'തിരുമ്പി വന്തിട്ടേന്ന് സൊല്ല്'; റോണോ ഡബിളിൽ യുനൈറ്റഡിന്​ തകർപ്പൻ ജയം

മാഞ്ചസ്റ്റർ: ചെമ്പട്ടുവിരിച്ച ഓൾഡ്​ ട്രാഫോഡ്​ മൈതാനത്തേയും ഭൂഗോളത്തുള്ള കാൽപന്ത്​ ആരാധകരെയും ഉന്മാദത്തിലാറാടിച്ച്​ ക്രിസ്റ്റ്യാനോ ​റൊണാൾഡോയുടെ രാജകീയ മടങ്ങിവരവ്​. 12 വർഷങ്ങൾക്കും 124 ദിവസങ്ങൾക്കുമപ്പുറം ചെങ്കുപ്പായത്തിൽ റൊണാൾഡോയുടെ കാലുകൾ വീണ്ടും ഗോൾ ചുരത്തിയപ്പോൾ സ്വന്തം മൈതാനത്ത്​ യുനൈറ്റഡിന്​ ആവേശ ജയം.

ന്യൂകാസിൽ യുനൈറ്റഡിനെ ഒന്നിനെതിരെ നാലുഗോളുകൾക്കാണ്​ യുനൈറ്റഡ്​ തകർത്തത്​. ഇരട്ടഗോളുകളുമായി റൊണാൾഡോ മത്സരം സ്വന്തം പേരിലെഴുതിയപ്പോൾ പോർച്ചുഗീസുകാരൻ തന്നെയായ ബ്രൂണോ ഫെർണാണ്ടസ്​ മൂന്നാംഗോൾ നേടി ടീമിന്‍റെ വിജയമുറപ്പിച്ചു. മത്സരം അവസാനിക്കാനിരിക്കേ ​ജെസ്സി ലിങ്ഗാൾഡിന്‍റെ വകയായിരുന്നു നാലാംഗോൾ.

തുടക്കത്തിലെ ഇടർച്ചക്ക്​ ശേഷം താളം വീണ്ടെടുത്തതോടെ സാക്ഷാൽ റൊണാൾഡോയെ മൈതാനം പലകുറി കണ്ടു. മേസൺ ഗ്രീൻവുഡ്​ കഠിന പരിശ്രമത്തിനൊടുവിൽ ​തൊടുത്ത ഷോട്ട്​ ഗോളിയുടെ കൈകളിൽ തട്ടി തിരിച്ചെത്തിയപ്പോൾ വലയിലേക്ക്​ തിരിച്ചുവി​േടണ്ട ജോലിയേ റൊണാൾഡോക്കുണ്ടായിരുന്നുള്ളൂ. റൊണാൾഡോയുടെ സ്വപ്​നതുല്യമായ തുടക്കത്തിന്‍റെ മധുരത്തിലാണ്​ യുനൈറ്റഡ്​ ആദ്യ പകുതി അവസാനിപ്പിച്ചത്​.

രണ്ടാംപകുതിയുടെ 56ാം മിനിറ്റിൽ ജാവിയർ മാൻകില്ലോയുടെ ഗോളിൽ ന്യൂകാസിൽ ആതിഥേയരെ ഞെട്ടിച്ചു. 62ാം മിനിറ്റിലായിരുന്നു തന്‍റെ അത്​ലറ്റിസം റൊണാൾഡോ പുറത്തെടുത്തത്​. ലൂക്​ഷാ നീട്ടിക്കൊടുത്ത പന്തുമായി ഒറ്റക്ക്​ പാഞ്ഞുകയറിയ റൊണാൾഡോ അനായാസം രണ്ടാംഗോൾ കുറിക്കു​േമ്പാൾ ഗാലറി ആരവങ്ങളിലാറാടി. ഈ പ്രായത്തിൽ പ്രീമിയർലീഗിന്‍റെ വേഗത്തിനൊപ്പമെത്തുമോ എന്ന ആശങ്കക്കുള്ള റൊണാൾഡോയുടെ മറുപടി കൂടിയായിരുന്നു അത്​. 80ാം മിനിറ്റിൽ ബ്രൂണോയുടെ റോക്കറ്റ്​ ഗോളും പിറന്നതോടെ യുനൈറ്റഡ്​ വിജയമുറപ്പിച്ചു. നാലുമത്സരങ്ങൾ പൂർത്തിയായപ്പോൾ 10 പോയന്‍റുമായി യുനൈറ്റഡ്​ ലീഗിൽ ഒന്നാംസ്ഥാനത്തേക്ക്​ കയറി.