ബ്ലാസ്റ്റേഴ്സിന്റെ ചാട്ടുളിയാകാൻ ദിമിത്രി ദിയാമാന്റാകോസ് വരുന്നു?

സഗ്രേബ്: പുതുസീസണിൽ കേരള ബ്ലാസ്റ്റേഴ്സിന്റെ അവസാന വിദേശ താരമായി ​ഗ്രീക്ക് ഇന്റർനാഷനൽ സ്ട്രൈക്കർ ദിമിത്രി ദിയാമാന്റാകോസ് വരുമെന്ന് റി​പ്പോർട്ട്. ക്രൊയേഷ്യൻ ലീഗിലെ മുൻനിര ക്ലബായ ഹാജൂക് സ്പ്ലിറ്റിന്റെ മുന്നേറ്റക്കാരനായ 29കാരൻ ബ്ലാസ്റ്റേഴ്സുമായി ധാരണയിലെത്തിയതായി ​ക്രൊയേഷ്യൻ മാധ്യമങ്ങൾ റിപ്പോർട്ട് ചെയ്തു. അർധാവസരങ്ങളിൽനിന്നുപോലും വല കുലുക്കാൻ മിടുക്കുള്ള ദിമിത്രി, കൂടുമാറിയ ആൽവാരോ വാസ്​ക്വേസിന്റെ പകരക്കാരനായാവും ബ്ലാസ്​റ്റേഴ്സിലെത്തുക.

ഹാജൂക് സ്പ്ലിറ്റുമായിട്ടുള്ള കരാർ ദിയാമാന്റാകോസ് കഴിഞ്ഞ ദിവസം റദ്ദാക്കിയിരുന്നു. ശേഷം, താരം എവിടേക്കാണ് പോകുന്നതെന്ന ​അന്വേഷണത്തിലായിരുന്നു ക്രൊയേഷ്യൻ മാധ്യമങ്ങൾ. 'ഹാജുകുമായി വേർപിരിഞ്ഞശേഷം ഗ്രീക്ക് താരം എവിടേക്കാണ് പോകുന്നതെന്ന് അറിവായിട്ടുണ്ട്. ഇന്ത്യൻ സൂപ്പർ ലീഗ് ക്ലബായ കേരള ബ്ലാസ്റ്റേഴ്സ് എഫ്.സിയിലായിരിക്കും അദ്ദേഹം കരിയർ തുടരുക' -സ്ലോബോന ദാൽമാസിയ പത്രം റിപ്പോർട്ട് ചെയ്തു.

ഗ്രീസ് അണ്ടർ 17, അണ്ടർ 19, അണ്ടർ 20, അണ്ടർ 21 ടീമുകൾക്കുവേണ്ടി ബൂട്ടുകെട്ടിയ ഈ ആറടിക്കാരൻ ഗ്രീസ് ദേശീയ ടീമിനുവേണ്ടി അഞ്ചു കളികളിൽ ഒമ്പതു ഗോളുകൾ നേടിയിട്ടുണ്ട്. ​2012ൽ അണ്ടർ 19 യൂറോകപ്പിൽ റണ്ണറപ്പായ ​ഗ്രീക്ക് ടീമിലെ സുപ്രധാന താരമായിരുന്നു. 2014 സെപ്റ്റംബർ ഏഴിന് റുമേനിയക്കെതിരെയാണ് സീനിയർ ടീമിൽ അരങ്ങേറിയത്.

​2012ൽ ഗ്രീസ് സൂപ്പർക്ലബായ ഒളിംപിയാക്കോസിലൂടെയാണ് പ്രൊഫഷനൽ കരിയറിന് തുടക്കം. അടുത്ത മൂന്നു സീസണുകളിൽ ഗ്രീക്ക് ലീഗിൽ പനി​യോനിയോസ്, ആരിസ്, എർഗോടെലിസ് ടീമുകൾക്ക് വായ്പാടിസ്ഥാനത്തിൽ ബൂട്ടുകെട്ടി. 2015-ൽ ജർമൻ ക്ലബായ കാൾസ്റൂഹറിലേക്ക് കൂടുമാറി. രണ്ടു സീസണിനുശേഷം ബോഷമിലേക്കും പിന്നാലെ സെന്റ് പൗളിയിലേക്കും ചേക്കേറി. സെന്റ് പൗളിക്കുവേണ്ടി 49മത്സരങ്ങളിൽ 38 ​ഗോളുകൾ നേടി മിന്നും ഫോമിലായിരുന്നു. 2020ലാണ് ഹാജുകുമായി കരാർ ഒപ്പിട്ടത്. 24 കളികളിൽ ക്ലബിനുവേണ്ടി 20 ഗോളുകൾ. കഴിഞ്ഞ സീസണിൽ വായ്പാടിസ്ഥാനത്തിൽ ഇസ്രയേൽ ടീമായ അഷ്ദോദിലാണ് കളിച്ചത്.