റയൽ പിന്മാറി; എംബാപ്പെ പി.എസ്​.ജിയിൽ തുടരും

മഡ്രിഡ്​: റെക്കോഡ്​ തുകക്ക്​ ടീമിലെത്തിക്കാനുള്ള തിരക്കുപിടിച്ച നീക്കങ്ങൾ റയൽ മഡ്രിഡ്​ അവസാനിപ്പിച്ചതോടെ ഫ്രഞ്ച്​ താരം കിലിയൻ എംബാപ്പെ പി.എസ്​.ജിയിൽ തുടരുമെന്ന്​ റിപ്പോർട്ട്​. ചൊവ്വാഴ്ച അർധരാത്രിയോടെ സീസണിലെ ട്രാൻസ്​ഫർ ജാലകത്തിന്​ താഴുവീഴാനിരിക്കെയാണ്​ റയൽ പിന്മാറ്റം. റയൽ മുന്നോട്ടുവെച്ച തുകക്ക്​ താരത്തെ വിട്ടുനൽകേണ്ടെന്ന്​ പി.എസ്​.ജി തീരുമാനമെടുത്തിരുന്നു. കടുത്ത സാമ്പത്തിക പ്രതിസന്ധിയിൽ ഉഴലുന്ന ലാ ലിഗ അതികായർക്ക്​ ഇതിലേറെ ഉയർന്ന തുക മുന്നോട്ടുവെക്കാനാകാത്തതാണ്​ കുരുക്കായത്​. അടുത്ത സീസണോടെ പി.എസ്​.ജിയുമായി കരാർ അവസാനിക്കുന്ന താരം ഇനിയും തുടരാനില്ലെന്ന്​ അറിയിച്ചിട്ടുണ്ടെങ്കിലും നിലനിർത്താനാകുമെന്നു തന്നെയാണ്​ പ്രതീക്ഷ.

പി.എസ്​.ജി മുന്നേറ്റത്തിൽ അവിഭാജ്യ ഘടകമായ എംബാപ്പെയെ അടർത്തി​െയടുക്കാൻ ഒന്നിലേറെ തവണ തുക ഉയർത്തിയ റയൽ അവസാന ദിനം വരെ ദൗത്യം വിജയിപ്പിക്കാനാകുമെന്ന പ്രതീക്ഷയിലായിരുന്നു​. എന്നാൽ, വമ്പൻ ഓഫർ മുന്നോട്ടുവെച്ചിട്ടും പി.എസ്​.ജി വഴങ്ങിയില്ല. അടുത്ത സീസണിൽ ഫ്രീ ഏജന്‍റാകുമെന്നതിനാൽ താരത്തെ പിടിച്ചു​വെക്കൽ ദുഷ്​കരമാകും.