വീണ്ടും നെയ്​മർ മാജിക്​; പെറുവിനെ തരിപ്പണമാക്കി ബ്രസീൽ ​ക്വാർട്ടറിൽ

സവോ പോളോ: അതിവേഗം മൈതാനത്തു വീഴുന്നതിന്​ പരാതിയേറെ കേട്ടതാണെങ്കിലും കാലിൽ പന്തുകൊരുത്താൽ കാണിക്കുന്ന മായാജാലങ്ങൾക്ക്​ നെയ്​മറിനോളം മിടുക്ക്​ സമകാലിക ഫുട്​ബാളിൽ അധിക പേർക്കുണ്ടാകില്ല. 90 മിനിറ്റും മനോഹര ഫുട്​ബാളിന്‍റെ ആഡംബര കാഴ്ചകൾ പകർന്ന്​ നെയ്​മർ ജൂനിയർ ഒറ്റക്ക്​ മൈതാനം വാണ കോപ അമേരിക്ക കളിയിൽ പെറുവിനെ കുരുതി കഴിച്ച്​ ബ്രസീൽ. എകപക്ഷീയമായ നാലു ഗോളിനായിരുന്നു​ അനായാസ ജയം. ഇതോടെ ബ്രസീൽ ക്വാർട്ടറിലെത്തി.

ആദ്യകളി വെനസ്വേലക്കെതിരെ വൻ മാർജിനിൽ ജയിച്ച്​ രണ്ടാം അങ്കത്തിനിറങ്ങിയ സാംബകൂട്ടത്തിന്​ വെല്ലുവിളിയാകുന്നതിൽ കഴിഞ്ഞ തവണത്തെ ഫൈനലിസ്റ്റുകളായ പെറു തുടക്കത്തിലേ പാളി. റയോ ഡി ജനീറോയിൽ 2019ൽ 3-1ന്​ തോൽപിച്ച ആവേശം ഒട്ടും ചോരാതെ ബ്രസീൽ പുറത്തെടുത്തപ്പോൾ എതിരാളികൾ പ്രതി​രോധത്തിലേക്ക്​​ പിൻവലിഞ്ഞു. അതും പലവട്ടം തകർന്നു. ഒട്ടും മൂർച്ചയില്ലാതെ പെറു ആക്രമണങ്ങൾ ബ്രസീൽ പകുതി കടക്കാതെ അവസാനിക്കുകയും ചെയ്​തു.

