വനിത പ്രീമിയർ ലീഗ്: ബംഗളൂരു Vs ഡൽഹി ഫൈനൽ

ന്യൂഡൽഹി: വനിത പ്രീമിയർ ലീഗ് ക്രിക്കറ്റിന്റെ കലാശപ്പോരിൽ ബംഗളൂരുവും ഡൽഹിയും മുഖാമുഖം. അവസാന പന്തുവരെ ആവേശം നിറഞ്ഞുനിന്ന കളിയിൽ അഞ്ചു റൺസിനായിരുന്നു റോയൽ ചലഞ്ചേഴ്സ് ജയം. ടോസ് നേടി ആദ്യം ബാറ്റ് ചെയ്ത റോയൽ ചലഞ്ചേഴ്സ് വനിതകൾ നിശ്ചിത 20 ഓവറിൽ ആറ് വിക്കറ്റ് നഷ്ടത്തിൽ 135 റൺസ് നേടി. ലീഗിൽ തകർപ്പൻ ഫോമിലുള്ള എല്ലിസ് പെറി 66 റൺസ് നേടി.

ജോർജിയ വേർഹാം 18 റൺസുമായി പുറത്താകാതെ നിന്നു. ക്യാപ്റ്റൻ സ്മൃതി മന്ദാനയും സഹഓപണർ സോഫി ഡെവിനും പത്ത് റൺസ് വീതം നേടി പുറത്തായി. മറുപടി ബാറ്റിങ്ങിൽ തുടക്കം ഗംഭീരമാക്കിയ മുംബൈ ഇന്ത്യൻസ് ബാറ്റിങ് 130 റൺസിലൊതുങ്ങി. ഹർമൻപ്രീത് കൗറും അമേലിയ കെറുമടക്കം ചെറുതായി പൊരുതിയെങ്കിലും ബംഗളൂരു ബൗളിങ്ങിനു മുന്നിൽ ടീം മുട്ടുകുത്തി.