സിമോൺ 'കെയറി'ൽ എറിക്​സണ്​ തിരികെലഭിച്ചത്​ ജീവിതം; നായകന്​ ​കൈയടിച്ച്​ ലോകം

ലണ്ടൻ: കോപൻഹാഗനിലെ പാർകൻ സ്​റ്റേഡിയത്തിൽ ഫിൻലാൻഡിനെതിരായ മത്സരം ഒന്നാംപകുതിക്കു പിരിയാൻ മൂന്നു മിനിറ്റ്​ ശേഷിക്കെ സഹതാരം ​എറിക്​സൺ കുഴഞ്ഞുവീഴുന്നത്​​ കണ്ട നായകന്​ എന്തു ചെയ്യണമെന്നതിനെ കുറിച്ച്​ സംശയങ്ങളൊന്നുമുണ്ടായിരുന്നില്ല. പെനാൽറ്റി ഏരിയയിൽനിന്ന്​ ഓടിവന്ന്​ ത്രോ​ബാൾ സ്വീകരിക്കാൻ ഒരുങ്ങുന്നതിനിടെയായിരുന്നു എറിക്​സന്‍റെ വീഴ്​ച. എന്തുസംഭവിച്ചുവെന്നറിയാതെ​ മറ്റുള്ളവർ ആധിയോടെ നിന്നപ്പോൾ കളിനിർത്തി കരുതലും നടപടികളുമായി സിമോൺ കെയർ ചികിത്സ അറിയുന്ന ഡോക്​ടറായി.

ബോധംമറിഞ്ഞ സമയത്ത്​ നാവ്​ വായു സഞ്ചാരം തടയാതെ സൂക്ഷിക്കുകയും അടിയന്തരമായി സി.പി.ആർ നൽകുകയും ചെയ്യുന്ന കെയറിനെ കണ്ടാണ്​ റഫറി ആന്‍റണി ടെയ്​ലർ മെഡിക്കൽ സംഘത്തെ വിളിക്കുന്നത്​. മിടിപ്പ്​ പരിശോധിച്ചും ശരിയായ രീതിയിൽ കിടത്തിയും എല്ലാം അറിയുന്നവനെ പോലെ കെയർ തന്‍റെ ഇഷ്​ട സുഹൃത്തിനെ പരിചരിച്ചു. നാവ്​ ശ്വാസം മുടക്കുന്നതാണ്​ പലപ്പോഴും ഇത്തരം രോഗികൾക്ക്​ ജീവൻ പോലും അപായപ്പെടുത്തുന്നതെന്ന്​ ഡോക്​ടർമാർ പറയന്നു. ഉടനെത്തിയ മെഡിക്കൽ സംഘം നീണ്ട സമയം മൈതാനത്തുതന്നെ പ്രാഥമിക ചികിത്സ നൽകിയ ശേഷമായിരുന്നു ആശുപത്രിയിലേക്ക്​ മാറ്റിയത്​.

ഈ സമയമത്രയും താരത്തിന്​ കുടപിടിച്ച്​ ചുറ്റുംനിൽക്കാൻ കെയർ സഹതാരങ്ങ​​ൾക്ക്​ നിർദേശം നൽകി. മൊബൈൽ ഫോണിൽ രംഗങ്ങൾ പകർത്തുന്നത്​ തടയുക കൂടിയായിരുന്നു ലക്ഷ്യം. അതിനിടെ മൈതാനത്തെത്തിയ എറിക്​സ​ന്‍റെ പത്​നി സബ്രീന ക്വിസ്റ്റിനെ ചേർത്തുപിടിച്ച്​ ആശ്വസിപ്പിച്ചും നല്ലവാക്കുകൾ പറഞ്ഞും കെയർ കപ്പൽ മുങ്ങാതെ കാത്ത കപ്പിത്താനായി.

ക്യാപ്​റ്റന്‍റെ ഇടപെടലില്ലായിരുന്നുവെങ്കിൽ എല്ലാം കൈവിട്ടുപോ​യേനെയെന്ന്​ പറയുന്നു, പ്രമുഖ ഇംഗ്ലീഷ്​ ഡോക്​ടർ ഡോ. സ്​കോട്ട്​ മറേ. ഇത്രയും കരുതലോടെ ടീം കൂടെയുണ്ടായതിന്​ ലോകം നന്ദിപറയണമെന്നും അദ്ദേഹം പറയുന്നു.

മുഖത്ത്​ ഓക്​സിജൻ മാസ്​ക്​ അണിയിച്ച്​ എറിക്​സണെ ആശുപത്രിയിലേക്ക്​ മാറ്റു​േമ്പാൾ കെയറിന്‍റെ​ നേതൃത്വത്തിൽ സഹതാരങ്ങളും ഒപ്പം നീങ്ങി. അവർ പ്രാർഥനാപൂർവം ഡ്രസ്സിങ്​ റൂമിലിരുന്നു. ടീം അകത്തിരിക്കു​േമ്പാൾ കളി വീക്ഷിക്കാനെത്തിയ 10,000 ലേറെ വരുന്ന നാട്ടുകാരായ കാണികൾ എറിക്​സ​ന്‍റെ​ പേര്​ ഉറക്കെ ​വിളിച്ചുകൊണ്ടിരുന്നു. അപ്പുറത്ത്​ ഡാനിഷ്​ ആരാധകർ ക്രിസ്റ്റ്യൻ എന്ന്​ വിളിച്ച്​ പേര്​ പൂർത്തിയാക്കി.

നായകനായ കെയർ എക്കാലത്തും എറിക്​സന്‍റെ ഉറ്റ ചങ്ങാതിയായിരുന്നു. മിലാനിൽ ഇടക്കിടെ സന്ധിക്കുന്ന 'ഇരട്ടകൾ'. ഒരേ നഗരത്തിലെ ബദ്ധവൈരികളാണ്​ ഇരുവരും പന്തുതട്ടുന്ന ടീമുകളെന്നത്​ അവരെ അലട്ടാറില്ല. ആ സൗഹൃദത്തിന്‍റെ ആഴമാണ്​ ഇന്നലെ മൈതാനം കണ്ടത്​.

യൂറോപിലെ പുൽമൈതാനങ്ങളിൽ അതിവേഗം കൊണ്ട്​ അദ്​ഭുതങ്ങൾ തീർക്കുന്ന എറിക്​സണിന്​ എന്തുകൊണ്ട്​ ഇത്​ സംഭവിച്ചുവെന്നത്​ വിദഗ്​ധ പരിശോധനയിൽ മനസ്സിലാകാനിരിക്കുന്നേയുള്ളൂ. പക്ഷേ, ശനിയാഴ്ച വരെയും അങ്ങനെയൊന്നും താരത്തിന്‍റെ ശരീരം പ്രകടിപ്പിച്ചിരുന്നില്ല.

ഇപ്പോൾ സുഖമായിരിക്കുന്ന എറിക്​സൺ​ കൂടുതൽ പരിശോധനകൾ പൂർത്തിയായ ശേഷമേ ആശുപത്രി വിടൂ.

അതിനിടെ, എല്ലാം തകർന്ന താരങ്ങളോട്​ വീണ്ടും കളി പൂർത്തിയാക്കാൻ നിർദേശിച്ച യുവേഫക്കെതിരെയും പ്രതിഷേധം ശക്​തമാണ്​.