അവസാന നിമിഷങ്ങളിൽ നാടകീയ തിരിച്ചുവരവ്​; റയൽ മഡ്രിഡിന്​ ഇത്​ ജയത്തോളം വരുന്ന സമനില

ബൊറൂസിയ: ചില സമനിലകൾ ജയത്തേക്കാൾ കുടുതൽ മധുരമുള്ളതാവും. ചാമ്പ്യൻസ്​ ലീഗിൽ ഗ്രൂപ്പ്​ ബിയിൽ ബൊറൂസിയ മോൻഷൻ ഗ്ലാഡ്​ബാഷിനെതിരായ മത്സരത്തിൽ റയലി​െൻറ തിരിച്ചുവരവ്​ അത്തരത്തിലുള്ളതായിരുന്നു. രണ്ടു ഗോളിന്​ പിന്നിലിരിക്കെ തോൽവി ഉറപ്പിച്ച ഘട്ടത്തിലാണ്​ റയൽ മഡ്രിഡ്​ മനോഹരമായി തിരിച്ചുവന്നത്​. അതും അവസാന ആറു മിനിറ്റിൽ!

ജർമൻ വമ്പന്മാരായ ബൊറൂസിയ മോൻഷൻ ഗ്ലാഡ്​ബാഷ്​ തുടക്കം മുതലെ റയലിനെതിരെ മേധാവിത്തം പുലർത്തിയാണ്​ കളിച്ചത്​. ഗ്ലാമർ ടീമിനെതിരെ ഇടവേളയില്ലാതെ ആക്രമണം നയിച്ചു. 23 കാരനായ മാർകസ്​ തുറാമാണ്​ മോഷൻ ഗ്ലാഡ്​ബാഷി​െൻറ രണ്ടു ഗോളുകളും(33, 58) നേടിയത്​. മുൻ ഫ്രഞ്ച്​ അന്താരാഷ്​ട്ര താരം ലിലിയാ​െൻറ മകനാണ്​ തുറാം.

പക്ഷേ, അവസാന നിമിഷം വരെ പ്രതീക്ഷ കൈവിടാതെ റയൽ താരങ്ങൾ പൊരുതി. ഒടുവിൽ ബ്രസീലിയൻ താരം കസെമിറോയുടെ നിശ്ചയദാർഢ്യത്തിനു മുന്നിൽ റയലിന്​ വിലപ്പെട്ട സമനില നേടാനായി. കരീം ബെൻസേമക്ക്​(87) അസിസ്​റ്റ്​ നൽകിയും 93ാം മിനിറ്റിൽ സെർജിയോ ​റാമോസി​െൻറ പാസിൽ ഗോൾ നേടിയുമാണ്​ ബ്രസീലിയൻ താരം ടീമിനെ കാത്തത്​.

രണ്ടു മത്സരം പിന്നിട്ടപ്പോൾ ഒരു പോയൻറ്​ മാത്രമുള്ള റയൽ നാലാം സ്​ഥാനത്താണുള്ളത്​. ആദ്യ മത്സരത്തിൽ ഷാക്​തറിനോട്​ റയൽ തോൽവി ഏറ്റുവാങ്ങിയിരുന്നു.