‘സാമുദായിക വിഭജനം വളർത്തുന്നതിനിടെ സർക്കാറുകൾക്ക് ജനങ്ങളെ നോക്കാൻ സമയമില്ല’; മണിപ്പൂർ വിഷയത്തിൽ രൂക്ഷ വിമർശനവുമായി സി.കെ വിനീത്
text_fieldsമണിപ്പൂരില് സ്ത്രീകളെ നഗ്നരാക്കി നടത്തുകയും ലൈംഗികാതിക്രമം നടത്തുകയും ചെയ്ത സംഭവത്തിൽ കേന്ദ്ര-സംസ്ഥാന സര്ക്കാറുകൾക്കെതിരെ രൂക്ഷ വിമര്ശനവുമായി ഫുട്ബാള് താരം സി.കെ വിനീത്. സാമുദായിക വിഭജനം വളർത്തുന്നതിനിടെ, ഭരിക്കുന്ന കേന്ദ്ര-സംസ്ഥാന സർക്കാറുകൾക്ക് ജനങ്ങളെ നോക്കാൻ സമയമില്ലെന്ന് വിനീത് ഫേസ്ബുക് പോസ്റ്റില് കുറിച്ചു.
ഇവരും നമ്മെ പോലെ മനുഷ്യരാണെന്നും അവർ ഇന്ത്യൻ പൗരന്മാരാണെന്നും അദ്ദേഹം ഓർമിപ്പിച്ചു. മണിപ്പൂരിൽ ഇന്ത്യൻ ഫുട്ബാൾ ടീം അംഗത്തിന്റെ വീട് പൂർണമായും തകർത്തെന്നും കുടുംബം സുഹൃത്തുക്കളുടെ വീടുകളിൽ അഭയം തേടിയിരിക്കുകയാണെന്നും എന്നാൽ ഇത് സംഭവിച്ചിട്ട് ആഴ്ചകൾ കഴിഞ്ഞിട്ടും ഒരു മാധ്യമവും അതിനെക്കുറിച്ച് സംസാരിക്കുന്നില്ലെന്നും അദ്ദേഹം കുറ്റപ്പെടുത്തി.
ഫേസ്ബുക് പോസ്റ്റിന്റെ പൂര്ണരൂപം
മണിപ്പൂരിൽ നിന്നുള്ള വാർത്തകൾ വളരെ ഭയാനകമാണ്, സോഷ്യൽ നെറ്റ്വർക്കിൽ പ്രചരിച്ച സ്ത്രീകളുടെ ദൃശ്യങ്ങൾ ആളുകളുടെ മനസ്സാക്ഷിയെ മരവിപ്പിക്കുന്നു. സാമുദായിക വിഭജനം വളർത്തുന്നതിന് നടുവിൽ, ഭരിക്കുന്ന സർക്കാരിന്, കേന്ദ്ര തലത്തിലായാലും സംസ്ഥാന തലത്തിലായാലും, ജനങ്ങളെ നോക്കാൻ സമയമില്ല!
ഇത് നിർത്താൻ കഴിയുമോ? ഇവരും നമ്മളെ പോലെ മനുഷ്യരാണ്. അവർ ഇന്ത്യൻ പൗരന്മാരാണ്. നമുക്ക് അവരോട് മാന്യമായും ബഹുമാനത്തോടെയും പെരുമാറാൻ കഴിയുമോ? സ്വാർഥ കാരണങ്ങളാലുള്ള ഈ പാർശ്വവത്കരണം നമുക്ക് അവസാനിപ്പിക്കാൻ കഴിയുമോ?
മണിപ്പൂരിൽ നിലവിൽ ഇന്ത്യൻ ദേശീയ ഫുട്ബാൾ ടീമിലുള്ള താരത്തിന്റെ വീട് പൂർണമായും തകർത്തു. ഇവരും കുടുംബവും സുഹൃത്തുക്കളുടെ വീടുകളിൽ അഭയം തേടിയിരിക്കുകയാണ്. ഇത് സംഭവിച്ചിട്ട് ആഴ്ചകൾ കഴിഞ്ഞു. ഒരു മാധ്യമവും അതിനെക്കുറിച്ച് സംസാരിക്കുന്നില്ല. എന്താണ് സംഭവിക്കുന്നതെന്ന് അവർക്ക് അറിയാമോ? അവർ അത് അവഗണിക്കാൻ തീരുമാനിക്കുകയാണോ? അതോ അവർ അത് ചർച്ച ചെയ്തിട്ടുണ്ടോ, ഞാൻ അതിനെക്കുറിച്ച് കേട്ടിട്ടില്ലേ?
ഈ ആളുകൾ എന്റെ സുഹൃത്തുക്കളും മുൻ ടീമംഗങ്ങളുമാണ്. തങ്ങളുടെ പ്രിയപ്പെട്ടവർ സുരക്ഷിതരാണെന്ന് അറിഞ്ഞുകൊണ്ട് അവർക്ക് രാജ്യത്തിനായി കളിക്കാൻ കഴിയുമോ? അവർക്ക് അത് ഉണ്ടെന്ന് ഉറപ്പാക്കാൻ കഴിയുമോ? എല്ലാവർക്കും സുരക്ഷിതമായ അന്തരീക്ഷം സൃഷ്ടിക്കാനോ അവരെ സുരക്ഷിതരാണെന്ന് തോന്നാനോ നമുക്ക് കഴിയുമോ? മണിപ്പൂർ കണ്ണീരിലാണ്. അവരെയൊന്നു സഹായിക്കൂ!
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.