അവസാന മത്സരത്തിൽ പൂജ്യത്തിന് പുറത്ത്; വിരമിക്കൽ പ്രഖ്യാപിച്ച് മുൻ ഇന്ത്യൻ വിക്കറ്റ് കീപ്പർ

കൊൽക്കത്ത: ക്രിക്കറ്റിന്റെ എല്ലാ ഫോർമാറ്റിൽനിന്നും വിരമിക്കൽ പ്രഖ്യാപിച്ച് മുൻ ഇന്ത്യൻ വിക്കറ്റ് കീപ്പർ വൃദ്ധിമാൻ സാഹ. രഞ്ജി ട്രോഫിയിൽ പഞ്ചാബിനെതിരായ മത്സരത്തിനു പിന്നാലെയാണ് 40 വയസ്സുകാരനായ ബംഗാൾ താരം ക്രിക്കറ്റ് കരിയർ അവസാനിപ്പിച്ചത്.

സി ഗ്രൂപ്പിലെ അവസാന മത്സരത്തിൽ താരത്തിന് തിളങ്ങാനായില്ല. ഏഴു പന്തുകൾ നേരിട്ട താരം റണ്ണൊന്നും എടുക്കാതെയാണ് പുറത്തായത്. എന്നാൽ, മത്സരത്തിൽ ഇന്നിങ്സിനും 13 റൺസിനും ബംഗാൾ ജയിച്ചു. പിന്നാലെ എക്സിൽ പോസ്റ്റ് ചെയ്ത കുറിപ്പിൽ തന്‍റെ ക്രിക്കറ്റ് ഓർമകളും അനുഭവങ്ങളും താരം പങ്കുവെച്ചു. 28 വർഷത്തെ ക്രിക്കറ്റ് കരിയറിൽ ഇന്ത്യൻ ജഴ്സിയിലും സംസ്ഥാനത്തിനും ജില്ലക്കും സർവകലാശാലക്കും കോളജിനും സ്കൂളിനും വേണ്ടി ക്രിക്കറ്റ് കളിക്കാനായത് വലിയ ആദരമെന്ന് സാഹ കുറിച്ചു.

അവസാന മത്സരത്തിനു ശേഷം സാഹയെ തോളിലേറ്റി ഗ്രൗണ്ട് വലംവെച്ചാണ് സഹതാരങ്ങൾ യാത്രയയപ്പ് നൽകിയത്. കഴിഞ്ഞ വർഷം നവംബറിൽ സാഹ, അന്താരാഷ്ട്ര ക്രിക്കറ്റിൽനിന്ന് വിരമിച്ചെങ്കിലും ആഭ്യന്തര ക്രിക്കറ്റിൽ തുടർന്നു. 2021ലാണ് ഇന്ത്യക്കുവേണ്ടു അവസാനമായി കളിച്ചത്. 40 ടെസ്റ്റുകളിൽ മൂന്നു സെഞ്ച്വറികളും ആറു അർധ സെഞ്ച്വറികളും ഉൾപ്പെടെ 1,353 റൺസെടുത്തിട്ടുണ്ട്. ഇന്ത്യക്കുവേണ്ടി അഞ്ചു ഏകദിനങ്ങളും കളിച്ചു. 2007ലാണ് ഫസ്റ്റ് ക്ലാസ് ക്രിക്കറ്റിൽ അരങ്ങേറ്റം കുറിക്കുന്നത്. 142 മത്സരങ്ങളിൽ 210 ഇന്നിങ്സുകളിലായി 7,169 റൺസെടുത്തിട്ടുണ്ട്. 14 സെഞ്ച്വറികളും 44 അർധ സെഞ്ച്വറികളും നേടി.

എം.എസ്. ധോണി വിരമിച്ചതോടെയാണ് സാഹക്ക് വിക്കറ്റ് കീപ്പറുടെ റോളിൽ ഇന്ത്യൻ ടീമിൽ കൂടുതൽ അവസരങ്ങൾ ലഭിച്ചത്. ഋഷഭ് പന്ത് ദേശീയ ടീമിലെത്തിയതോടെ സാഹക്ക് അവസരങ്ങൾ കുറഞ്ഞു. ഐ.പി.എല്ലിൽ പഞ്ചാബ് കിങ്സ്, സൺറൈസേഴ്സ് ഹൈദരാബാദ്, ഗുജറാത്ത് ടൈറ്റൻസ് ടീമുകൾക്കു വേണ്ടി കളിച്ചിട്ടുണ്ട്. കരിയറിലുടനീളം തന്നെ പിന്തുണച്ച ബി.സി.സി.ഐക്ക് താരം നന്ദി പറഞ്ഞു.

‘കരിയറിലെ എല്ലാ നേട്ടങ്ങൾക്കും ക്രിക്കറ്റെന്ന അത്ഭുതകരമായ ഗെയിമിനോട് കടപ്പെട്ടിരിക്കുന്നു. മറക്കാനാകാത്ത വിജയങ്ങളും വിലമതിക്കാനാകാത്ത അനുഭവങ്ങളും എനിക്കു സമ്മാനിച്ചത് ക്രിക്കറ്റാണ്. ഉയർച്ചകളിലും താഴ്ചകളിലും വലിയ വിജയങ്ങളിലും തോൽവികളിലും എന്നെ ഞാനാക്കിയത് ക്രിക്കറ്റാണ്. ഞാൻ ക്രിക്കറ്റിന്റെ എല്ലാ ഫോർമാറ്റുകളില്‍നിന്നും വിരമിക്കുകയാണ്. പുതിയൊരു അധ്യായം ആരംഭിക്കാനുള്ള സമയമാണിത്. ഇനി കുടുംബത്തിനും സുഹൃത്തുക്കൾക്കുമൊപ്പം എനിക്കു നഷ്ടമായ ജീവിതം ആസ്വദിക്കാനാണു തീരുമാനം’ -സാഹ എക്സിൽ വ്യക്തമാക്കി.