ബാഴ്​സ- അത്​ലറ്റികോ കളിയിൽ ഗോളില്ലാ സമനില; ലാ ലിഗ റയലിനൊപ്പമാകുമോ?

മഡ്രിഡ്​: അനായാസ ജയവുമായി പട്ടികയിൽ ഒന്നാം സ്​ഥാനത്തെത്താമായിരുന്ന ബാഴ്​സലോണ വഴിയിൽ കലമുടച്ചപ്പോൾ അത്​ലറ്റി​ക്കോക്കെതിരെ ഗോൾരഹിത സമനില. ഇതോടെ ലാ ലിഗയിൽ കിരീട പോരാട്ടത്തിന്​ വീണ്ടും പൊള്ളും ചൂട്​. ഒരു കളി കുറച്ചുകളിച്ച റയൽ മൂന്നാം സ്​ഥാന​ത്താണെങ്കിലും ഒന്നാമതെത്താനും കിരീടം പിടിക്കാനും ടീമിനു തന്നെ നിലവിൽ സാധ്യത കൂടുതൽ.

ബാഴ്​സ- അത്​ലറ്റികോ കളിയുടെ ആദ്യ പകുതിയിൽ തിളങ്ങിയത്​ അത്​ലറ്റികോ തന്നെയായിരുന്നു. പരിക്കും ഫൗളും വേറിട്ടുനിന്ന കളിയിൽ അത്​ലറ്റികോ നീക്കങ്ങൾക്ക്​ മൂർച്ച കൂടുതലായിരുന്നുവെങ്കിലും ലക്ഷ്യത്തിലെത്തിക്കാനായില്ല. ഒരു തവണ ഒറ്റയാൾ നീക്കവുമായി മെസ്സി നിരവധി എതിർ താരങ്ങളെ ഡ്രിബിൾ ചെയ്​ത്​ വലയിലേക്കു പായിച്ചത്​ അത്​ലറ്റ​ികോ ഗോളി ഒബ്​ലാക്​ പണിപ്പെട്ട്​ രക്ഷപ്പെടുത്തി. രണ്ടാം പകുതിയിലും എണ്ണയിട്ട യന്ത്രം കണക്കെ അത്​ലറ്റികോ നിറഞ്ഞുനി​ന്നപ്പോൾ മറുവശത്ത്​, എല്ലാം പിഴച്ച്​ ബാഴ്​സ മുന്നേറ്റവും മധ്യനിരയും മൈതാനത്ത്​ ഉഴറിനടന്നു. അതിന​ിടെ ഗോളാക്കാമായിരുന്ന അവസരം പുറത്തേക്ക്​ ഹെഡ്​ ചെയ്​തുകളഞ്ഞ്​ ഡെംബലെ പിറക്കാമായിരുന്ന ഏക ഗോളും നിഷേധിച്ചു. നാലാമതുള്ള സെവിയ്യയുമായി ഇന്നത്തെ കളിയിൽ റയൽ ജയിച്ചാൽ ലീഡ്​ പിടിക്കും.

ജനുവരിയിൽ അത്​ലറ്റിക്കോയുമായി 13 പോയിന്‍റ്​ വരെ അകലമുണ്ടായിരുന്ന ബാഴ്​സ കളി അവസാനത്തിലേക്കു നീങ്ങു​േമ്പാൾ രണ്ടു പോയിന്‍റ്​ മാത്രം വ്യത്യാസമായി കുറച്ചതിന്‍റെ ആശ്വാസത്തിലാണ്​. ബാഴ്​സ വഴിയിലിട്ടപ്പോൾ കളംമാറി അത്​ലറ്റി​ക്കോക്കൊപ്പം ചേർന്ന സുവാരസ്​ പഴയ തട്ടകത്തിനെതിരെ കളം നിറയുന്നതിനും നൂകാമ്പ്​ സാക്ഷിയായി.