വിടില്ല ഡ്യൂറന്‍റ്​ കപ്പ്;​ ചാമ്പ്യൻ ഗോകുലം കേരള റെഡി- ടീമിനെ പരിചയപ്പെടാം

കോഴിക്കോട്: ഡ്യൂറന്‍റ്​ കപ്പിലെ നിലവിലെ ചാമ്പ്യന്മാരായ ഗോകുലം കേരള എഫ്​.സി ആദ്യ അങ്കത്തിന്​ ഇന്ന്​ ബൂട്ടുകെട്ടും. മലയാളികളും, നാലു വിദേശ താരങ്ങളും അടങ്ങുന്ന ശക്തമായ ടീമുമായാണ്​ കേരള ടീം പോരിനിറങ്ങുന്നത്​. വൈകീട്ട്​ മൂന്നിന്​ ആർമി റെഡ് ടീമിന് എതിരെയാണ്​ മത്സരം. വൈകുന്നേരം മൂന്ന് മണിക്ക് കൊൽക്കത്തയിലെ കല്യാണി സ്റ്റേഡിയത്തിലാണ് കളി.

ഗ്രൂപ്പ് ഡി യിൽ ആദ്യ മത്സരത്തിൽ ആസ്സാം റൈഫിൾസിനെ 4 - 1 ആർമി റെഡ് തോൽപിച്ചിരിന്നു. ഇരു ടീമുകൾക്കും പുറമെ ഹൈദരാബാദ്​ എഫ്​.സി ഇതേ ​ഗ്രൂപിലുണ്ട്​. ഗ്രൂപിലെ ആദ്യ രണ്ടു സ്​ഥാനക്കാർ നോകൗട്ടിൽ പ്രവേശിക്കും.

കഴിഞ്ഞ വർഷത്തെ പോലെ യുവ കളിക്കാർക്ക് അവസരം നൽകുന്ന രീതിയിലാണ് ഗോകുലം സ്‌ക്വാഡ് തിരഞ്ഞെടുത്തത്. ഗോകുലത്തിന്‍റെ റിസേർവ് ടീമിൽ നിന്നും മധ്യനിരക്കാരായ റിഷാദ് പി.പി, അഭിജിത് കെ എന്നിവരെ ഈ വർഷം സീനിയർ ടീമിലേക്കു എടുത്തിട്ടുണ്ട്. 12 കേരള താരങ്ങളിൽ, 11 പേരും മലബാറിൽ ഉള്ളവരാണ്. ഐ ലീഗ് വിജയികളായ ടീമിൽ നിന്നും 11 കളിക്കാരെ നിലനിർത്തുകയും ചെയ്‌തു. അഫ്ഘാൻ താരവും ക്യാപ്റ്റനുമായ മുഹമ്മദ് ഷെരീഫിന്‍റെ കരാർ പുതുക്കുകയും, അമിനോ ബൗബാ, ചിസം എൽവിസ് ചിക്കത്താറ, റഹീം ഒസുമാനു എന്നീ വിദേശ താരങ്ങളെയും സൈൻ ഗോകുലം ഈ വർഷം ക്ലബിലെത്തിക്കുകയും ചെയ്തു. വൻ നിരയു​മായി കിരീടം നിലനിർത്താനാവുമെന്നാണ് കോച്ച് വിൻസെൻസോ ആൽബർട്ടോയുടെ​ പ്രതീക്ഷ.

ഡ്യൂറൻഡ് സ്‌ക്വാഡ്:

ഗോൾകീപ്പർ: രക്ഷിത് ദാഗർ, അജ്മൽ പി.എ, വിഗ്നേശ്വരൻ ഭാസ്കരൻ

പ്രതിരോധനിരക്കാർ: അമിനോ ബൗബാ, അലക്സ് സജി, പവൻ കുമാർ, മുഹമ്മദ് ജാസിം, മുഹമ്മദ് ഉവൈസ്, ദീപക് സിംഗ്, അജിൻ ടോം

മധ്യനിര: എമിൽ ബെന്നി, മുഹമ്മദ് റഷീദ്, ഷെരീഫ് മുഹമ്മദ്, സോഡിങ്ലിയാന, റിഷാദ് പി.പി, അഭിജിത് കെ, ചാൾസ് ആനന്ദരാജ്

ഫോർവേഡ്സ്: ചിസം എൽവിസ് ചിക്കത്താറ, റഹീം ഒസുമാനു, ജിതിൻ എം എസ്, റൊണാൾഡ്‌ സിംഗ്, സൗരവ്, ബെന്നസ്റ്റാൻ, താഹിർ സമാൻ.