ഇരട്ട ഗോളുമായി വിനീഷ്യസ്; റയലിന് വമ്പൻ ജയം; ഒന്നാം സ്ഥാനത്ത് 10 പോയന്റ് ലീഡ്
text_fieldsബ്രസീൽ വിങ്ങർ വിനീഷ്യസ് ഇരട്ട ഗോളുകളുമായി തിളങ്ങിയ ലാ ലിഗ മത്സരത്തിൽ കരുത്തരായ റയൽ മഡ്രിഡിന് തകർപ്പൻ ജയം. ഒസാസുനയെ രണ്ടിനെതിരെ നാലു ഗോളുകൾക്കാണ് റയൽ വീഴ്ത്തിയത്.
ജയത്തോടെ ഒന്നാം സ്ഥാനത്തുള്ള റയൽ പോയന്റ് വ്യത്യാസം പത്താക്കി. 29 മത്സരങ്ങളിൽനിന്ന് 72 പോയന്റ്. രണ്ടാം സ്ഥാനത്തുള്ള ജിറോണക്ക് ഇത്രയും മത്സരങ്ങളിൽനിന്ന് 62 പോയന്റാണുള്ളത്. ഡാനിയൽ കാർവഹാലും (18ാം മിനിറ്റിൽ) ബ്രാഹിം ഡയസും (61ാം മിനിറ്റിൽ) റയലിനായി വലകുലുക്കി. ആന്റെ ബുദിമിർ (ഏഴാം മിനിറ്റിൽ), ഐക്കർ മുനോസ് (90+1) എന്നിവരാണ് ഒസാസുനക്കായി ഗോൾ മടക്കിയത്.
റയലിന്റെ മൂന്നു ഗോളുകൾക്കും വഴിയൊരുക്കിയത് ഫെഡറികോ വാൽവെർദെയാണ്. കാർലോ ആഞ്ചലോട്ടിയുടെ കീഴിൽ രണ്ടാം ലാ ലീഗ കിരീടമാണ് റയൽ ലക്ഷ്യമിടുന്നത്. ആഞ്ചലോട്ടിയുടെ കീഴിൽ എല്ലാ ചാമ്പ്യൻഷിപ്പുകളിലുമായി റയലിന്റെ 200ാം ജയമാണിത്. ചാമ്പ്യൻസ് ലീഗ് ക്വാർട്ടർ ഫൈനലിൽ നിലവിലെ ചാമ്പ്യന്മാരായ മാഞ്ചസ്റ്റർ സിറ്റിയാണ് റയലിന്റെ എതിരാളികൾ.
മറ്റൊരു മത്സരത്തിൽ ജിറോണ ഗെറ്റാഫെയോട് ഏകപക്ഷീയമായ ഒരു ഗോളിന് പരാജയപ്പെട്ടു. റയലുമായുള്ള പോയന്റ് വ്യത്യാസം കുറക്കാനുള്ള അവസരമാണ് ജിറോണ നഷ്ടപ്പെടുത്തിയത്. 33ാം മിനിറ്റിൽ ജീസസ് സാന്റിയാഗോയാണ് ഗെറ്റാഫയുടെ വിജയഗോൾ നേടിയത്. ഞായറാഴ്ച നടക്കുന്ന മത്സരത്തിൽ ബാഴ്സലോണ അത്ലറ്റികോ മാഡ്രിഡിനെ നേരിടും.
![Girl in a jacket](https://www.madhyamam.com/h-library/newslettericon.png)
Don't miss the exclusive news, Stay updated
Subscribe to our Newsletter
By subscribing you agree to our Terms & Conditions.