ജയത്തോടെ ഓസ്​ട്രിയ പ്രീക്വാർട്ടറിലേക്ക്​; യുക്രൈയ്​ന്​ കാത്തിരിപ്പ്​

ബുക്കറസ്​റ്റ്​: യുക്രൈയ്​നെ എതിരില്ലാത്ത ഒരു ഗോളിന്​ തോൽപിച്ച്​ ഓസ്​ട്രിയ യൂറോ കപ്പ്​ പ്രീ ക്വാർട്ടറിൽ. ആവേശകരമായ മത്സരത്തിൽ ക്രിസ്​റ്റോഫ്​ ബോംമ്​ഗാർട്​നർ നേടിയ ഏക ഗോളിലാണ്​ ഓസ്​ട്രിയയുടെ മുന്നേറ്റം. ഗ്രൂപ്​ 'സി'യിൽ രണ്ടാം ജയം നേടിയതോടെ ആറു പോയൻറുമായാണ്​ ഓസ്​ട്രിയ അവസാന 16ൽ എത്തിയത്​. മൂന്ന്​ പോയൻറുള്ള യുക്രൈയ്​ന്​ മികച്ച മൂന്നാം സ്​ഥാനക്കാരുടെ ആനുകൂല്യത്തിൽ പ്രീക്വാർട്ടർ കടക്കാനാവുമോയെന്നറിയാൻ കാത്തിരിക്കണം.

രണ്ടാം സ്​ഥാനത്തിനായുള്ള ഉഗ്രപോരാട്ടത്തിൽ മുഴുവൻ സന്നാഹവുമായാണ്​ യുക്രൈയ്​നും ഓസ്​ട്രിയയും കളത്തിലിറങ്ങിയത്​. അസിസ്​റ്റിലും സ്​കോറിങ്ങിലും കഴിവുതെളിയിച്ച യുക്രൈയ്​ൻ വിങ്ങർ ആൻഡ്രിലി യെർമോലെൻകോയാണ്​ ഓസ്​ട്രിയയുടെ പ്രതിരോധ പൂട്ട്​പൊട്ടിച്ച്​ തുടക്കം മുതലെ ആക്രമിച്ചു കളിച്ചത്​. വംശീയ അധിക്ഷേപത്തിന്​ ഒരു മത്സരം വിലക്ക്​ നേരിടേണ്ടിവന്ന സ്​ട്രൈക്കർ അർണോടോവിച്​ തിരിച്ചെത്തിയത്​ ഓസ്​ട്രിയൻ മുന്നേറ്റത്തിന്​ ഉണർവേകിയിരുന്നു.

ക്യാപ്​റ്റനും വിങ്ങറുമായി ഡേവിഡ്​ അലാബ നടത്തിയ നീക്കങ്ങൾ യുക്രൈയ്​ൻ ഗോൾ മുഖത്ത്​ അശാന്തി പടർത്തി. ​21ാം മിനിറ്റിൽ ഓസ്​ട്രിയ മുന്നിലെത്തി. അലാബയെടുത്ത കോർണർ കിക്കിന്​​ കാൽവെച്ച്​ അറ്റാക്കിങ്​ മിഡ്​ഫീൽഡർ ക്രിസ്​റ്റോഫ്​ ബോംമ്​ഗാർട്​നറാണ്​ ഗോൾ നേടിയത്​. ​എന്നാൽ, പത്തു മിനിറ്റിനകം താരം പരിക്കേറ്റ്​ പുറത്തുപോയത്​ ഓസ്​ട്രിയക്ക്​ തിരിച്ചടിയായി. ഒരു ഗോളിന്​ മുന്നിലെത്തിയിട്ടും ഓസ്​ട്രിയ പ്രതിരോധിക്കാൻ ശ്രമിച്ചില്ല. ആദ്യപകുതി അവസാനിക്കും വരെ പന്ത്​ കൈവശം വെച്ച്​ മുന്നേറി.

രണ്ടാം പകുതി തന്ത്രങ്ങൾ മാറ്റിയിറങ്ങിയ ഉക്രൈയ്​നായിരുന്നു മൂർച്ച കൂടുതൽ. തിരിച്ചുവരാൻ കളി വേഗത്തിലാക്കിയ അവർക്ക്​ രണ്ടാം പകുതിയുടെ പത്തുമിനിറ്റിനിടെ തന്നെ നിരവധി അവസരങ്ങൾ ലഭിച്ചു. 60ാം മിനിറ്റിലെ ഫ്രീകിക്ക്​ അപകടംവിതച്ച്​ പോസ്​റ്റിലേക്ക്​ പ​ന്തെത്തിയെങ്കിലും ഓസ്​ട്രിയൻ ഗോൾ കീപ്പർ ഡാനിയൽ ബാച്ച്​മാൻ തട്ടിമാറ്റി. ഒടുവിൽ മത്സരത്തിലേക്ക്​ തിരിച്ചെത്തിയ ഓസ്​ട്രിയ കളംവാണതോടെ യുക്രൈയ്​ൻ തോൽവി സമ്മതിച്ചു.