അർജന്‍റീനയോ ബ്രസീലോ? ആരു ജയിച്ചാലും ആവേശം പൊതിഞ്ഞ വീടിന്‍റെ 'പകുതി' ആഹ്ലാദത്തിൽ മുങ്ങും

പത്തനംതിട്ട: ഇക്കുറി കോപ്പ​ മെസ്സി അടിക്കുമെന്ന്​ അച്​ഛൻ. ആ കോപ്പ കണ്ട്​ അച്​ഛനും അർജന്‍റീനയും വെള്ളമിറക്കേണ്ടെന്ന് മകൻ. പോരാട്ടം തെക്കനമേരിക്കയിലാണെങ്കിലും അതിന്‍റെ അലയൊലികൾ മല്ലപ്പുഴശ്ശേരിയിലെ ഈ വീട്ടിൽ അങ്ങേയറ്റം ആവേശത്തോടെ പ്രതിഫലിക്കുന്നതുകണ്ട്​ അന്തംവിട്ടിരിക്കുകയാണ്​ നാട്ടുകാർ. ആവേശം വീടിനെ മൊത്തത്തിൽ 'പൊതിഞ്ഞ'തോടെയാണ്​ അച്​ഛന്‍റെയും മകന്‍റെയും ഫുട്​ബാൾ ജ്വരം അതിശയമായത്​. കോപാ അമേരിക്ക ടൂർണമെന്‍റിൽ ഇരുടീമുകളിൽ ആരു കപ്പടിച്ചാലും ഈ വീടിന്‍റെ 'പകുതി' ആഹ്ലാദത്തിൽ മുങ്ങുമെന്നുറപ്പ്​.

അർജൻറീനയുടെ പക്ഷത്ത് അടിയുറച്ചുനിൽക്കുകയാണ്​ മല്ലപ്പുഴശ്ശേരി പന്നിവേലിച്ചിറ യേശുദാസ് സേവ്യർ (മോനച്ചൻ). മകൻ ജോമോൻ ബ്രസീലിന്‍റെ കട്ടഫാനും. ഇരുടീമുകളുടെ ചായം പൂശി വീട്​ അർജൻറീനക്കും ബ്രസീലിനുമായി പകുത്ത് നൽകിയിരിക്കുകയാണ്​ ഇരുവരും.

വീടി​െൻറ മുൻഭാഗത്തെ​ ചുവർ അച്​ഛ​െൻറയും മക​െൻറയും കളിയാവേശത്തിൽ ഇരു ടീമുകളുടെയും വർണചാർത്തണിഞ്ഞ്​ നിൽക്കുന്നു. അർജന്‍റീനയുടെ നീലയും വെള്ളയും ഒരുഭാഗത്തും ബ്രസീലിന്‍റെ പച്ചയും മഞ്ഞയും മറുഭാഗത്തുമായി പൂശിയിരിക്കുന്ന വീട്​ നാട്ടുകാർക്ക്​​ കൗതുകമാണിപ്പോൾ. വീടിെൻറ മുൻഭാഗത്ത്​ ഭിത്തിയിൽ ഇരു വശത്തുമായി വാതിലിന് സമീപത്ത്​ തടിയിൽ നിർമിച്ച 'ലോകകപ്പു'മുണ്ട്​. പെയിൻറിങ്​ തൊഴിലാളി കൂടിയായ മോനച്ചനും ജോമോനും ചേർന്നാണ് വീടി​െൻറ ഭിത്തി പകു​െത്തടുത്ത് ഇഷ്​ടടീമുകളുടെയും ജഴ്​സിയുടെ നിറം പൂശിയത്​.

അർജന്‍റീന, ബ്രസീൽ ടീമുകളെച്ചൊല്ലിയുള്ള അച്​ഛന്‍റെയും മകന്‍റെയും അവകാശവാദങ്ങളും ഈ വീട്ടിൽ നിറയുന്നു. കോപാ അമേരിക്ക ടൂർണമെന്‍റിൽ ഇക്കുറി ലയണൽ മെസ്സിയുടെ നായകത്വത്തിൽ അർജന്‍റീന ജയിക്കുമെന്ന ഉറച്ച വിശ്വാസത്തിലാണ് മോനച്ചൻ. എന്നാൽ, നെയ്​മറിന്‍റെ കരുത്തിൽ സ്വന്തം മണ്ണിൽ ബ്രസീൽ ജേതാക്കളാകുമെന്ന്​ വാദിക്കുന്നു ജോമോൻ.

ഫുട്​ബാളിനെ അഗാധമായി പ്രണയിക്കുന്ന ഈ അച്​ഛനും മകനും കളിക്കാരുമാണ്​. പ്രായം 51 ആയിട്ടും ഫുട്​ബാൾ മോനച്ചന്​ കളിയോടുള്ള ആവേശം വിട്ടുമാറിയിട്ടില്ല. വീടിന് അടുത്തുള്ള പന്നിവേലിച്ചിറയിലെ ഗ്രൗണ്ടിൽ വൈകുന്നേരങ്ങളിൽ കൂട്ടുകാർക്കൊപ്പം കളത്തിലിറങ്ങും. ഫുട്​ബാൾ ഗ്രാമമായ പന്നിവേലിച്ചിറയിലെ സന്തോഷ് ആർട്സ് ആൻറ് സ്പോർട്സ് ക്ലബ് രക്ഷാധികാരിയായിരുന്നു മോനച്ചൻ. ടൂർണമെൻറുകളിൽ പങ്കെടുത്ത് ധാരാളം ട്രോഫികളും നേടിയിട്ടുണ്ട്. ടി.വിയിൽ ഫുട്ബാ​ൾ കളികൾ മുടങ്ങാതെ കാണും.

അച്​ഛ​നെ കണ്ടാണ്​​ കുഞ്ഞുന്നാൾ മുതൽ ജോമോനും പന്തിനു പിന്നാലെ കൂടിയത്​​. കോഴഞ്ചേരി സെൻറ്​തോമസ് ഹയർ സെക്കൻഡറി സ്കൂളിലെ പ്ലസ് ടു വിദ്യാർഥിയാണ് ജോമോൻ. മൂത്ത മകൻ ജോജോ ദുബൈയിലാണ്. ജോജോയുടെ പ്രേരണയിലാണ് വീടി​െൻറ മുൻവശം രണ്ട് ടീമിനായി തിരിച്ച് ജേഴ്സിയുടെ നിറമണിയിച്ചത്​.