അഗ്യൂറോ ഗോളും രക്ഷിച്ചില്ല; ബാഴ്​സയെ തകർത്ത്​ റയൽ മഡ്രിഡ്​

ബാഴ്​സലോണ: സിറ്റി വിട്ട്​ ബാഴ്​സയിലെത്തിയ മെസ്സിയ​ുടെ സഹതാരം സെർജിയോ അഗ്യൂറോക്കും ബാഴ്​സയെ രക്ഷിക്കാനായില്ല. മെസ്സിയാനന്തര ബാഴ്​സ ആദ്യ എൽക്ലാസികോ പോരാട്ടത്തിനിറങ്ങിയ​പ്പോൾ കറ്റലന്മാരെ അവരുടെ തട്ടകത്തിൽ 2-1ന്​ റയൽ മഡ്രിഡ് തോൽപിച്ചു​. ഡേവിഡ്​ അലാബയുടെ(32) ആദ്യ പകുതിയിലെ സൂപ്പർ ഗോളും 93ാം മിനിറ്റിൽ ലൂകാസ്​ വസ്​ക്വസ്​ നേടിയ ഗോളിലും റയൽ മഡ്രിഡ്​ ജയം ഉറപ്പിച്ചു.

ആവേശപ്പോരാട്ടത്തിൽ സെർജിയോ അഗ്യൂറോ ബാഴ്​സ ​ജഴ്​സിയിലെ ആദ്യ​ ഗോൾ നേടി പ്രതീക്ഷ നൽകിയെങ്കിലും ഏറെ വൈകിയിരുന്നു. എല്ലാം അവസാനിച്ച്​ റഫറി അവസാന വിസിലിന്​ ഒരുങ്ങ​ാനിരിക്കെ 97ാം മിനിറ്റിലായിരുന്നു അഗ്യൂറോയുടെ അസമയത്തുള്ള ഗോൾ.

ആവേശകരമായിരുന്നു മത്സരം. റയൽ മുന്നേറ്റ നിരയിൽ കരീം ബെൻസേമയും വിനീഷ്യസ്​ ജൂനിയറും റോ​ഡ്രിഗോയും കളിച്ചപ്പോൾ, കറ്റാലന്മാർക്കായി സെർജിനോ ഡെസ്റ്റും കൗമാര താരം ആൻസു ഫാത്തിയും മെംഫിസ്​ ഡിപായും ബൂട്ടുകെട്ടി. വമ്പൻ താരങ്ങളു​ള്ള റയൽ ബാഴ്​സ ഗോൾ മുഖംവിറപ്പിക്കുമെന്ന്​ പ്രവചിക്കപ്പെ​ട്ടെങ്കിലും തുടക്കത്തിൽ കറ്റാലന്മാരുടെ കാലിലായിരുന്നു പന്തു മുഴുവൻ. ചെറു പാസിലൂടെ ബാഴ്​സ റയൽ പോസ്റ്റിലേക്ക്​ ഇരച്ചു കയറി. ഗോളിന്​ അരികിൽ പലതവണ ബാഴ്​സ എത്തിയെങ്കിലും ഗോൾ ഭാഗ്യമുണ്ടായില്ല. സെർജിയോ ഡെസ്റ്റിനും ജെറാഡ്​ പീക്വെക്കും സുവർണാവസരം ലഭിച്ചെങ്കിലും റയൽ വലയിൽ പന്തെത്തിയില്ല.

എന്നാൽ, 32ാം മിനിറ്റിൽ റയൽ നടത്തിയ ഒന്നാന്തരമൊരു കൗണ്ടറിൽ ബാഴ്​സ തകിടം മറിഞ്ഞു. പ്രതിരോധ നിര ഒപ്പം ഒാടിയെങ്കിലും രക്ഷയുണ്ടായില്ല. റയൽ ഡിഫന്‍റർ ഡേവിഡ്​ അലാബയാണ്​ കൗണ്ടറിന്​ തുടക്കം കുറിച്ചത്​. ഒടുവിൽ പോസ്റ്റിനു മുന്നിൽ നിന്ന്​ റോഡ്രിഗോയിൽ നിന്ന്​ പന്ത്​ വാങ്ങി താരംതന്നെ ഒന്നാന്തരമൊരു ഷോട്ട്​ ഉതിർത്ത്​ വലതുളക്കുകയും ചെയ്​തു.

രണ്ടാം പകുതി തിരിച്ചടിക്കാമെന്ന ബാഴ്​സയുടെ കണക്ക്​കൂട്ടലും നടന്നില്ല. ചെറുപാസുകൾ റയൽ താരങ്ങൾ മനോഹരമായി കീറിമുറിച്ചു. ഒടുവിൽ 93ാം മിനിറ്റിൽ ലൂകാസ്​ വസ്​കസും ഗോൾ നേടിയതോടെ റയൽ ജയം ഉറപ്പിച്ചു. ഇഞ്ചുറി സമയം 97ാം മിനിറ്റിൽ സെർജിയോ അഗ്യൂറോ ഗോൾ നേടി ബാഴ്​സക്ക്​ പ്രതീക്ഷ നൽകിയെങ്കിലും വൈകിയിരുന്നു. മാഞ്ചസ്റ്റർ സിറ്റി വിട്ട്​ ബാഴ്​സയിലെത്തിയ അഗ്യൂറോയുടെ ആദ്യ ബാഴ്​സ ഗോളാണിത്​.