ബ്ലൈൻഡ് ഫുട്ബാൾ പ്രീമിയർ ലീഗ്: കാലിക്കറ്റ് എഫ്.സി ജേതാക്കൾ

കൊച്ചി: പ്രഥമ കേരള ബ്ലൈൻഡ് ഫുട്ബാൾ പ്രീമിയർ ലീഗിൽ കാലിക്കറ്റ് എഫ്.സി ജേതാക്കളായി. ഫൈനലിൽ പെനാൽറ്റി ഷൂട്ടൗട്ടിൽ എതിരില്ലാത്ത ഒരു ഗോളിന് ചാലഞ്ച്​ എഫ്.സി ട്രിവാൻഡ്രത്തെ തോൽപിച്ചായിരുന്നു കാലിക്കറ്റ് എഫ്.സിയുടെ കിരീടനേട്ടം. കടവന്ത്ര ഗാമ ഫുട്ബാൾ അരീനയിൽ നടന്ന ചാമ്പ്യൻഷിപ്പിൽ ദർശന കിങ്സ് തൃശൂർ, യുനൈറ്റഡ് എഫ്.സി പാലക്കാട് എന്നിവയായിരു​ന്നു മറ്റ്​ ടീമുകൾ.

ഫൈനലിനുമുമ്പ്​ വനിത ടീമുകളുടെ പ്രദർശന മത്സരവും അരങ്ങേറി. സമാപനച്ചടങ്ങിൽ ഭിന്നശേഷി ഫുട്ബാൾ ഫെസ്റ്റിവലിന്‍റെ ഭാഗമായി വിവിധ വിഭാഗത്തിൽപെട്ട ഭിന്നശേഷിക്കാരായ ഫുട്ബാൾ കളിക്കാർ തമ്മിലെ സൗഹൃദ മത്സരവും നടന്നു.

കേരള ബ്ലൈൻഡ് ഫുട്ബാൾ ഫെഡറേഷൻ, എസ്​.ആർ.വി.സി, റീന മെമ്മോറിയൽ സംരക്ഷണ സ്‌പെഷൽ സ്കൂൾ എന്നിവയുടെ സംയുക്ത ആഭിമുഖ്യത്തിലാണ് കേരള ബ്ലൈൻഡ് ഫുട്ബാൾ പ്രീമിയർ ലീഗും പാൻ ഡിഫ്രൻഡ്​ലി ഏബിൾഡ് ഫുട്ബാൾ ഫെസ്റ്റിവലും നടത്തിയത്.

ടൂർണമെന്‍റിലെ മികച്ച കളിക്കാരനായി വിജയ് പൻജാമി (ചാലഞ്ച്​ എഫ്.സി ട്രിവാൻഡ്രം), മികച്ച ഗോൾ കീപ്പറായി ടി. മുഹമ്മദ് ഷുഹൈബ് (ചാലഞ്ച്​ എഫ്.സി ട്രിവാൻഡ്രം), എമേർജിങ് പ്ലയറായി കെ.ബി. അബിൻ (കാലിക്കറ്റ് എഫ്.സി) എന്നിവർ തെരഞ്ഞെടുക്കപ്പെട്ടു.