ബ്ലാസ്​റ്റേഴ്​സിനെ സമനിലയിൽ തളച്ച്​ ഈസ്റ്റ്​ ബംഗാൾ

കളിമികവിൽ മുന്നിൽനിന്നിട്ടും ജയം അകന്നുനിന്ന നാളുകൾക്കൊടുവിൽ കരുത്തരായ ഒഡിഷയെ തന്നെ വീഴ്​ത്തി തിരിച്ചുവന്ന ബ്ലാസ്​റ്റേഴ്​സിന്​ പിന്നെയും സമനില. ഈസ്​റ്റ്​ ബംഗാളാണ്​ ഓരോ ഗോൾ അടിച്ച്​ കേരള​ത്തെ ഒപ്പം പിടിച്ചത്​.

തുടക്കം മുതൽ ആക്രമണം കൊഴുപ്പിക്കുകയെന്ന തന്ത്രവുമായി മൈതാനം നിറഞ്ഞുകളിച്ച ബ്ലാസ്​റ്റേഴ്​സ്​ തന്നെയായിരുന്നു ആദ്യം എതിർവല ചലിപ്പിച്ചത്​. വാസ്​ക്വസ്​ 15ാം മിനിറ്റിൽ സ്​കോർ ചെയ്​തത്​ പക്ഷേ, റഫറി അസിസ്​റ്റൻറുമാരുമായി നീണ്ട കൂടിയാലോചനകൾക്കൊടുവിൽ അനുവദിച്ചില്ല.

പതിയെ കളി പിടിച്ച ഈസ്​റ്റ്​ ബംഗാൾ 37ാം മിനിറ്റിൽ സ്​കോർ ചെയ്​തു. രാജു ഗെയ്​ക്​വാദ്​ നൽകിയ പാസിൽ ടോമിസ്ലാവ്​ മിർസെല ആയിരുന്നു വല കുലുക്കിയത്​. അതോടെ, തന്ത്രം തിരിച്ചറിഞ്ഞ ബ്ലാസ്​റ്റേഴ്​സ്​ ഏതുനിമിഷവും ഗോൾ നേടുമെന്നായി. 43ാം മിനിറ്റിൽ സിപോവിച്ചിനു പകരം അബ്​ദുൽ ഹക്ക്​ വന്നു. അടുത്ത മിനിറ്റിൽ ബ്ലാസ്​റ്റേഴ്​സ്​ താരം വാസ്​ക്വസ്​ അടിച്ച ഉശിരൻ ഷോട്ട്​ തലവെച്ച്​ രക്ഷപ്പെടുത്താനുള്ള മെർസലയുടെ ശ്രമം പാളിയപ്പോൾ നേരെ ചെന്നുപതിച്ചത്​ സ്വന്തം പോസ്​റ്റിൽ. സ്​കോർ: 1-1.

രണ്ടാം പകുതിയിൽ ഇരു ടീമുകളും കുറെക്കൂടി കരുതലും ​പ്രതിരോധവുമുറപ്പിച്ച്​ മൈതാനത്തിറങ്ങിയപ്പോൾ ഗോൾനീക്കങ്ങൾ കുറഞ്ഞു. ഉള്ളവയാക​ട്ടെ ​പ്രതിരോധ മതിലുകളിൽ തട്ടി വീണു. 79ാം മിനിറ്റിൽ വാസ്​ക്വസി​െൻറ കണ്ണഞ്ചും ഷോട്ട്​ അപകടം മണത്തെങ്കിലും പണിപ്പെട്ട്​ ഈസ്​റ്റ്​ ബംഗാൾ ഗോളി തട്ടിയകറ്റി. അഞ്ചു മിനിറ്റ്​ അധിക സമയത്തും ഗോൾ പിറക്കാതെ വന്നതോടെ കളി സമനിലയിൽ പിരിഞ്ഞു.