ഏഷ്യൻ ടേബ്ൾ ടെന്നിസിൽ ഇന്ത്യൻ വനിതകൾക്ക് ആദ്യ മെഡൽ; മെഡലുറപ്പിച്ച് പുരുഷന്മാരും

അസ്താന (കസാഖിസ്താൻ): ഏഷ്യൻ ടേബ്ൾ ടെന്നിസ് ചാമ്പ്യൻഷിപ്പ് ചരിത്രത്തിലാദ്യമായി ഇന്ത്യൻ വനിതകൾക്ക് മെഡൽ. സെമി ഫൈനലിൽ ജപ്പാനോട് 1-3ന് തോറ്റ ടീം വെങ്കലം കരസ്ഥമാക്കി. അതേസമയം, ആതിഥേയരായ കസാഖിസ്താനെ 3-1ന് പരാജയപ്പെടുത്തി സെമിയിലെത്തിയ പുരുഷന്മാരും മെഡലുറപ്പിച്ചു. വനിതകളിൽ അ‍യ്ഹിക മുഖർജിയാണ് ആദ്യമിറങ്ങിയത്. മിവ ഹരിമോട്ടോയോട് 2-3ന് (8-11 11-9, 8-11, 13-11, 7-11) പരാജയപ്പെട്ടു. തുടർന്ന് മനിക ബത്ര 3-0 (11-6, 11-5, 11-8) സ്കോറിന് സസൂകി ഓഡോയെ വീഴ്ത്തിയതോടെ ആകെ സ്കോർ 1-1. സുതീർഥ മുഖർജി 0-3ന് (9-11, 4-11, 13-15) മിമ ഇട്ടോയോടും മനിക 1-3 (3-11, 11-6, 2-11, 3-11)ന് ഹരിമോട്ടോയോടും തോൽവി രുചിച്ചതോടെ ഫൈനൽ പ്രവേശനം അടഞ്ഞു.

പുരുഷ വിഭാഗത്തിൽ തുടർച്ചയായ മൂന്നാം മെഡലാണ് ഇന്ത്യ ഉറപ്പാക്കിയത്. ക്വാർട്ടർ ഫൈനലിൽ ശരത് കമൽ, മനവ് താക്കർ, ഹർമീത് ദേശായി എന്നിവർ ഇന്ത്യക്കായി ഇറങ്ങി. മാനവ് 3-0ത്തിന് (11-9, 11-7, 11-6) കിറിൽ ഗ്രാസിമെങ്കോയെ തോൽപിച്ചപ്പോൾ ഹർമീത് 0-3ന് (6-11, 5-11, 8-11) അലൻ കുർമാൻഗ്ലിയേവിനോട് പരാജയപ്പെട്ടു. തുടർന്ന്, ശരത് 3-0ന് (11-4, 11-7, 12-10) എയ്ഡോസ് കെൻസിഗുലേവിനെ തറപ്പറ്റിച്ചു. നിർണായക മത്സരത്തിൽ ഗ്രാസിമെങ്കോയെ 3-2ന് (6-11, 11-9, 7-11, 11-8, 11-8) ഹർമീത് വീഴ്ത്തിയതോടെ ഇന്ത്യൻ ടീമിന് ജയം. കഴിഞ്ഞ രണ്ട് തവണയും പുരുഷന്മാർക്ക് വെങ്കലം ലഭിച്ചിരുന്നു.