പെയ്​തൊഴിഞ്ഞത്​ പന്തുരുളുന്നിടത്തോളം കാലം ഓർമിക്കപ്പെടുന്ന മായികരാവ്​

ചരിത്ര നിമിഷങ്ങളെ ആ രാവ്​ രണ്ടായി പകുത്തെടുക്കുകയായിരുന്നു. അഗ്​നിയിൽ സ്​ഫുടം ചെയ്​ത പോർവീര്യത്തി​െൻറ പരകോടിയിൽ അവർ പയറ്റിത്തെളിഞ്ഞപ്പോൾ കണ്ണീരും കിനാവും ഇഴചേർന്ന്​ പൊരുതി. ഭാഗ്യവും നിർഭാഗ്യവും, ആക്രമണവും പ്രത്യാക്രമണവും, ഉന്മാദവും നിരാശയും കളിവിളക്കുകൾക്കുകീഴെ ഇതുപോലെ കൊമ്പുകോർത്ത രാത്രികൾ വിരളം. ബുക്കാറസ്​റ്റിലെയും കോപൻഹേഗനിലെയും ആ കളിയരങ്ങുകളിൽ ഫുട്​ബാൾ, ചരിത്രത്തിലെ സകല ​മനോഹാരിതയും കെട്ടിയാടി. പന്തുരുളുന്നിടത്തോളം, കാലം അതി​െൻറ അതിശയക്കൊട്ടാരത്തിൽ ചില്ലിട്ടുസൂക്ഷിക്കുമെന്നുറപ്പുള്ള ദൃശ്യങ്ങളാണ്​ 240ലേറെ മിനിറ്റുകളിലായി ആ രാത്രിയിൽ പിറവി കൊണ്ടത്​. പുൽത്തകിടിക്ക്​ തീപിടിക്കുന്നുവെന്ന ക്ലീഷേകൾ പോലും അതി​​െൻറ പൂർണാർഥത്തിൽ ആളിപ്പടർന്ന രാവായിരുന്നത്​. ബ്യൂട്ടിഫുൾ ഗെയിമി​െൻറ ചന്തം ലോകത്തിനുമു​െമ്പ നറുനിലാവായി പരന്നൊഴുകിയ ആവേശരാവ്​....

രണ്ടു മത്സരങ്ങൾ...ഒരു ഇഞ്ചുറി ടൈം ഗോൾ...ഒരു എക്​സ്​ട്രാടൈം ഗോൾ...ഒരു അവസാന മിനിറ്റ്​ ഗോൾ....ഒരു പെനാൽറ്റി ഷൂട്ടൗട്ട്​..14 ഗോളുകൾ....ഡെന്മാർക്കി​െൻറയും റുമേനിയയുടെയും തലസ്​ഥാനനഗരികൾ കാത്തുവെച്ച വിസ്​മയക്കാഴ്​ചകളെ അവിടങ്ങളിലേക്ക്​ ഉറ്റുനോക്കിയ കണ്ണുകൾക്ക്​ ഇനിയൊരിക്കലും മറക്കാനാവില്ല.

എന്തൊരു രാത്രിയായിരുന്നു പെയ്​തുതോർന്നത്​...! അധിക സമയത്തി​െൻറ നെഞ്ചിടിപ്പും പെനാൽറ്റി ഷൂട്ടൗട്ടി​െൻറ ഉദ്വേഗവും ചേരുംപടി ചേർന്ന മായികരാവ്​. ​ഇക്കഴിഞ്ഞ ലോകകപ്പിൽ ഫ്രഞ്ച്​ വിജയഭേരിക്ക്​ ചുക്കാൻ പിടിച്ച കിലിയൻ എംബാപ്പെയുടെ ബൂട്ടിൽ ചുംബിച്ച പന്ത്​ സ്വിറ്റ്​സർലൻഡ്​ ​ഗോളി യാൻ സോമർ വലതുവശത്തേക്ക്​ കൃത്യമായി ഡൈവ്​ ചെയ്​ത്​ തട്ടിയകറ്റിയപ്പോൾ കളിക്കമ്പക്കാരുടെ കണക്കുകൂട്ടലുകൾ കീഴ്​മേൽ മറിഞ്ഞു. ലോകം ജയിച്ച ഫ്രഞ്ചുസംഘം, യൂറോപ്യൻ വൻകരയുടെ സമുന്നത പോരിടത്തിൽ അവസാന എട്ടിൽപോലുമെത്താതെ തിരിച്ചുകയറുകയായിരുന്നു.

