ഒസാസുനയെ വീഴ്​ത്തി ബാഴ്​സലോണ; ജയം എതിരില്ലാത്ത രണ്ടു ഗോളിന്​

ബാഴ്​സലോണ: വീഴ്​ചകളുടെ നീണ്ട ഇടവേളക്കു ശേഷം ലാ ലിഗ ഒന്നാം സ്​ഥാനക്കാർക്ക്​ രണ്ടു പോയിന്‍റ്​ മാത്രം അകലെ ബാഴ്​സലോണ. ഒസാസുനയെ ഏകപക്ഷീയമായ രണ്ടു ഗോളുകൾക്ക്​ പരാജയപ്പെടുത്തിയതോടെയാണ്​ മെസ്സി സംഘം രണ്ടാം സ്​ഥാനത്ത്​ നില ഭദ്രമാക്കിയത്​. രണ്ടു കളി കുറച്ചുകളിച്ച അത്​ലറ്റികോ മഡ്രിഡിന്​ 24 കളികളിൽ 58 പോയിന്‍റും 26 കളി പൂർത്തിയാക്കിയ കറ്റാലൻമാർക്ക്​ 56 പോയിന്‍റുമാണ്​ സമ്പാദ്യം. 53 പോയിന്‍റുമായി റയൽ മഡ്രിഡ്​ മൂന്നാമതുണ്ട്​. ഞായറാഴ്ച നിർണായക മത്സരത്തിൽ കരുത്തരായ അത്​ലറ്റികോ മഡ്രിഡ്​, റയൽ മഡ്രിഡിനെ നേരിടും.

​െമസ്സി തളികയിൽ വെച്ചുനൽകിയ പന്ത്​ ഗോളാക്കി മാറ്റി ജോർഡി ആൽബയാണ്​ ബാഴ്​സലോണയെ മുന്നിലെത്തിച്ചത്​. മറുപടി ഗോൾ ആകുമായിരുന്ന രണ്ട്​ അവസരങ്ങളിൽ ബാഴ്​സ ഗോളി ആ​ന്ദ്രെ മാർക്​ ടെർ സ്റ്റീഗൻ രക്ഷകനായി. വീണ്ടും മെസ്സി തന്നെ ഒരുക്കിയ അവസരം ഗോളാക്കി മോറിബ വിജയം ഉറപ്പാക്കി.

ബാഴ്​സ ഭരണസമിതി അന്വേഷണ നിഴലിലാകുകയും ഓഫീസിൽ​ റെയ്​ഡ്​ നടക്കുകയും ചെയ്​ത ഒരാഴ്ചക്കിടെ ടീം നേടുന്ന രണ്ടാം വിജയമാണിത്​. അന്വേഷണത്തിന്‍റെ ഭാഗമായി ക്ലബ്​ പ്രസിഡന്‍റ്​ ബർതോമിയോ അറസ്റ്റിലായിരുന്നു. പുതിയ പ്രസിഡന്‍റിനെ തെരഞ്ഞെടുക്കാനുള്ള വോ​ട്ടെടുപ്പ്​ ഇന്നാണ്​.