പെനാൽറ്റിയിൽ സ്​പെയിൻ വീണു; ഇറ്റലി ഫൈനലിൽ

റോം: പ്രതിരോധവും ആക്രമണവും തുല്യമായി മൈതാനം ഭരിക്കുകയും പന്ത്​ ഗോൾവല തേടി ഇരുവശത്തും പറന്നുനടക്കുകയും ചെയ്​ത മൂന്നു മണിക്കൂർ പോരിൽ ജോർജിഞ്ഞോ രക്ഷകനായപ്പോൾ അസൂറികൾ യുറോ കലാശപ്പോരിന്​. അധിക സമയവും കടന്ന്​ പെനാൽറ്റി ഷൂട്ടൗട്ടിലേക്ക്​ നീണ്ട കളിയിൽ സ്​പെയിനിനെ വീഴ്​ത്തിയാണ്​ ഇറ്റലി കലാശപ്പോര്​ ഉറപ്പിച്ചത്​. ഇന്ന്​ നടക്കുന്ന ഇംഗ്ലണ്ട്​- ഡെൻമാർക്ക്​ സെമിയിലെ ​ജേതാക്കളാകും ഫൈനലിൽ എതിരാളികൾ.

2008ലും അതുകഴിഞ്ഞ്​ 2012ലും ചുണ്ടോടുചേർത്ത കപ്പ്​ വീണ്ടുമൊരിക്കൽ സ്വന്തം ഷോക്കേസിലെത്തിക്കാമെന്ന ആവേശത്തോടെ 18കാരൻ പെഡ്രിയുൾപെട്ട കൗമാര നിര കളംനിറയുകയും ആദ്യാവസാനം മനോഹരമായ അവസരങ്ങളുമായി ആവേശം തിരിച്ചുവിളിക്കുകയും ചെയ്​ത്​ സ്​പെയിൻ ആയിരുന്നു മത്സരത്തിൽ ഒരു പണത്തൂക്കം മുന്നിൽ. പക്ഷേ, ​ലോക ഒന്നാം നമ്പർ ടീമായ ബെൽജിയത്തെ കെട്ടുകെട്ടിച്ച അസൂറികൾക്ക്​ മുന്നിൽ അതും മതിയാകില്ലായിരുന്നു. ഗോളൊഴിഞ്ഞ ആദ്യ പകുതിക്കു ശേഷം ഇറ്റലിയുടെ ഫ്രഡറികൊ ചീസയാ ആദ്യ വെടി പൊട്ടിച്ചു​- 60ാം മിനിറ്റിൽ. 20 മിനിറ്റ്​ കാത്തിരിക്കേണ്ടിവന്നെങ്കിലും അൽവാരോ മൊറാറ്റോ സ്​പെയിനിനെ ഒപ്പമെത്തിക്കുകയും ചെയ്​തു. അധിക സമയം പൂർത്തിയാക്കിയിട്ടും സമനില ബാക്കിയായ​പ്പോൾ വിധി നിർണയിച്ച്​ ഷൂ​ട്ടൗട്ട്​ എത്തി. കളിയെ അധിക സമയത്തേക്ക്​ നീട്ടി ആദ്യം ഗോളടിച്ച മൊറാറ്റോയുടെ കിക്ക്​ ഇറ്റാലിയൻ ഗോളിയുടെ കൈകളിലെത്തുകയും മുൻനിര താരം ഡാനി ഒൽമോ പുറത്തേക്ക്​ അടിച്ചുകളയുകയും ചെയ്​തതോടെ ഇറ്റലിക്കായി നാലാം കിക്കെടുത്ത ജോർജീഞ്ഞോയിലായിരുന്നു കണ്ണുകൾ മുഴുവൻ. ഒന്നും സംഭവിക്കാത്ത മട്ടിൽ അനായാസം പോസ്​റ്റിലേക്ക്​ തട്ടിയിട്ട ജോർജീഞ്ഞോ ഇറ്റലിയെ കിരീടത്തിന്​ ഒരു മത്സരം മാത്രം അരികെയെത്തിച്ചു.

ശരിക്കും ഫൈനലി​െൻറ അത്യാവേശം നൽകിയ സെമിയായിരുന്നു അർമഡകളും അസൂറികളും തമ്മിൽ നടന്നത്​. സാ​ങ്കേതിക മികവും കളിയഴകും സമം ചാലിച്ച്​ ഹൃദയം പോലെ മൈതാനം മിടിച്ചുനിന്ന അത്യപൂർവ പോരാട്ടം. ഇന്നലെ രാത്രിയിൽ സ്​പെയിനിനായിരുന്നു ഇത്തിരി മികവെങ്കിൽ മൊത്തം മത്സരങ്ങളിൽ ഇറ്റലിക്കായിരുന്നു മേൽക്കൈ. മൊറാറ്റയെ ആദ്യം പുറത്തിരുത്തി കളി നയിച്ച സ്​പാനിഷ്​ കോച്ച്​ എൻറിക്​ ഇറ്റലിക്കെതിരെ പുതിയ കളിയാണ്​ പുറത്തെടുക്കാൻ ഉ​പദേശിച്ചത്​. അത്​ അസൂറികൾക്ക്​ തുടക്കം പിഴച്ചെന്നുവരുത്തുകയും ചെയ്​തു. പക്ഷേ, ഗോൾ വീണ 62ാം മിനിറ്റിൽ മൊറാറ്റ എത്തുന്നതോടെ സ്​പെയിനി​െൻറ കളി ഒന്നൂടെ മാറി. ​വീണ ഗോൾ അതിവേഗം മടങ്ങുകയും ചെയ്​തു. അൽവാരോ തുടങ്ങിയ നീക്കത്തിൽ ഒൽമോക്ക്​ പന്ത്​ നൽകി തിരിച്ചുവാങ്ങി ഗോളി​േലക്ക്​ അടിച്ചുപായിക്കുകയായിരുന്നു. ഷൂട്ടൗട്ട്​ വിധി നിർണയിച്ചതോടെ 68 ശതമാനം കളി നയിച്ചിട്ടും തോൽവിയുമായി മടങ്ങുകയെന്ന വേദനയായി അർമഡകൾക്ക്​. സ്​പെയിൻ ലക്ഷ്യത്തിലേക്ക്​ 12 തവണ ഷോട്ട്​ പായിച്ചപ്പോൾ മൂന്നു തവണ മാത്രമായിരുന്നു ഇറ്റലിക്ക്​ അവസരം ലഭിച്ചത്​, അതിലൊന്ന്​ ഗോളാക്കി മാറ്റുകയും ചെയ്​തു.