കെ.പി.എൽ: ബ്ലാസ്റ്റേഴ്സിനെ വീഴ്ത്തി ഗോകുലം സെമിയിൽ

കോഴിക്കോട്: കേരള പ്രീമിയർ ലീഗിലെ അവസാന ഗ്രൂപ് മത്സരത്തിൽ കേരള ബ്ലാസ്റ്റേഴ്സ് ഫുട്ബാൾ ക്ലബിനെ മറുപടിയില്ലാത്ത രണ്ടു ഗോളുകൾക്ക് പരാജയപ്പെടുത്തി ഗോകുലം കേരള എഫ്.സി സെമി ഫൈനലിൽ കടന്നു. അഞ്ച് കളികളിൽനിന്ന് ഏഴു പോയന്റുമായാണ് ഗോകുലം സെമിയിലെത്തിയത്.

32ാം മിനിറ്റിൽ ലൈവാങ് ബൊഹാമും 42ാം മിനിറ്റിൽ ലസ്റ്റ്ബോൺ മൗഫിനിയാങ്ങും ഗോകുലത്തിനായി ഗോൾ നേടി. കെ.പി.എല്ലിന്റെ സെമിയും ഫൈനലും വയനാട്ടിലാണ് നടക്കുക. അഞ്ച് വീതം മത്സരങ്ങളിൽനിന്ന് 11 പോയന്റുമായി വയനാട് യുനൈറ്റഡ് എഫ്.സിയും 10 പോയന്റുമായി കേരള പൊലീസും ഏഴു വീതം പോയന്റുമായി ഗോകുലം കേരള എഫ്.സിയും കേരള യുനൈറ്റഡ് എഫ്.സിയും സെമിയിൽ കടന്നു.