കൊളംബിയക്ക്​ കോപ അമേരിക്ക ആതിഥേയത്വം നഷ്​ടമായി; ടൂർണമെന്‍റ്​ മുഴുവനായി അർജന്‍റീനയിൽ നടന്നേക്കും

ബാരൻക്വില (കൊളംബിയ): രാജ്യത്ത്​ സർക്കാർ വിരുദ്ധ പ്രക്ഷോഭം കൊടുമ്പിരികൊണ്ട സാഹചര്യത്തിൽ കൊളംബിയക്ക്​ കോപ അമേരിക്ക ടൂർണമെന്‍റിന്‍റെ ആതിഥേയത്വം നഷ്​ടമായി. അർജന്‍റീനയും കൊളംബിയയും സംയുക്തമായാണ്​ കോപ അമേരിക്കയുടെ 2021 എഡിഷന്​ ആതിഥേയത്വം വഹിക്കാനിരുന്നത്​. 105 വർഷത്തിനിടെ ആദ്യമായിട്ടായിരുന്നു കൊളംബിയക്ക്​ വൻകരയുടെ ടൂർണമെന്‍റിന്​ വേദിയാകാൻ അവസരം ലഭിച്ചിരുന്നത്​.

സർക്കാറിനെതിരായ പ്രക്ഷോഭത്തിനിടെ പ്രതിഷേധക്കാർ കോപ ലിബറട്ടറോസ്​ മത്സരങ്ങൾ തടസ്സപ്പെടുത്തിയിരുന്നു. ജൂൺ 13 മുതൽ ജൂലൈ 10 വരെ നീണ്ടു നിൽക്കുന്ന ഫുട്​ബാൾ മാമാങ്കത്തിന്‍റെ ഫൈനൽ തലസ്​ഥാന നഗരമായ ബാറൻക്വില്ലയിലാണ്​ നടത്താൻ നിശ്ചയിച്ചിരുന്നത്​.

ടൂർണമെന്‍റ്​ നവംബറിലേക്ക്​ മാറ്റണമെന്ന കൊളംബിയയുടെ ആവശ്യം നിരസിച്ചാണ്​ ദക്ഷിണ അമേരിക്കൻ ഫുട്​ബാൾ ഫെഡറേഷൻ (കോൺമബോൾ) രാജ്യത്തെ ആതിഥേയത്വത്തിൽ നിന്ന്​ ഒഴിവാക്കിയത്​. '2021 കോപ അമേരിക്ക യാഥാർഥ്യമാകുമെന്ന്​ ഞങ്ങൾ ഉറപ്പ് നൽകുന്നു. കൊളംബിയയിൽ നടക്കാനിരുന്ന മത്സരങ്ങളുടെ പുതുക്കിയ വേദി സംബന്ധിച്ച കൂടുതൽ വിവരങ്ങൾ വരും ദിവസങ്ങളിൽ അറിയിക്കും' -കോൺമബോൾ അറിയിച്ചു.

ടൂർണമെന്‍റിന്​ മുഴുവനായി ആതിഥേയത്വം വഹിക്കാമെന്ന്​ അർജന്‍റീന സമ്മതിച്ചിട്ടുണ്ട്​. 2019ൽ നടന്ന കോപ അമേരിക്കയിൽ ബ്രസീലായിരുന്നു ജേതാക്കളായത്​. വിവാദ നികുതി പദ്ധതി നടപ്പിലാക്കാനുള്ള സർക്കാറിന്‍റെ ശ്രമങ്ങളെ തുടർന്നാണ്​ കൊളംബിയയിൽ ഏപ്രിൽ മുതൽ സർക്കാറിനെതിരെ പ്രതിഷേധം ആരംഭിച്ചത്​.