യുവേഫ ചാമ്പ്യൻസ്​ ലീഗ്: അത്​ലറ്റികോ മഡ്രിഡിനെ വീഴ്​ത്തി ലൈപ്​സിഷ്​ സെമിയിൽ

ലിസ്​ബൺ: കാളക്കൂറ്റ​െൻറ കരുത്തുമായാണ്​ ജർമൻ ഫുട്​ബാളിലേക്ക്​ ലൈപ്​സിഷി​െൻറ വരവ്​​. പരമ്പരാഗതമായി ആരാധകർ ഒാഹരി ഉടമസ്​ഥരായ വൻ ക്ലബുകളുടെ കൂട്ടത്തിലേക്ക്​, ഒരു സുപ്രഭാതത്തിലായിരുന്നു കോർപറേറ്റ്​ കമ്പനിയായ ​'റെഡ്​ബുളി​'​െൻറ സ്വന്തം ടീമായി ലൈപ്​സിഷ്​ പിറവിയെടുത്തത്​. ആ വരവ്​ കണ്ട്​ നെറ്റിചുളിച്ച യാഥാസ്​ഥിതിക ക്ലബ്​ ആരാധകരുടെ കൂട്ടത്തിൽ ബയേൺ മ്യുണികി​െൻറയും ഡോർട്​മുണ്ടി​െൻറയുമെല്ലാം ഇഷ്​ടക്കാരുണ്ടായിരുന്നു. എനർജി ഡ്രിങ്ക്​സ്​ കമ്പനിയുടെ ടീമായി 2009ൽ ​പിറന്നവർ, എട്ടുവർഷംകൊണ്ട്​ ജർമൻ ബുണ്ടസ്​ലിഗയിലെ സൂപ്പർ ടീമായി. ഇപ്പോഴിതാ, 11ാം വർഷത്തിൽ യുവേഫ ചാമ്പ്യൻസ്​ ലീഗി​െൻറ സെമിയിലും ഇടം ഉറപ്പിച്ചിരിക്കുന്നു. അതാവ​െട്ട കരുത്തരും യൂറോപ്യൻ കളിമുറ്റത്തെ​ പരിചയസമ്പന്നരുമായ അത്​ലറ്റികോ മഡ്രിഡിനെ 2-1ന്​ അട്ടിമറിച്ച്​ മിന്നുന്ന ജയത്തി​െൻറ അകമ്പടിയോടെയും.

സൂപ്പർ സബ്​ ആഡംസ്​

ലിസ്​ബണിലെ ജോസ്​ അൽവാഡെ സ്​റ്റേഡിയത്തിൽ നടന്ന ക്വാർട്ടർ ഫൈനലിൽ പ്രവചനങ്ങ​ളെല്ലാം ഡിഗോ സിമിയോണിയുടെ സംഘത്തിനൊപ്പമായിരുന്നു. ആറു വർഷത്തിനിടെ, രണ്ടുവട്ടം ചാമ്പ്യൻസ്​ ലീഗ്​ ഫൈനലിൽ വീണുപോയവർ, ഇക്കുറി നിലവിലെ ജേതാക്കളായ ലിവർപൂളിനെ അട്ടിമറിച്ച്​ വന്നപ്പോൾ കിരീട സാധ്യതയിലും മുന്നിലായിരുന്നു. 33കാരനായ ജൂലിയാൻ നാഗൽസ്​മാ​െൻറ ലൈപ്​സിഷിനാവ​െട്ട തിമോ​ വെർണറുടെ അസാന്നിധ്യത്തിൽ വിജസാധ്യതയും കൽപിച്ചില്ല.

