ജാംഷഡ്​പൂരിനെതിരെ കേരള ബ്ലാസ്​റ്റേഴ്​സിന്​ സമനില

വാസ്​കോ: ഐ.എസ്​.എല്ലിൽ ഹാട്രിക്​ ജയം തേടിയിറങ്ങിയ കേരള ബ്ലാസ്​റ്റേഴ്​സിന്​ സമനില. കരുത്തരായ ജാംഷഡ്​പൂർ എഫ്​.സിയോടാണ്​ ബ്ലാസ്​റ്റേഴ്​സ്​ 1-1 സമനില നേടിയത്​. എട്ടു കളികളിൽ 13 പോയന്‍റ്​ വീതമുള്ള ജാംഷഡ്​പൂരും ബ്ലാസ്​റ്റേഴ്​സും രണ്ടും മൂന്നും സ്ഥാനത്തേക്ക്​ കയറി.

ഗോൾശരാശരി തുല്യമാണെങ്കിലും അടിച്ച ഗോളുകളിലെ നേരിയ മുൻതൂക്കമാണ്​ ജാംഷഡ്​പൂരിന്​ രണ്ടാം സ്ഥാനം നൽകിയത്​. ഏഴു മത്സരങ്ങളിൽ 15 പോയന്‍റുള്ള നിലവിലെ ജേതാക്കളായ മുംബൈ സിറ്റിയാണ്​ മുന്നിൽ.

14ാം മിനിറ്റിൽ ഗ്രെഗ്​ സ്റ്റുവാർട്ടിന്‍റെ മനോഹരമായ ഫ്രീകിക്ക്​ ഗോളിൽ മുന്നിൽ കടന്ന ജാംഷഡ്​പൂരിനെ മലയാളി താരം സഹൽ അബ്​ദുസ്സമദാണ്​ ടൂർണമെന്‍​റിലെ നാലാം ഗോളുമായി 27ാം മിനിറ്റിൽ തളച്ചത്​. സ്പാനിഷ്​ താരം അൽവാരോ വസ്ക്വസിന്‍റെ ഒറ്റക്കുള്ള മുന്നേറ്റത്തിൽനിന്നുള്ള ഷോട്ട്​ ജാംഷഡ്​പൂരിന്‍റെ മലയാളി ഗോൾകീപ്പർ ടി.പി. രഹ്​നേഷ്​ തടുത്തിട്ടത്​ ലക്ഷ്യത്തിലെത്തിക്കുകയായിരുന്നു സഹൽ.

മുംബൈക്കും ചെന്നൈയിനുമെതിരായ 3-0 വിജയങ്ങളിലെ താളവും ഒഴുക്കും നിലനിർത്താനാവാതെ പോയ ബ്ലാസ്​റ്റേഴ്​സിന്​ അതിനാൽ തന്നെ കാര്യമായ ഗോളവസരങ്ങൾ സൃഷ്ട്​ടിക്കാനായതുമില്ല. അതിന്​ ജാംഷഡ്​പൂർ ബ്ലാസ്​റ്റേഴ്​സിനെ അനുവദിച്ചില്ലെന്ന്​ പറയുന്നതാവും ശരി.

കഴിഞ്ഞ കളികളിൽ കേരള നിര പുറത്തെടുത്ത ഹൈപ്രസിങ്​ ഗെയിം അതേനാണയത്തിൽ എതിരാളികളു​ം നടപ്പാക്കിയപ്പോൾ ഇവാൻ വുകോമാനോവിചിന്‍റെ ടീം വിയർത്തു. എന്നാൽ, അതിനിടയിലും സമനില ഗോൾ സ്​കോർ ചെയ്യുകയും എതിരാളികളെ പിന്നീട്​ ഗോളടിക്കാൻ അനുവദിക്കാതിരിക്കുകയും ചെയ്ത്​ ബ്ലാസ്​റ്റേഴ്​സ്​ കരുത്തുകാട്ടി.

അതിനിടെ, ബോക്സിൽ ജാംഷഡ്​പൂർ ഡിഫൻഡറുടെ​ കൈയിൽ പന്ത്​ തട്ടിയതിനുള്ള അർഹമായ പെനാൽറ്റി റഫറി അനുവദിച്ചതുമില്ല. അടുത്ത ഞായറാഴ്ച എഫ്​.സി ഗോവക്കെതിരെയാണ്​ ബ്ലാസ്​റ്റേഴ്​സിന്‍റെ അടുത്ത മത്സരം.