പി.എസ്.ജിയെ നേരിടാൻ അൽനസ്​ർ-അൽഹിലാൽ സംയുക്ത ടീമായി; റൊണാൾഡോ നയിക്കും

റിയാദ്​: റിയാദ്​ സീസണി​ന്റെ ഭാഗമായി വ്യാഴാഴ്​ച റിയാദ്​ കിങ്​ ഫഹദ്​ ഇൻറർനാഷനൽ സ്​റ്റേഡിയത്തിൽ നടക്കുന്ന സീസൺ കപ്പ്​ ഫുട്​ബാളിൽ ഫ്രഞ്ച്​ വമ്പന്മാരായ​ പി.എസ്​.ജിയോട്​ ഏറ്റുമുട്ടുന്ന അൽനസ്​ർ-അൽഹിലാൽ സംയുക്ത ടീമിലെ കളിക്കാരെ പ്രഖ്യാപിച്ചു. ക്രിസ്റ്റ്യാനോ റൊണാൾഡോ നയിക്കുന്ന സംയുക്ത ടീമിലെ കളിക്കാരുടെ പേരുകൾ ടീം മാനേജർ ഖാലിദ് അൽഷാനിഫാണ്​ പുറത്തുവിട്ടത്​.

22 ​പേരാണ് സംയുക്ത ടീമിലുള്ളത്. മുഹമ്മദ് അൽഉവൈസ്, അമീൻ ബുഖാരി (ഗോൾകീപ്പർമാർ) അബ്​ദുല്ല അൽഅംറി, അലി ലഗാമി, സഊദ്​ അബ്​ദുൽ ഹമീദ്, ജാങ് ഹ്യൂൻ സൂ, അബ്​ദുല്ല മാദു, സുൽത്താൻ അൽഗനാം, ഖലീഫ അൽദോസരി, അലി അൽബുലൈഹി, ലൂയി ഗുസ്താവോ, അബ്​ദുല്ല അൽഖൈബരി, അബ്​ദുല്ല അതീഫ്, മുഹമ്മദ് കു​നോ, സാലിം അൽദോസരി, സാമി അൽനജ്​ഇ, മാത്യൂസ് പെരേര, താലിസ്ക, ബെറ്റി മാർട്ടിനെസ്, അന്ദ്രിയ കാരിയോ, മൂസ മരിഗ എന്നിവരാണ്​ ടീം അംഗങ്ങൾ​​.

ക്യാപ്​റ്റനായി ക്രിസ്​റ്റ്യാനോ റൊണാൾഡോയെ കഴിഞ്ഞ ദിവസം​ തെരഞ്ഞെടുത്തിരുന്നു​. ക്യാപ്​റ്റൻ ആം ബാൻഡ്​ റൊണാൾഡോയെ പൊതുവിനോദ അതോറിറ്റി ചെയർമാൻ തുർക്കി ആലുശൈഖ്​ അണിയിക്കുകയും ചെയ്​തിരുന്നു. അർജന്റീനക്കാരൻ മാർസലോ ഗല്ലാർഡോ ആണ്​ ടീം പരിശീലകൻ​. വ്യാഴാഴ്​ച രാത്രി എട്ടിനാണ്​ നടക്കുന്ന മത്സരത്തി​ന്റെ ടിക്കറ്റുകളെല്ലാം ദിവസങ്ങൾക്ക്​ മുമ്പെ വിറ്റുപോയിരുന്നു.

മത്സരം ലയണൽ മെസ്സി-ക്രിസ്റ്റ്യാനോ റൊണാൾഡോ പോരാട്ടത്തിന് ഒരിക്കൽ കൂടി വഴിയൊരുക്കുകയാണ്. 2020 ഡിസംബറിലാണ് ഇരുവരും അവസാനം ഏറ്റുമുട്ടിയത്. അന്ന് ക്രിസ്റ്റ്യാനോ നയിച്ച യുവന്റസ് മെസ്സി നയിച്ച ബാഴ്സലോണയെ എതിരില്ലാത്ത മൂന്ന് ഗോളിന് പരാജയപ്പെടുത്തിയിരുന്നു.