പക്ഷേ, പന്തുരുണ്ട്​ തുടങ്ങിയപ്പോൾ കളി വേറെയായിരുന്നു. ഡീഗോ കോസ്​റ്റയും, മാർകോസ്​ ലോറ​െൻറയും ചേർന്ന്​ നടത്തിയ അത്​ലറ്റികോ മുന്നേറ്റത്തെ ലൈപ്​സിഷ്​ സമർഥമായി ചെറുത്തു. ക്യാപ്​റ്റൻ യൂസുഫ്​ പോൾസനെ സ്​ട്രൈക്കറാക്കി, ക്രിസ്​റ്റഫർ എൻകുൻകു, ഡാനി ഒാൽമോ, മാഴ്​സൽ സബിറ്റ്​സർ എന്നിവർ നടത്തിയ കൂട്ട ആക്രമണം അത്​ലറ്റികോ പ്രതിരോധത്തിൽ പലപ്പോഴും ആശങ്ക തീർത്തു. സെൻറർ ബാക്ക്​ ഡായറ്റ്​ ഉപമെകാനോയായിരുന്നു കളിയുടെ സംവിധായകൻ. പന്തുള്ളപ്പോഴും ഇല്ലാത്തപ്പോഴും ഫ്രഞ്ചുതാരം ലൈപ്​സിഷി​െൻറ കളി നിയന്ത്രിച്ചു.

ഗോൾരഹിതമായി പിരിഞ്ഞ ഒന്നാം പകുതിക്ക്​ ശേഷമായിരുന്നു ഗോളുകളുടെ പിറവി. 50ാം മിനിറ്റിൽ വിങ്ങിൽനിന്നും സബിറ്റ്​സർ നൽകിയ ​േക്രാസ്​ ബോക്​സിനുള്ളിൽ തലവെച്ച്​ ഡാനിയേൽ ഒൽമോ ഗോളാക്കിമാറ്റി. പോർചുഗൽ താരം ജോ ഫെലിക്​സ്​ പകരക്കാരനായി വന്നതോടെയാണ്​ അത്​ലറ്റികോക്ക്​ സമനില നേടാനായത്​. രണ്ട്​ മികച്ച നീക്കങ്ങളുമായി ​ലൈപ്​സിഷ്​ ഗോൾമുഖത്ത്​ ആശങ്കവിതച്ച ജോ ഫെലിക്​സ്​ 71 ാം മിനിറ്റിൽ ​േക്ലാസ്​റ്റർമാ​െൻറ ലാസ്​റ്റ്​മാൻ ഫൗളിന്​ വിധേയനായപ്പോൾ അത്​ലറ്റികോക്ക്​ അനുകൂലമായി പെനാൽറ്റി ലഭിച്ചു. കിക്കെടുത്ത ഫെലിക്​സ്​ അത്​ വലയിലെത്തിച്ച്​ സമനിലയൊരുക്കി.

സൂപ്പർ സബ്​ ടെയ്​ലർ ആഡംസ്​ ലൈപ്​സിഷി​െൻറ വിജയനായകനായി. 88ാം മിനിറ്റിൽ വിങ്ങിലൂടെ ആഞ്​ജലിനോ നടത്തിയ മുന്നേറ്റം, ബോക്​സിനുള്ളിലേക്ക്​ നീട്ടിനൽകിയപ്പോൾ പാകത്തിൽ ടെയ്​ലർ ആഡംസുണ്ടായിരുന്നു. അമേരിക്കൻ താരത്തി​െൻറ ഷോട്ട്​ ജോസ്​ ജിമിനസി​െൻറ ബൂട്ടിൽ തട്ടി തെറിച്ചപ്പോൾ അത്​ലറ്റികോ ഗോളി യാൻ ഒബ്ലാക്കി​െൻറ പൊസിഷനിങ്ങും തെറ്റിച്ച്​ ​വലയിലേക്ക്​.

സിറ്റി x ല്യോൺ ക്വാർട്ടർ ഇന്ന്​

ചാമ്പ്യൻസ്​ ലീഗിൽ ഇന്ന്​ മാഞ്ചസ്​റ്റർ സിറ്റി, ഒളിമ്പിക്​ ല്യോൺ പോരാട്ടം. റയൽ മഡ്രിഡിനെ ഇരു പാദങ്ങളിലും വീഴ്​ത്തിയാണ്​ സിറ്റിയുടെ ക്വാർട്ടർ ഫൈനൽ പ്രവേശം. ഒളിമ്പിക്​ ല്യോൺ ക്രിസ്​റ്റ്യാ​നോ റൊണാൾഡോയുടെ യുവൻറസിനെ​യാണ്​ തോൽപിച്ചത്​.