ഡബ്​ളടിച്ച്​ ക്രിസ്റ്റ്യാനോ മാജിക്​; ഇറ്റാലിയൻ കപ്പ്​ സെമിയിൽ ഇന്‍ററിനെ വീഴ്​ത്തി യുവന്‍റസ്​

റോം: കരുത്തരായ ഇന്‍റർ മിലാനെതിരെ സാൻ സിറോയിൽ തുടക്കംപാളിയ യുവെക്കായി രണ്ടു ഗോളും വിലപ്പെട്ട വിജയവും നൽകി ക്രിസ്​റ്റ്യാനോ. കരുത്തരുടെ പോരുകണ്ട ഇറ്റാലിയൻ സൂപർ കപ്​ സെമി ഒന്നാം പാദത്തിലാണ്​ റോണോ യുവന്‍റസിന്‍റെ വിജയ നായകനായത്​. സ്​കോർ 2-1.

ഒമ്പതാം മിനിറ്റിൽ മാർട്ടിനെസ്​ ഗോളിലൂടെ മുന്നിലെത്തിയ ഇന്‍റർമിലാൻ തുടർന്നും മൈതാനം വാണെങ്കിലും 29ാം മിനിറ്റിൽ പെനാൽറ്റി ഗോളാക്കി മാറ്റി ക്രിസ്റ്റ്യാനോ ടീമിനെ കളിയിൽ തിരികെയെത്തിച്ചു. ​ഏഴു മിനിറ്റ്​ കഴിഞ്ഞ്​ പിന്നെയും ഗോൾവല തുളച്ച താരം കലാശപ്പോരിലേക്ക്​ ആദ്യ കടമ്പ കടക്കാൻ ടീമിന്‍റെ പോരാട്ടത്തിൽ നിർണായക സാന്നിധ്യമായി.

ഗോൾ പോസ്റ്റിന്​ മുന്നിൽ സീനിയർ താരമായി 1,100 ാം തവണ വല കാത്ത ജിയാൻലൂജി ബുഫണെ കാഴ്​ചക്കാരനാക്കിയാണ്​ ആദ്യ 10 മിനിറ്റിൽ അർജന്‍റീന താരം ലോട്ടറോ മാർട്ടിനെസ്​ ഇന്‍ററിനെ മുന്നിലെത്തിച്ചത്​.

പക്ഷേ, യുവാൻ ക്വാഡ്രാഡോയെ ആഷ്​ലി യങ്​ ഫൗൾ ചെയ്​തതിന്​ ലഭിച്ച പെനാൽറ്റി അനായാസം ലക്ഷ്യത്തിലെത്തിച്ച്​ റൊണാൾഡോ യുവെക്ക്​ സമനില നൽകി. പ്രതിരോധത്തിലെ പിഴവ്​ മുതലെടുത്ത്​ മിനിറ്റുകൾക്കിടെ വീണ്ടും ലക്ഷ്യം കണ്ട താരം ടീമിന്​ ലീഡും വിജയവും സമ്മാനിച്ചു.

13 തവണ ഇറ്റാലിയൻ കപ്പ്​ ജേതാക്കളായ യുവെ ചൊവ്വാഴ്ച ടൂറിനിൽ രണ്ടാംപാദം സമനില നേടിയാൽ ഫൈനൽ ഉറപ്പാക്കാം. കലാശപ്പോരിന്​ ടിക്കറ്റ്​ ഉറപ്പിച്ചാൽ ഏഴു വർഷത്തിനിടെ ആറാം തവണയാകും ടീം ഫൈനൽ കളിക്കുക.

കഴിഞ്ഞ മാസം സീരി എ മത്സരത്തിൽ ഏകപക്ഷീയമായ രണ്ടു ഗോളിന്​ യുവന്‍റസിനെ വീഴ്​ത്തി പോയിന്‍റ്​ നിലയിൽ മുന്നിലെത്തിയ ഇന്‍റർ മിലാന്​ ഫൈനൽ കാണാൻ മികച്ച വിജയം നേടണം. സസ്​പെൻഷനിൽ കുടുങ്ങി പുറത്തായ റൊമേലു ലുക്കാക്കുവിന്‍റെ അഭാവമാണ്​ മിലാന്​ ഇന്നലെ കാര്യങ്ങൾ കടുപ്പമേറിയതാക്കിയത്​. അലക്​സിസ്​ സാഞ്ചസും സംഘവും പലവട്ടം രണ്ടാംഗോളിനടുത്തെത്തിയെങ്കിലും എതിർ ​പ്രതിരോധവും നിർഭാഗ്യവും വില്ലനായി.

സൂപർ കപ്​ രണ്ടാം സെമിയിൽ അറ്റ്​ലാന്‍റയും നാപോളിയും ഏറ്റുമുട്ടും.

കളി 14 മിനിറ്റ്​ ശേഷിക്കെ മൈതാനത്തുനിന്ന്​ പിൻവലിച്ച കോച്ചിന്‍റെ തീരുമാനത്തിൽ അരിശം പൂണ്ട്​ ക്രിസ്റ്റ്യാനോ മടങ്ങുന്നതിനും ഇന്നലെ സാൻസിറോ വേദിയായി. അൽവാരോ ​െമാറാ​റ്റയെ ആണ്​ അവസാന നിമിഷങ്ങളിൽ ടീം മുന്നേറ്റത്തിൽ കരുത്തുപകരാൻ ആൻഡ്രിയ പിർളോ അയച്ചത്​.