കോപ ഡെൽ റേയിൽ നിന്ന് ബാഴ്സലോണ പുറത്ത്; അത്ലറ്റിക് ബിൽബാവോയുടെ ജയം 4-2 ന്

സ്പാനിഷ് കോപ ഡെൽ റേ ക്വാർട്ടർ ഫൈനലിലെ ത്രില്ലർ പോരിനൊടുവിൽ ബാഴ്സിലോണയെ തകർത്ത് അത്ലറ്റിക് ബിൽബാവോ സെമിഫൈനലിൽ പ്രവേശിച്ചു. എക്സ്ട്രാ ടൈമിലേക്ക് നീണ്ട മത്സരത്തിൽ രണ്ടിനെതിരെ നാല് ഗോളിന്റെ (4-2) കനത്ത തോൽവി ഏറ്റുവാങ്ങിയാണ് ബാഴ്സലോണ പുറത്തായത്.

അത്ലറ്റിക് തട്ടകമായ സാൻമെമ്സിൽ മത്സരം തുടങ്ങി ആദ്യ മിനിറ്റിൽ തന്നെ ബിൽബാവോ ലീഡെടുത്തു. സ്ട്രൈക്കർ ഗോർക്ക ഗുരുസെറ്റയാണ് ഗോൾ നേടിയത്. 26ാം മിനിറ്റിൽ ലെവൻഡോസ്കിയുടെ ഗോളിലൂടെ ലിവർപൂൾ മറുപടി (1-1) നൽകി. 32ാം മിനിറ്റിൽ തകർപ്പൻ ഗോളിലൂടെ യുവതാരം ലാമിൻ യമാൽ ബാഴ്സയെ മുന്നിലെത്തിച്ചു (2-1).

എന്നാൽ രണ്ടാം പകുതിയുടെ തുടക്കത്തിൽ 49ാം മിനിറ്റിൽ ഒയിഹാൻ സാൻസെറ്റിലൂടെ അത്ലറ്റിക് ബിൽബാവോ സമനില പിടിച്ചു(2-2). കളി എക്സ്ട്രാ ടൈമിലേക്ക് നീങ്ങിയതോടെ കളി ബാഴ്സയുടെ കയ്യിൽ നിന്ന് പോയി. 105 മിനിറ്റിൽ ഇനാക്കി വില്യംസും കളിതീരാൻ സെക്കൻഡുകൾ മാത്രം ശേഷിക്കെ നികൊ വില്യംസും ഗോൾ നേടിയതോടെ ബാഴ്സയുടെ പതനം പൂർണമായി.