എംബാപ്പെ ഫ്രാൻസി​െൻറ ഉറപ്പുള്ള പ്രതീക്ഷയായിരുന്നു. ഷൂട്ടൗട്ടിൽ ​ നിർണായകമായ അവസാന കിക്കെടുക്കാൻ കോച്ച്​ ദിദിയർ ദെഷാംപ്​സ്​ ആ യുവതാരത്തി​െൻറ പേര് എഴുതിച്ചേർത്തതും അതുകൊണ്ടുതന്നെയായിരുന്നു. എന്നാൽ, അനിശ്ചിതത്വം കളിയെ വരിഞ്ഞുമുറുക്കിയ ആ രാത്രിയിൽ എംബാപ്പെയെ കാത്തിരുന്നതും മറ്റൊന്നായിരുന്നില്ല. പെനാൽറ്റി കിക്കി​െൻറ നൂൽപാലത്തിൽ ഫ്രഞ്ചുകാര​െൻറ ഇൻറൻഷൻ ദിശതെറ്റാതെ സോമർ മനസ്സിൽ അളന്നെടുത്തപ്പോൾ കിരീടമോഹങ്ങളുടെ നടുവിൽ കളത്തിലിറങ്ങിയ ഫ്രാൻസിന്​ അകാലത്തിൽ മടക്കമായി.2010 ലോകകപ്പിനുശേഷം ഒരു പ്രധാന ടൂർണമെൻറി​െൻറ ക്വാർട്ടർ ഫൈനലിലെത്താതെ ഫ്രഞ്ചുപട ഇടറിവീണത്​ ഇതാദ്യം. അപ്പോൾ, മൈതാനത്തി​െൻറ മറുതലക്കൽ ഉന്മാദത്തി​െൻറ പരകോടിയിലെത്തിയ സ്വിസ്​ താരങ്ങൾ 67 വർഷത്തിനിടെ ആദ്യമായി ഒരു മേജർ ടൂർണമെൻറി​െൻറ ക്വാർട്ടർ ഫൈനലിൽ ഇടംപിടിച്ചതി​െൻറ ആഘോഷത്തിലായിരുന്നു.

അതിശയകരമായിരുന്നു കോപൻഹേഗനിലെയും ബുക്കാറസ്​റ്റിലെയും കളിഗതിയുടെ സാമ്യതകൾ. മത്സരം അവസാന പത്തു മിനിറ്റിലേക്ക്​ പ്രവേശിക്കു​േമ്പാൾ ക്രൊയേഷ്യക്കെതിരെ രണ്ടുഗോൾ മാർജിനിൽ 3-1ന്​ ലീഡ്​ ചെയ്യുന്ന സ്​പെയിനി​െൻറ വിജയം ഏവരും പ്രതീക്ഷിച്ചിരുന്ന സമയത്താണ്​ ലൂക്ക മോഡ്രിച്ചും കൂട്ടരും അത്യുജ്ജ്വലമായൊരു തിരിച്ചുവരവ്​ നടത്തിയത്​. ഓർസിച്ചി​െൻറ 85ാം മിനിറ്റ്​ ഗോളിനു പിന്നാലെ ഇഞ്ചുറി ടൈമി​െൻറ മൂന്നാം മിനിറ്റിൽ പസാലിച്ചും സ്​കോർ ചെയ്​തതോടെ സ്​പെയിൻ ഞെട്ടി. വിധിനിർണയം അധികസമയത്തേക്ക്​ നീളുകയായിരുന്നു. എന്നാൽ, എക്​സ്​ട്രാടൈമിൽ ആൽവാരോ മൊറാറ്റയും ഒയാർസബലും വല കുലുക്കിയതോടെ സ്​പെയിൻ വിജയത്തിലേക്ക്​ പിടിച്ചുകയറി.

ബുക്കാറസ്​റ്റിലും നിശ്ചിത സമയം പിന്നിടു​േമ്പാൾ അതുതന്നെയായിരുന്നു അവസ്​ഥ. സ്വിസിനെതിരെ സാധ്യത കൽപിക്കപ്പെട്ട ഫ്രാൻസും​ കോപൻഹേഗനിലെ സ്​പാനിഷ്​ സംഘത്തെപ്പോലെ ഒരു ഗോൾ ലീഡ്​ വഴങ്ങിയാണ്​ തുടങ്ങിയത്​. എന്നാൽ, കരീം ബെൻസേമയുടെ ഇരട്ടഗോളും പോൾ പോഗ്​ബയുടെ ഗോളും ചേർന്നതോടെ ഫ്രാൻസ്​ 3-1ന്​ മുന്നിൽ. ഒടുവിൽ 81ാം മിനിറ്റിൽ ഹാരിസ്​ സെഫറാവിച്ചും 90ാം മിനിറ്റിൽ മരിയോ ഗവ്​റാനോവിച്ചും വല കുലുക്കിയതോടെ സ്​കോർ അവിശ്വസനീയമായി 3-3. എക്​സ്​ട്രാടൈം ഗോൾരഹിതമായതോടെയാണ്​ ഷൂട്ടൗട്ടിൽ സ്വിസ്​ ടീമി​െൻറ ഭാഗ്യജാതകം തെളിയുന്നത്​.

