അ​വ​സാ​ന ലീ​ഗ് മ​ത്സ​ര​ത്തി​ൽ ബ്ലാ​സ്റ്റേ​ഴ്സ് ഇ​ന്ന് ഹൈ​ദ​രാ​ബാ​ദി​നെ​തി​രെ

ഹൈ​ദ​രാ​ബാ​ദ്: ഐ.​എ​സ്.​എ​ൽ ലീ​ഗ് റൗ​ണ്ടി​ൽ കേ​ര​ള ബ്ലാ​സ്റ്റേ​ഴ്സി​ന് ഇ​ന്ന് സ​മാ​പ​ന മ​ത്സ​രം. പോ​യ​ന്റ് പ​ട്ടി​ക​യി​ൽ അ​വ​സാ​ന സ്ഥാ​നം എ​ന്നോ ഉ​റ​പ്പി​ച്ച ഹൈ​ദ​രാ​ബാ​ദ് എ​ഫ്.​സി​യാ​ണ് എ​തി​രാ​ളി​ക​ൾ. ഇ​തി​ന​കം പ്ലേ ​ഓ​ഫി​ൽ ക​ട​ന്ന മ​ഞ്ഞ​പ്പ​ട​യു​ടെ അ​ഞ്ചാം സ്ഥാ​നം മാ​റാ​നു​ള്ള സാ​ഹ​ച​ര്യ​മി​ല്ല.

ജ​യം പാ​ടെ മ​റ​ക്കു​ക​യും തു​ട​ർ​ച്ച​യാ​യ തോ​ൽ​വി​ക​ൾ ഏ​റ്റു​വാ​ങ്ങു​ക​യും ചെ​യ്യു​ന്ന ബ്ലാ​സ്റ്റേ​ഴ്സി​ന് നോ​ക്കൗ​ട്ട് മ​ത്സ​ര​ത്തി​നി​റ​ങ്ങാ​ൻ ആ​ത്മ​വി​ശ്വാ​സം വീ​ണ്ടെ​ടു​ക്കേ​ണ്ട​തു​ണ്ട്. സീ​സ​ണി​ൽ അ​തി​ദ​യ​നീ​യ പ്ര​ക​ട​നം ന​ട​ത്തി ഒ​രു ക​ളി മാ​ത്രം ജ​യി​ച്ച ടീ​മാ​ണ് ഹൈ​ദ​രാ​ബാ​ദ്. ഇ​രു ടീ​മും 21 മ​ത്സ​ര​ങ്ങ​ൾ വീ​തം ക​ളി​ച്ച​പ്പോ​ൾ ‍യ​ഥാ​ക്ര​മം 30ഉം ​എ​ട്ടും പോ​യ​ന്റാ​ണു​ള്ള​ത്.

സൂ​പ്പ​ർ ക​പ്പ് ഇ​ട​വേ​ള​ക്കാ​യി ഐ.​എ​സ്.​എ​ൽ നി​ർ​ത്തു​മ്പോ​ൾ പോ​യ​ന്റ് പ​ട്ടി​ക​യി​ൽ ഒ​ന്നാം സ്ഥാ​ന​ത്താ​യി​രു​ന്നു ബ്ലാ​സ്റ്റേ​ഴ്സ്. സൂ​പ്പ​ർ ക​പ്പി​ൽ തു​ട​ങ്ങി​യ തോ​ൽ​വി പി​ന്നെ ടീ​മി​നെ വി​ട്ടു​പോ​യി​ല്ല. ഒ​രു​വേ​ള പ്ലേ ​ഓ​ഫ് സാ​ധ്യ​ത പോ​ലും അ​പ​ക​ട​ത്തി​ലാ​യി. പ​രി​ക്കു​ക​ളാ​ണ് ഏ​റ്റ​വും വ​ലി​യ തി​രി​ച്ച​ടി​യാ​യ​ത്. ക്യാ​പ്റ്റ​ൻ അ​ഡ്രി​യാ​ൻ ലൂ​ണ തു​ട​ങ്ങി പ്ര​മു​ഖ​രാ​യ അ​ര ഡ​സ​നി​ല​ധി​കം താ​ര​ങ്ങ​ൾ ഇ​ട​ക്ക് ടീം ​വി​ട്ടു.

