പരിക്ക്​; സാനെക്ക്​ ജർമൻ സൂപ്പർ കപ്പ്​ ഫൈനൽ നഷ്​ടമാകും

മ്യൂണിക്​: കാൽമുട്ടിന്​ പരിക്കേറ്റ ബയേൺ മ്യൂണിക്ക്​ താരം ലെറോയ്​ സാനെക്ക്​ ജർമൻ സൂപ്പർ കപ്പ്​ ഫൈനൽ മത്സരം നഷ്​ടമാകും. ബൊറൂസിയ ഡോർട്​മുണ്ടിനെതിരായ മത്സരത്തിൽ താരത്തിൻെറ സേവനം നഷ്​ടമാകുമെന്ന കാര്യം കോച്ച്​ ഹാൻസി ഫ്ലിക്ക്​ ചൊവ്വാഴ്​ച സ്​ഥിരീകരിച്ചു. വ്യാഴാഴ്​ചയാണ്​ സൂപ്പർ കപ്പ്​ കലാശപ്പോരാട്ടം.

അന്താരാഷ്​ട്ര മത്സരങ്ങൾക്കുള്ള ഇടവേളക്ക്​ ശേഷം സാനെ തിരികെ എത്തുമെന്ന്​ ഫ്ലിക്ക്​ പ്രത്യാശ പ്രകടിപ്പിച്ചു. സെപ്​റ്റംബർ 25ന്​ നടന്ന മത്സരത്തിൽ സെവിയ്യയെ 2-1ന്​ മറികടന്ന്​ ചാമ്പ്യൻസ്​ ലീഗ്​ ജേതാക്കളായ ബയേൺ യുവേഫ സൂപ്പർ കപ്പ്​ മ്യൂണിക്കിലെത്തിച്ചിരുന്നു.

എന്നാൽ ഞായറാഴ്​ച ബുണ്ടസ്​ലിഗയിൽ ഹോഫൻഹെയിമിനോട്​ 4-1ൻെറ ഞെട്ടിക്കുന്ന തോൽവി ഏറ്റുവാങ്ങിയ ചാമ്പ്യൻമാർ വിജയവഴിയിൽ തിരിച്ചെത്താനാകും ശ്രമിക്കുക.