ഇ.എസ്​.പി.എന്നി​െൻറ വിൻ പ്രോബബിലിറ്റി മോഡൽ പ്രകാരം നിശ്ചിത സമയത്തി​െൻറ അവസാന പത്തു മിനിറ്റ്​ ബാക്കിയിരിക്കേ സ്​പെയിൻ, ഫ്രാൻസ്​ ടീമുകളുടെ വിജയസാധ്യത 99.2 ശതമാനമായിരുന്നു. സ്വപ്​നങ്ങളിൽ ഇരുട്ടുപടരവേ, അവസാന ഘട്ടത്തിൽ സാധ്യതകളുടെ നേരിയ കച്ചിത്തുരുമ്പിൽനിന്ന്​ വലക്കണ്ണികളിലേക്ക്​ പഴുതുകൾ കണ്ടെത്തിയ ക്രോട്ടുകളോടും സ്വിസ്​ സംഘത്തോടുമാണ്​ അവിസ്​മരണീയമായ ഈ ഫുട്​ബാൾ രാവിന്​ ലോകം കടപ്പെട്ടിരിക്കുന്നത്​. തീർത്തും ഏകപക്ഷീയമായി മാറിയേക്കാവുന്ന മത്സരം കീഴടങ്ങാൻ മനസ്സില്ലാത്ത അവരുടെ ചങ്കുറപ്പുകൊണ്ടാണ്​ ചരിത്രമെഴുതിയത്​.

കാൽപനികതയുടെ കളിമുറ്റങ്ങളിൽ കിനാവുപോലെ പന്തുരുളുന്ന മുഹൂർത്തങ്ങളാണ്​ ഈ മത്സരങ്ങൾ അനുഭവ​വേദ്യമാക്കിയത്​. ഗാലറിയിൽനിന്ന്​ കളിക്കമ്പക്കാരുടെ മനസ്സിനൊപ്പം പാസുകൊരുത്ത്​ നാലു കളിസംഘങ്ങൾ ഇടതടവില്ലാതെ ഇരമ്പിയാർത്ത ആവേശനിമിഷങ്ങൾ. കൊണ്ടും കൊടുത്തും ദീർഘചത്വരത്തിനുള്ളിലൂടെ വായു​നിറച്ച തുകലുറ താളാത്​മകമായി ഒഴുകിയിറങ്ങുന്ന ഇത്തരം വശ്യമുഹൂർത്തങ്ങളാണ്​ കളിയുടെ ആത്​മാവ്​. കളത്തിലേക്കും സ്​ക്രീനിലേക്കും കണ്ണുനട്ടിരിക്കുന്നവ​െൻറ മനസ്സുനിറയുന്ന ഇത്തരം ചേതോഹരകാഴ്​ചകളാലാണ്​ കളി കാലാതിവർത്തിയായി തലമുറകളിലേക്ക്​ കൈമാറ്റം ചെയ്യപ്പെടുന്നതും.

ഒരൊറ്റ മിനിറ്റിനകം, കണ്ണീർചാലിട്ട മുഖഭാവങ്ങളിൽനിന്ന്​ ആർപ്പുവിളിയിലേക്ക്​ മാറിമറിഞ്ഞ ആ സ്വിറ്റ്​സർലൻഡ്​ ആരാധക​െൻറ ഭാവഹാവാദികളിൽ ഫുട്​ബാളി​െൻറ അനൽപമായ അവിശ്വസനീയതയുടെ ആകെത്തുകയുണ്ട്​. മറുപാതിയിൽ, ഫ്രഞ്ചുവിജയത്തിലേക്ക്​ വാദ്യം മുഴക്കുന്ന യുവാവ്​ പൊടുന്നനെ എതിർഗോളിൽ അസ്​തപ്രജ്​ഞനാകുന്ന കാഴ്​ചയും അതിനോടു ചേരുന്നു. കളത്തിലെ മായക്കാഴ്​ചകൾക്കൊപ്പം​ വൈകാരിക മുഹൂർത്തങ്ങളുടെ സുന്ദരദൃശ്യങ്ങളും സമ്മാനിച്ച ആ രാത്രി വരുംകാലങ്ങളിൽ ഫുട്​ബാളി​​നൊപ്പം അടയാളപ്പെട​ട്ടെ....