ബെൻസേമ ഡബ്​ളിൽ ജയിച്ച്​ റയൽ; ഗെറ്റാഫെക്കു മുന്നിൽ കുരുങ്ങി അത്​ലറ്റികോ- ലാ ലിഗയിൽ കിരീട പോരാട്ടം കനക്കുന്നു

മഡ്രിഡ്​: അവസാന വിസിൽ മുഴങ്ങാനിരിക്കെ എതിർവല തുളച്ച്​ ബെൻസേമ റയൽ മഡ്രിഡിന്‍റെ രക്ഷകൻ. എൽചെക്കെതിരായ മത്സരത്തിലാണ്​ ഒന്നിനെതിരെ ബെൻസേമ നേടിയ രണ്ടു ഗോളുകൾക്ക്​ ജയിച്ച്​ റയൽ രണ്ടാം സ്​ഥാനത്ത്​ തത്​കാലം നില ഭദ്രമാക്കിയത്​. ഗോളൊഴിഞ്ഞ ആദ്യ പകുതിക്കു ശേഷം കാൽവോ സാൻറോമൻ 61ാം മിനിറ്റിൽ നേടിയ ഗോളിന്​ എൽചെയാണ്​ ആദ്യം മുന്നിലെത്തിയത്​. 73ാം മിനിറ്റിൽ ലൂക മോ​ഡ്രിച്​ നൽകിയ പാസ്​ ഗോളാക്കി മാറ്റി ബെൻസേമ തുടങ്ങി. സമനിലയിൽ കളിയവസാനിച്ചുവെന്ന്​ തോന്നിയ ഘട്ടത്തിൽ കാസമീറോയെ കൂടെ കൂട്ടി ഫ്രഞ്ച്​ താരം വീണ്ടും ഗോൾ നേടി ടീമിനെ നിർണായക വിജയത്തിലേക്ക്​ നയിക്കുകയായിരുന്നു. ജയത്തോടെ തത്​കാലം രണ്ടാം സ്​ഥാനത്തേക്കുയർന്ന റയൽ ബാഴ്​സലോണയുടെ ഇന്നത്തെ കളി തീരും വരെയെങ്കിലും അതേ സ്​ഥാനത്ത്​ തുടരും. ബാഴ്​സക്ക്​ ഹുവസ്​കയാണ്​ എതിരാളികൾ.

തുടർച്ചയായ രണ്ടു സമനിലകളുടെ ആധിയിലാണ്​ ശനിയാഴ്ച റയൽ സ്വന്തം മൈതാനത്ത്​ ബൂട്ടുകെട്ടിയത്​. ആദ്യം ഗോൾ വീഴുക കൂടി ചെയ്​തതോടെ എല്ലാം കൈവിട്ടുവെന്ന്​ തോന്നിച്ചെങ്കിലും വെറ്ററൻ കരുത്ത്​ തുണച്ച്​ ടീം ജയം തൊടുകയായിരുന്നു.

മറ്റൊരു മത്സരത്തിൽ 10 പേരുമായി ചുരുങ്ങിയ ഗെറ്റാഫെയോട്​ ഒന്നാം സ്​ഥാനക്കാരായ അത്​ലറ്റികോഗോൾരഹിത സമനിലയിൽ കുരുങ്ങി. 27 കളികളിൽ അത്​ലറ്റിക്കോക്ക്​ 63 പോയിന്‍റാണ്​ സമ്പാദ്യം. റയൽ അത്രതന്നെ കളിച്ച്​ 57ഉം ബാഴ്​സ 26 മത്സരങ്ങളിൽ 56 ഉം പോയിന്‍റുമായി പിറകിലുണ്ട്​. 48 പോയിന്‍റുള്ള സെവിയ്യ നാലാമതാണ്​​.