മറുവശത്ത്​, തുടക്കത്തിലേ ലക്ഷ്യം കണ്ട്​ ബ്രസീൽ വരവറിയിച്ചു. 12ാം മിനിറ്റിൽ അലക്​സ്​ സാ​ന്ദ്രോ ആയിരുന്നു സ്​കോറർ. ഒരു ഗോൾ വീണിട്ടും പന്ത്​ വരുതിയിൽനിർത്താനാകാതെ ഉഴറിയ പെറു ഹാഫിൽ തന്നെ പിന്നെയും നീക്കങ്ങൾ തുടർന്നു. രണ്ടാം പകുതിയുടെ 63ാം മിനിറ്റിൽ പെറു പെനാൽറ്റി ബോക്​സിൽ പന്തുമായെത്തിയ നെയ്​മർ എതിർതാരത്തെ തട്ടി വീണപ്പോൾ റഫറി പെനാൽറ്റി വിധിച്ചെങ്കിലും 'വാറി'ൽ ഫൗൾ ഇല്ലെന്ന്​ വിധിച്ചു. 69ാം മിനിറ്റിലായിരുന്നു രണ്ടാം ഗോളെത്തിയത്​. പെനാൽറ്റി ബോക്​സിൽ പന്ത്​ കാലിൽ ലഭിക്കു​േമ്പാൾ നെയ്​മറിനെ വളഞ്ഞ്​ പ്രതിരോധ താരം. ഒരു നിമിഷം കാത്തുനിന്ന്​ ഇരുകാലുകൾക്കിടയിലൂടെ പായിച്ച ഗ്രൗണ്ട്​ ഷോട്ട്​ ഗോളിക്കു പിടി​െകാടുക്കാതെ പോസ്റ്റിന്‍റെ വലതുമൂലയിൽ. സ്​കോർ 2-0. രണ്ടു ​േഗാളുകൾ വീണതോടെ ശരിക്കും തളർന്നുപോയ ​എതിരാളികളെ നിലംതൊടീക്കാതെ പ്രകടനമായിരുന്നു പിന്നീട്​ കളിയിലുടനീളം. 72ാം മിനിറ്റിൽ നെയ്​മർ ഒറ്റക്കു നയിച്ച നീക്കം അവസാനം തളികയിലെന്ന ​േപാലെ നീട്ടി നൽകിയിട്ടും സഹതാരം പെറു ഗോളിയുടെ കൈകളി​ലാണ്​ എത്തിച്ചത്​. 79ാം മിനിറ്റിൽ ​ഗോൾ പോസ്റ്റിന്​ മീറ്ററുകൾ മുന്നിൽ ഗോളി മാറിനിൽക്കെ പെറു താരം ആകാശത്തേക്ക്​ പന്ത്​ അടിച്ചുയർത്തുന്നതും കണ്ടു. ഫ്രീകിക്കിൽ സഹതാരം തലവെക്കുകയും രണ്ടാമൻ കാലിൽ തള്ളിനൽകുകയും ചെയ്​ത പന്തായിരുന്നു അദ്​ഭുതകരമായി പുറത്തേക്ക്​ അടിച്ചുകളഞ്ഞത്​. കളി പൂർണമായി സ്വന്തം വരുതിയിലാക്കിയ ​ബ്രസീൽ അവസാന നിമിഷങ്ങളിൽ അടിച്ചുകയറ്റിയത്​ രണ്ടു ഗോളുകൾ. നെയ്​മർ സൃഷ്​ടിച്ച അവസരം ഗോളാക്കി എവർട്ടൺ റിബേറോ 89ാം മിനിറ്റിലും ഡൈവിങ്​ കിക്കിലൂടെ റിച്ചാർളിസൺ 93ാം മിനിറ്റിലും ലക്ഷ്യം കണ്ടതോടെ സ്​കോർ പൂർത്തിയായി.

ഇരു ടീമുകളും 10 തവണ മുമ്പ്​ ഏറ്റുമുട്ടിയപ്പോൾ ഏഴും ജയിക്കുകയും ഒരു തവണ മാത്രം പരാജയ​പ്പെടുകയും ചെയ്​ത ബ്രസീൽ കോപ ​അമേരിക്കയിൽ അവസാനം കളിച്ച ഏഴും ജയിച്ച റെക്കോഡുമായാണ്​ ബൂട്ടുകെട്ടിയത്​. 2016ലാണ്​ ഇതേ ടൂർണമെന്‍റിൽ പെറുവിന്​ മുമ്പിൽ ബ്രസീൽ അവസാനമായി പരാജയപ്പെടുന്നത്​. അതുപക്ഷേ, പലവട്ടം തിരുത്തിയ സാംബ കരുത്ത്​ അക്ഷരാർഥത്തിൽ ജ്വലിച്ചുനിൽക്കുന്നതായിരുന്നു ഇന്നത്തെ കാഴ്ച.

നേരത്തെ നടന്ന മത്സരത്തിൽ കൊളംബിയയും വെനസ്വേലയും ഗോൾരഹിത സമനിലയിൽ പിരിഞ്ഞു. ​ഇതോടെ ഗ്രൂപ്​ ബിയിൽ ​ഒരു ജയവും ഒരു സമനിലയുമായി കൊളംബിയ ബ്രസീലിനു പിറകിൽ രണ്ടാമതുണ്ട്​.