വിമർശകർകർക്ക്​ മറുപടിയുമായി വീണ്ടും ക്രിസ്റ്റ്യാനോ; തുടർച്ചയായി രണ്ടാം വട്ടം സീരി എയിലെ മികച്ച താരം

മിലാൻ: വിമർശകർക്ക്​ വീണ്ടും മറുപടിയുമായി ക്രിസ്റ്റ്യാനോ റൊണാൾഡോ. 2019-20 സീസണിൽ ഇറ്റാലിയൻ സീരി എയിലെ ഏറ്റവും മികച്ച താരമായി ചാമ്പ്യൻ ക്ലബായ യുവന്‍റസിന്‍റെ പോർച്ചുഗീസ്​ സൂപ്പർ താരമായ ക്രിസ്റ്റ്യാനോ റൊണാൾഡോ തെരഞ്ഞെടുക്കപ്പെട്ടു. തുടർച്ചയായ രണ്ടാം തവണയാണ്​ താരം നേട്ടം സ്വന്തമാക്കുന്നത്​.

യുവന്‍റസിന്​ തുടർച്ചയായ ഒമ്പതാം സീരി എ കിരീടം നേടിക്കൊടുത്ത പ്രകടനത്തിനാണ് പുരസ്​കാരം. ഇറ്റാലിയൻ ഫുട്‌ബാളേഴ്‌സ് അസോസിയേഷൻ വോ​ട്ടെടുപ്പു വഴിയാണ്​ വിജയിയെ തെരഞ്ഞെടുത്തത്.

33 മത്സരങ്ങളിൽ നിന്ന്​ 31ഗോളുകളുമായി റോണോ ലീഗിലെ ഏറ്റവും മികച്ച രണ്ടാമത്തെ ഗോൾവേട്ടക്കാരനായിരുന്നു. സിറോ ഇമ്മോബൈൽ (36) ആയിരുന്നു ഒന്നാമൻ. എന്നാൽ 37 മത്സരങ്ങളിൽ നിന്നായിരുന്നു ലാസിയോ താരം 36 ഗോൾ അടിച്ചത്​.

'ഇത് നമ്മൾ ആഗ്രഹിക്കാത്ത തരത്തിലുള്ള വിചിത്രമായ ഒരു വർഷമായിരുന്നു. എന്നാൽ വ്യക്തിഗതമായും ടീമെന്ന നിലയിലും ഇത് നന്നായി വന്നു. കാരണം നമ്മൾ ചാമ്പ്യൻഷിപ്പ് വിജയിച്ചു. അടച്ചിട്ട സ്​റ്റേഡിയത്തിൽ കളിക്കുകയെന്നത് ആദ്യം ബുദ്ധിമുട്ടായിരുന്നു. എന്നാൽ കിരീടമായിരുന്നു ലക്ഷ്യം. അത് നേടാനായി. എന്നാൽ ചാമ്പ്യൻസ് ലീഗ് നഷ്​ടപ്പെട്ടു. അതാണ് ഫുട്​ബാൾ' -സ്‌കൈ സ്‌പോർട്ട് ഇറ്റാലിയക്ക് നൽകിയ അഭിമുഖത്തിൽ താരം പറഞ്ഞു.

2019ൽ സാംദോറിയക്കെതിരെ ക്രിസ്റ്റ്യാനോ നേടിയ ഗോളാണ്​ ഗോൾ ഓഫ്​ ദ സീസണായി തെരഞ്ഞെടുക്കപ്പെട്ടത്​. യുവന്‍റസിന്‍റെ ക്രിസ്റ്റ്യാന ജിറെല്ലിയാണ്​ മികച്ച വനിത താരം. അറ്റലാന്‍റയാണ്​ പോയ സീസണലിലെ ഏററവും മികച്ച ടീം. പരിശീലകനുള്ള പുരസ്‌കാരം അറ്റലാൻറയുടെ ജിയാൻ പിയെറോ ഗാസ്‌പെറിനി സ്വന്തമാക്കി.

'അത്​ എന്‍റെ ഏറ്റവും മികച്ച ഗോളായിരുന്നു. എനിക്ക്​ ഉറപ്പായിരുന്നു അത്​'-ക്രിസ്റ്റ്യാനോ പറഞ്ഞു. ഈ സീസണിൽ 24 മത്സരങ്ങളിൽ നിന്ന്​ 23 ഗോളുകളുമായി ക്രിസ്റ്റ്യാനോയാണ്​ ടോപ് സ്‌കോറർ പട്ടികയിൽ മുമ്പൻ. എന്നാൽ പോയന്‍റ്​ പട്ടികയിൽ യുവന്‍റസ്​ മൂന്നാം സ്​ഥാനത്താണിപ്പോൾ.

ഫുട്​ബാൾ കളിക്കാർ, പരിശീലകൻമാർ, റഫറിമാർ, മാധ്യമപ്രവർത്തകർ എന്നിവർ ചേർന്ന്​ വോ​ട്ടെടുപ്പിലൂടെയാണ്​ പുരസ്​കാര ജേതാവിനെ തെരഞ്ഞെടുക്കുക. ഒരു ടെലിവിഷൻ പരിപാടിയിൽ പുരസ്​കാരം സമ്മാനിക്കും.