ചരിത്രമെഴുതിയ ഗോകുലത്തിന് കരിപ്പൂർ വിമാനത്താവളത്തിൽ രാജകീയ സ്വീകരണം

കൊണ്ടോട്ടി: സംസ്ഥാനത്തേക്കാദ്യമായി ഐ ലീഗ് കിരീടമെത്തിച്ച ഗോകുലം കേരള എഫ്.സി ടീമിന് കോഴിക്കോട്​ വിമാനത്താവളത്തില്‍ പ്രൗഢ സ്വീകരണം. കൊൽക്കത്തയില്‍നിന്ന്​ തിങ്കളാഴ്ച 12.45ന് പുറപ്പെട്ട് ചെന്നൈ വഴി രാത്രി 7.45നാണ് ഇന്‍ഡിഗോ വിമാനത്തില്‍ അഭിമാന താരങ്ങള്‍ കരിപ്പൂരിലെത്തിയത്. ടെര്‍മിനലില്‍നിന്ന്​ പുറത്തിറങ്ങിയ താരങ്ങള്‍ക്കും കോച്ച് വിന്‍സെന്‍സോ അനീസെക്കും രാജകീയ പ്രൗഢിയില്‍ ഗോകുലം മാനേജ്‌മെൻറ​ും ടീം ഫാന്‍സും സ്വീകരണം നൽകി.

19 കളിക്കാരും സ്​റ്റാഫുമാണ് സംഘത്തിലുണ്ടായിരുന്നത്. അഞ്ച് താരങ്ങള്‍ വ്യക്തിപരമായ ആവശ്യത്താല്‍ കൊല്‍ക്കത്തയില്‍ തന്നെ തങ്ങുകയായിരുന്നു. നൂറുകണക്കിന് ടീം ആരാധകര്‍ ഐ ലീഗ് ജേതാക്കളെ സ്വീകരിക്കാന്‍ വിമാനത്താവളത്തിലെത്തിയിരുന്നു. ബുധനാഴ്ച കോഴിക്കോട് കടപ്പുറത്ത് ടീമിന് സ്വീകരണം ഒരുക്കിയിട്ടുണ്ട്. ടി.വി. ഇബ്രാഹിം എം.എല്‍.എ സ്വീകരിക്കാന്‍ വിമാനത്താവളത്തിലെത്തിയിരുന്നു.