്ങളുടെ നിരപരാധിത്വം ബോധ്യപ്പെടുത്തിക്കൊണ്ട്​ നാലുപേരും വിശദീകരിച്ചു. കഴിഞ്ഞ ദിവസം ഒരു അഭിമുഖത്തിനിടെയാണ്​ ബാൻക്രോഫ്​റ്റ്​ ടീമിലെ ബൗളർമാർക്കു​ കൂടി പന്ത്​ ചുരണ്ടൽ അറിവുള്ളതായി വെളിപ്പെടുത്തിയത്​.