'ഫുട്​ബാൾ ചരിത്രത്തിലെ കറുത്ത ദിനം'; ദിമിത്രി പായെറ്റിനെ കുപ്പി കൊണ്ട്​ എറിഞ്ഞിട്ടു, മത്സരം ഉപേക്ഷിച്ചു - വിഡിയോ

ഫ്രഞ്ച്​ ഫുട്​ബാളിൽ കാണികളുടെ ഭാഗത്തുനിന്നുണ്ടാകുന്ന ആക്രമണങ്ങളെ തുടർന്ന് വീണ്ടും​ മത്സരം ഉപേക്ഷിച്ചു. ഞായറാഴ്ച നടന്ന ലിയോണും മാഴ്സെയും തമ്മിലുള്ള ലീഗ് 1 മത്സരമാണ്​ ഉപേക്ഷിച്ചത്​. ഫ്രഞ്ച്​ താരവും മാഴ്​സെ ക്യാപ്​റ്റനുമായ ദിമിത്രി പായെറ്റാണ്​ കുപ്പി കൊണ്ടുള്ള ഏറിൽ പരിക്കേറ്റത്​.

കളിയുടെ അഞ്ചാം മിനിറ്റിലാണ്​ സംഭവം. താരം കോർണർ എടുക്കാൻ ശ്രമിക്കുന്നതിനിടെ തലയിൽ കുപ്പി വന്ന്​ വീഴുകയായിരുന്നു. ഇതോടെ താരം നിലത്തുവീണു. തുടർന്ന്​ മെഡിക്കൽ സംഘമെത്തി ഗ്രൗണ്ടിന്​ പുറത്തേക്ക്​ കൊണ്ടുപോയി. കൂടാ​െത ഇരു ടീമിലെയും കളിക്കാർ ഡ്രസ്സിങ്​ റൂമിലേക്ക്​ മടങ്ങി.

90 മിനിറ്റ്​ കാത്തുനിന്ന​ ശേഷം മത്സരം പുനരാരംഭിക്കാൻ തീരുമാനിക്കുകയും ലിയോൺ താരങ്ങൾ ​ഗ്രൗണ്ടിലിറങ്ങുകയും ചെയ്​തു. എന്നാൽ, എതിർ ടീം ഗ്രൗണ്ടിലിറങ്ങാത്തതിനാൽ ഇവർ മടങ്ങി.

കളിക്കാരുടെ സുരക്ഷ ഉറപ്പില്ലാത്തതിനാൽ മത്സരം പുനരാരംഭിക്കേണ്ടതില്ലെന്ന് റഫറി തീരുമാനിച്ചതായി സ്റ്റേഡിയം അനൗൺസർ അറിയിച്ചു. മത്സരം പുനരാരംഭിക്കാനുള്ള തീരുമാനത്തിൽ ഖേദിക്കുന്നതായി ഫ്രഞ്ച് ലീഗ് അധികൃതർ പറഞ്ഞു. എൽ.എഫ്​.പയുടെ അച്ചടക്ക സമിതി തിങ്കളാഴ്ച അടിയന്തര യോഗം ചേരും. സ്‌റ്റേഡിയത്തിലെ സെക്യൂരിറ്റി ക്യാമറകളിൽനിന്ന് തിരിച്ചറിഞ്ഞശേഷം ഒരാളെ അറസ്റ്റ് ചെയ്തതായി പൊലീസ് പറഞ്ഞു.

ഫുട്​ബാൾ ചരിത്രത്തിലെ കറുത്ത ദിനമാണെന്നാണ്​​​ മാഴ്​സെ പ്രസിഡന്‍റ്​ പാബ്ലോ ലോംഗോറിയ വിശേഷിപ്പിച്ചത്​. 'ദിമിത്രിയെ ഇത്​ മാനസികമായി ബാധിച്ചു. ഇത് അസാധാരണ സംഭവമാണ്​. ഏത് തരത്തിലുള്ള അക്രമത്തെയും അപലപിക്കുന്നു. ഇത് എല്ലാവരേയും ബാധിക്കുന്നുണ്ട്​. ഫുട്ബാൾ ഇഷ്ടപ്പെടുന്ന ആർക്കും ഈ രാത്രി സന്തോഷിക്കാനാവില്ല. അദ്ദേഹത്തിനേറ്റ ആഘാതം ഗൗരവതരമാണ്​' -അദ്ദേഹം പറഞ്ഞു.

ഈ സീസണിൽ രണ്ടാം തവണയാണ്​ പാ​െയറ്റിന്​ നേരെ ആക്രമണമുണ്ടാകുന്നത്​. ആഗസ്റ്റിൽ മാഴ്സെയും നീസും തമ്മിലെ മത്സരത്തിനിടെയാണ് ഇതിനു മുമ്പ്​ പായെറ്റിനെ ലക്ഷ്യമിട്ട് ഗാലറിയിൽനിന്ന് കുപ്പിയേറുണ്ടായത്. അന്ന് പായെറ്റ് കുപ്പിയെടുത്ത് ഗാലറിയിലേക്ക് തിരികെയെറിഞ്ഞതോടെ പ്രകോപിതരായ കാണികൾ ഗ്രൗണ്ടിലിറങ്ങി.

പിന്നീട്​ മത്സരം ഉപേക്ഷിച്ചതിനെ തുടർന്ന് നീസിന്‍റെ രണ്ടു പോയിന്‍റ്​ വെട്ടിക്കുറച്ചാണ് ഫ്രഞ്ച് ഫുട്​ബാൾ അധിക‍ൃതർ പ്രശ്നം പരിഹരിച്ചത്. ഗാലറിയിലേക്ക് കുപ്പി തിരികെയെറിഞ്ഞ് പ്രകോപനം സൃഷ്ടിച്ചതിന് ദിമിത്രി പായെറ്റിന് ഒരു മത്സരത്തിൽനിന്ന് വിലക്കും ഏർപ്പെടുത്തി.