ഗോളിൽ ആറാടി ജർമനി, സ്​പെയിൻ, പോളണ്ട്​ ടീമുകൾ; ഇറ്റലിക്ക്​ വീണ്ടും സമനിലക്കുരുക്ക്​

യൂറോപ്പിൽ ലോകകപ്പ്​ യോഗ്യത റൗണ്ട്​ മത്സരങ്ങളിൽ ജർമനി, സ്​പെയിൻ, പോളണ്ട്, ബെൽജിയം​ ടീമുകൾക്ക്​ വമ്പൻ ജയം. അർമേനിയയെ 6-0ത്തിന്​ ഗോളിൽ മുക്കിയാണ്​ ജർമനി ജയം ആഘോഷിച്ചത്​. സ്​പെയിൻ എതിരില്ലാത്ത നാല്​ ഗോളുകൾക്ക്​ ജോർജിയയെ തകർത്തു.

ജർമനിക്കായി സെർജ്​ നാബ്രി (6, 15) ഇരട്ടഗോൾ നേടി. മാർകോ റീയസ്​ (35), തിമോ വെർണർ (44), ജൊനാസ്​ ഹോഫ്​മാൻ (52), കരിം അഡിയാമി (90) എന്നിവരാണ്​ ജർമനിയുടെ മറ്റ്​ സ്​കോറർമാർ. ഗ്രൂപ്പ്​ ജെയിലെ മറ്റൊരു മത്സരത്തിൽ റൊമാനിയ ലിക്​റ്റൻസ്​റ്റെനിനെ 2-0ത്തിന്​ തോൽപിച്ചു. അഞ്ച്​ മത്സരങ്ങളിൽ നിന്ന്​ 12 പോയിന്‍റുമായി ജർമനി ഗ്രൂപ്പിൽ ഒന്നാമതെത്തി. 10 പോയിന്‍റുമായി അർമേനിയ രണ്ടാമതാണ്​.

കഴിഞ്ഞ ദിവസം സ്വീഡനിൽ നിന്നേറ്റ അപ്രതീക്ഷിത തോൽവിയിൽ നിന്ന്​ ഉയിർത്തെഴുന്നേൽക്കുകയായിരുന്നു സ്​പെയിൻ. ഹോസെ ഗയ, കാർലോസ്​ സോളർ, ഫെറാൻ ടോറസ്​, പാബ്ലോ സറാബിയ എന്നിവർ സ്​പെയിനിനായി ലക്ഷ്യം കണ്ടു. ഗ്രൂപ്പ്​ ബിയിലെ മറ്റൊരു മത്സരത്തിൽ കൊസോവോയും ഗ്രീസും 1-1ന്​ സമനിലയിൽ പിരിഞ്ഞു.

അഞ്ച്​ മത്സരങ്ങളിൽ നിന്ന്​ 10 പോയിന്‍റുമായി സ്​പെയിൻ ഗ്രൂപ്പ്​ ബിയിൽ ഒന്നാമതെത്തി. രണ്ട്​ മത്സരങ്ങൾ കുറച്ച്​ കളിച്ച സ്വീഡൻ ഒമ്പത്​ പോയിന്‍റുമായി രണ്ടാമതുണ്ട്​.

ഗ്രൂപ്പ്​ ഇയിൽ ബെൽജിയം കരുത്തരായ ചെക്ക്​ റിപബ്ലിക്കിനെ 3-0ത്തിന്​ തോൽപിച്ചു. റൊമേലു ലുക്കാക്കു (8), ഏഡൻ ഹസാഡ്​ (41), അലക്​സിസ്​ (65) എന്നിവരാണ്​ ബെൽജിയത്തിനായി വലകുലുക്കിയത്​. ബെൽജിയം ജഴ്​സിയിലെ 100ാം മത്സരത്തിലാണ്​ ലുക്കാക്കു സ്​കോർ ചെയ്​തത്​. താരത്തിന്‍റെ 67ാം ഗോളായിരുന്നു അത്​. അഞ്ച്​​ മത്സരങ്ങളിൽ നിന്ന്​ 13 പോയിന്‍റുമായി ഗ്രൂപ്പ് ഇയിൽ ബെൽജിയം ബഹുദൂരം മുന്നിലെത്തി. ഏഴ്​ പോയിന്‍റുമായി ചെക്കാണ്​ രണ്ടാമത്​. ​

തുടർച്ചയായ 36 മത്സരങ്ങളിൽ പരാജയം അറിയാതെ ഇറ്റലി ലോക റെക്കോർഡ് നേട്ടത്തിൽ ബ്രസീൽ, സ്പെയിൻ ടീമുകളെ പിന്തള്ളി. ഗ്രൂപ്പ്​ സിയിൽ സ്വിറ്റ്​സർലൻഡാണ്​ യൂറോപ്യൻ ചാമ്പ്യൻമാരെ സമനിലയിൽ തളച്ചത്​. മത്സരത്തിൽ ഇറ്റാലിയൻ താരം ജോർജീന്യോ പെനാൽറ്റി പാഴാക്കി. ലോകകപ്പ്​ യോഗ്യത റൗണ്ടിൽ ഇറ്റലിയുടെ തുടർച്ചയായ രണ്ടാം സമനിലയാണിത്​. അഞ്ച്​ മത്സരത്തിൽ നിന്ന്​ 11 പോയിന്‍റുമായി ഇറ്റലി തന്നെയാണ്​ ഗ്രൂപ്പിൽ ഒന്നാമത്​. മൂന്ന്​ കളികളിൽ നിന്ന്​ ഏഴ്​ ​പോയിന്‍റുമായി സ്വിറ്റ്​സർലൻഡ്​ രണ്ടാമതാണ്​.

ഗ്രൂപ്പ്​ ഐയിൽ പോളണ്ട് സാൻ മറീനോയെ 7-1ന്​ തകർത്തു. ആദം ബുക്സ ഹാട്രിക് നേടിയ മത്സരത്തിൽ റോബർട്ട് ലെവഡോസ്കി ഇരട്ടഗോളുകളും ആയി തിളങ്ങി. കരോൾ സ്വിഡ്റസ്കി, കരോൾ ലിനറ്റി എന്നിവരാണ് പോളണ്ടിന്‍റെ മറ്റു സ്​കോറർമാർ. ഇംഗ്ലണ്ട്​ (അഞ്ച്​ മത്സരങ്ങളിൽ നിന്ന്​ 15 പോയിന്‍റ്​) മുമ്പൻമാരായ ഗ്രൂപ്പിൽ പോളണ്ട്​ രണ്ടാമതാണ്​.