ഒമ്പതാം ബുണ്ടസ്​ ലിഗ കിരീടം 'തൊട്ട്​' ബയേൺ; എന്നിട്ടും ക്ലബിൽ തുടരാൻ നിൽക്കാതെ കോച്ച്​ ഫ്ലിക്ക്​ മടങ്ങുന്നു

മ്യൂണിക്ക്​: കപ്പിലേക്ക്​ ഒരു കളി മാ​ത്രം അകലെ നിൽക്കുന്ന ബയേൺ മ്യൂണിക്കിൽ ആഘോഷം മുഴങ്ങും മുമ്പ്​ രാജി പ്രഖ്യാപിച്ച്​ പരിശീലകൻ ഹാൻസി ഫ്ലിക്ക്​. അവസാന മത്സരത്തിൽ വുൾഫ്​സ്​ബർഗിനെ 3-2നെ തോൽപിച്ചതോടെ പോയിന്‍റ്​ പട്ടികയിൽ ഏഴു പോയിന്‍റ്​ ലീഡ്​ ഉറപ്പിച്ച ടീം ശനിയാഴ്ച മെയിൻസിനെതിരെ ജയിച്ചാൽ തുടർച്ചയായ ഒമ്പതാം കിരീടമെന്ന റെക്കോഡ്​ സ്വന്തംപേരിൽ കുറിക്കും.

ആഘോഷം മുഴങ്ങേണ്ട ക്ലബിന്​ പക്ഷേ, ഇരട്ടി ദുഃഖമായി കഴിഞ്ഞ ആഴ്ചയിലെ ചാമ്പ്യൻസ്​ ലീഗ്​ ക്വാർട്ടർ ദുരന്തം മുന്നിലുള്ളതാണ്​ വില്ലനാകുന്നത്​. നിലവിലെ ചാമ്പ്യന്മാരായിട്ടും ക്വാർട്ടറിൽ പി.എസ്​.ജിയോട്​ തോറ്റ്​ പുറത്താകുകയായിരുന്നു. കഴിഞ്ഞ സീസണിലെ തോൽവിക്ക്​ മധുര പ്രതികാരമായാണ്​ പി.എസ്​.ജി ബയേണിനെ ​തകർത്തുവിട്ടത്​. ഇതിന്‍റെ പ്രതിഷേധം ശക്​തമായതോടെ പരിശീലകൻ ഫ്ലിക്​ അടുത്ത സീസണിൽ ക്ലബിനൊപ്പമുണ്ടാകാനില്ലെന്ന്​ നയം വ്യക്​തമാക്കുകയായിരുന്നു.

ടീം അടുത്ത ശനിയാഴ്ച മെയിൻസിനെതിരെ ജയം നേടിയാൽ മൂന്നു കളികൾ ബാക്കിനിൽക്കെ കിരീടമുയർത്തുകയെന്ന സ്വപ്​ന നേട്ടം സ്വന്തമാക്കുമെങ്കിലും ഫ്ലിക്കിന്‍റെ പ്രഖ്യാപനം അലയൻസ്​ അറീനയെ ദുഃഖത്തിലാഴ്ത്തി. നിലവിൽ അതല്ല, വിഷയമെന്നും ടീമിന്‍റെ മത്സരങ്ങൾക്കാണ്​ പ്രാമുഖ്യമെന്നും ക്ലബ്​ മാനേജ്​മെന്‍റ്​ പ്രഖ്യാപിച്ചിട്ടുണ്ട്​.