ചി​ല​ർ തി​രി​ച്ചു​വ​ന്നെ​ങ്കി​ലും പ​രി​ക്കു​ണ്ടാ​ക്കി​യ ക്ഷീ​ണം ടീ​മി​നെ വി​ട്ടു​പോ​യി​ല്ല. മു​ന്നേ​റ്റ​ത്തി​ലെ ക​രു​ത്തും ഗോ​ള​ടി വീ​ര​നു​മാ​യ ദി​മി​ത്രി​യോ​സ് ഡ​യ​മ​ന്റ​കോ​സ് കൂ​ടി പ​രി​ക്കി​ന്റെ പി​ടി​യി​ലാ​യ​തോ​ടെ ബ്ലാ​സ്റ്റേ​ഴ്സ് സം​ഘം തീ​ർ​ത്തും ദു​ർ​ബ​ല​മാ​യി​രി​ക്കു​ക​യാ​ണ്. ഹൈ​ദ​രാ​ബാ​ദി​നെ​തി​രെ​യും ദി​മി ക​ളി​ക്കി​ല്ലെ​ന്ന് പ​രി​ശീ​ല​ക​ൻ ഇ​വാ​ൻ വു​കു​മ​നോ​വി​ച് വ്യ​ക്ത​മാ​ക്കി​ക്ക​ഴി​ഞ്ഞു. പ്ലേ ​ഓ​ഫി​നും താ​രം ഉ​ണ്ടാ​വു​മോ​യെ​ന്ന് വു​കു​മ​നോ​വി​ച് ഉ​റ​പ്പി​ച്ച പ​റ​യു​ന്നി​ല്ല.

ഫി​റ്റ്ന​സ് വീ​ണ്ടെ​ടു​ത്ത ലൂ​ണ കു​റ​ച്ചു​നാ​ളാ​യി ടീ​മി​നൊ​പ്പം ഉ​ണ്ട്. ഹൈ​ദ​രാ​ബാ​ദി​നെ​തി​രാ​യ മ​ത്സ​ര​ത്തി​ൽ അ​ൽ​പ​സ​മ​യം ലൂ​ണ​യെ ഇ​റ​ക്കാ​ൻ ആ​ലോ​ച​ന​യു​ണ്ടെ​ങ്കി​ലും ഇ​തി​ന​കം മൂ​ന്ന് മ​ഞ്ഞ​ക്കാ​ർ​ഡു​ക​ൾ അ​ക്കൗ​ണ്ടി​ലു​ള്ള​തു കൂ​ടി ക​ണ​ക്കി​ലെ​ടു​ക്ക​ണ​മെ​ന്ന് വു​കു​മ​നോ​വി​ച് പ​റ​ഞ്ഞു.

ലാ​റ ശ​ർ​മ‍യാ​യി​രി​ക്കും ബ്ലാ​സ്റ്റേ​ഴ്സി​ന്റെ ഗോ​ൾ​വ​ല കാ​ക്കു​ക. സീ​സ​ൺ തു​ട​ങ്ങി മാ​സ​ങ്ങ​ൾ​ക്കു​ശേ​ഷം മാ​ർ​ച്ച് ഒ​മ്പ​തി​ന് ചെ​ന്നൈ​യി​ൻ എ​ഫ്.​സി​ക്കെ​തി​രാ​യ എ​വേ മാ​ച്ചി​ലാ​ണ് ഹൈ​ദ​രാ​ബാ​ദ് ജ​യി​ക്കു​ന്ന​ത്. ഈ ​ജ​യ​വും അ​ഞ്ച് സ​മ​നി​ല​യും 15 തോ​ൽ​വി​യു​മാ​ണ് സ​മ്പാ​ദ്യം.

പ്ലേ ​ഓ​ഫ് 19 മു​ത​ൽ; ഫൈ​ന​ൽ മേ​യ് നാ​ലി​ന്

മും​ബൈ: ഇ​ന്ത്യ​ൻ സൂ​പ്പ​ർ ലീ​ഗ് 2023-24 സീ​സ​ൺ ഫൈ​ന​ൽ മ​ത്സ​രം മേ​യ് നാ​ലി​ന് ന​ട​ക്കും. വേ​ദി​യു​ടെ കാ​ര്യ​ത്തി​ൽ തീ​രു​മാ​ന​മാ​യി​ട്ടി​ല്ല. പ്ലേ ​ഓ​ഫ് മ​ത്സ​ര​ങ്ങ​ൾ ഏ​പ്രി​ൽ 19, 20 ദി​വ​സ​ങ്ങ​ളി​ലും ന​ട​ക്കും. 23നും 24​നു​മാ​ണ് സെ​മി ഫൈ​ന​ൽ ഒ​ന്നാം പാ​ദം. ര​ണ്ടാം പാ​ദം 28നും 29​നും അ​ര​ങ്ങേ​റും.

അ​തേ​സ​മ​യം, ആ​റാം ടീ​മാ​യി ചെ​ന്നൈ​യി​ൻ എ​ഫ്.​സി നോ​ക്കൗ​ട്ടി​ൽ ക​ട​ന്നു. സാ​ധ്യ​ത‍യു​ണ്ടാ​യി​രു​ന്ന ഈ​സ്റ്റ് ബം​ഗാ​ൾ അ​വ​സാ​ന മ​ത്സ​ര​ത്തി​ൽ പ​ഞ്ചാ​ബ് എ​ഫ്.​സി​യോ​ട് 1-4ന് ​തോ​റ്റ​തോ​ടെ​യാ​ണ് 21 ക​ളി​ക​ളി​ൽ 27 പോ‍യ​ന്റു​മാ​യി ചെ​ന്നൈ​യി​ൻ പ്ര​വേ​ശി​ച്ച​ത്. 22 മ​ത്സ​ര​ങ്ങ​ളി​ൽ 24 പോ​യ​ന്റു​മാ​യി ബം​ഗാ​ൾ സം​ഘം പു​റ​ത്താ​യി.

മും​ബൈ സി​റ്റി, മോ​ഹ​ൻ ബ​ഗാ​ൻ, എ​ഫ്.​സി ഗോ​വ, ഒ​ഡി​ഷ എ​ഫ്.​സി, കേ​ര​ള ബ്ലാ​സ്റ്റേ​ഴ്സ് എ​ന്നി​വ​യാ​ണ് ഇ​തി​ന​കം മു​േ​ന്ന​റി​യ​ത്. ആ​ദ്യ ര​ണ്ട് സ്ഥാ​ന​ക്കാ​ർ നേ​രി​ട്ട് സെ​മി​യി​ലെ​ത്തും. മൂ​ന്ന് മു​ത​ൽ ആ​റ് വ​രെ സ്ഥാ​ന​ക്കാ​രി​ൽ ര​ണ്ട് ടീ​മു​ക​ൾ കൂ​ടി ക​ട​ക്കും. നാ​ലും അ​ഞ്ചും സ്ഥാ​ന​ക്കാ​രും മൂ​ന്നും ആ​റും സ്ഥാ​ന​ക്കാ​രും ത​മ്മി​ലാ​ണ് പ്ലേ ​ഓ​ഫ് മ​ത്സ​ര​ങ്ങ​ൾ ന​ട​ക്കു​ക. ക​ട​ന്ന​വ​ർ​ക്കെ​ല്ലാം ലീ​ഗ് റൗ​ണ്ടി​ൽ ഓ​രോ ക​ളി അ​വ​ശേ​ഷി​ക്കു​ന്ന സാ​ഹ​ച​ര്യ​ത്തി​ൽ സ്ഥാ​ന​ങ്ങ​ളി​ൽ മാ​റ്റ​മു​ണ്ടാ​വും. ഇ​ത​നു​സ​രി​ച്ചാ​വും നോ​ക്കൗ​ട്ട് വേ​ദി​ക​ളും തീ​രു​മാ​നി​ക്കു​ക.